ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ស្ទើរតែគ្រប់វិញ្ញាសា នៃការប្រកួតកីឡាស៊ីហ្គេមលើកទី៣២ ជាការកត់សម្គាល់គេឃើញថា ប្រជាពលរដ្ឋខ្មែរស្ទើរតែគ្រប់ស្រទាប់បានផុសផុលក្នុងការគាំទ្រក្រុមកម្ពុជា មិនថានៅទីលានផ្ទាល់ ឬនៅតាមបណ្តាញសង្គមនោះទេ។ ស្មារតីនេះ សម្រាប់លោកបណ្ឌិត យ៉ង់ ពៅ អគ្គលេខាធិការ នៃរាជបណ្ឌិតសភាកម្ពុជា យល់ឃើញថា វាជារបត់ដ៏ល្អមួយ ខណៈដែលរាជរដ្ឋាភិបាលក៏បានខិតខំប្រឹងប្រែងក្នុងការរៀបចំព្រឹត្តិការណ៍កីឡាជាប្រវត្តិសាស្រ្តនេះ។
បើតាមប្រសាសន៍របស់លោកបណ្ឌិត យ៉ង់ ពៅ កីឡា គឺជាប្រភេទល្បែងសង្គម ដែលការប្រកួតប្រជែងគ្នាដោយសមធម៌នៅក្នុងសង្គម ហើយគ្រប់ប្រទេសនៅលើសាកលលោកតែងតែមានកីឡា និងគ្មានប្រទេសណាមួយដែលគ្មានកីឡានោះទេ។ ហេតុនេះ លោកបណ្ឌិតលើកទឹកចិត្តដល់ប្រជាពលរដ្ឋកម្ពុជាទាំងអស់បន្តការគាំទ្រជាប្រចាំដើម្បីលើកទឹកចិត្តកីឡាករយើង។
” អញ្ចឹងខ្ញុំលើកទឹកចិត្តឱ្យប្រជាពលរដ្ឋយើងមានការគាំទ្រជាប្រចាំ… សូមគាំទ្រជាប្រចាំក្នុងការលើកទឹកចិត្តដល់កីឡាករ ក៏ដូចជាលើកទឹកចិត្តដល់រាជរដ្ឋាភិបាល ចូលរួមជាមួយរាជរដ្ឋាភិបាលក្នងវិស័យកីឡានេះ ពីព្រោះកីឡារបស់យើងប្រាកដណាស់ថា ត្រូវការគាំទ្រជានិរន្ត… “
ក្រៅពីនេះ ស្មារតីជ្រោមជ្រែងកីឡាកររបស់ពលរដ្ឋយើងនៅក្នុងព្រឹត្តិការណ៍កីឡាស៊ីហ្គេមលើកទី៣២ ដែលកម្ពុជាធ្វើជាម្ចាស់ផ្ទះនេះ លោកបណ្ឌិតក៏មើលឃើញដែរថា គឺជាស្មារតីល្អជួយជ្រោមជ្រែងឱ្យជាតិរបស់យើងលេចធ្លោឡើងនៅក្នុងឆាកអន្តរជាតិ ហើយមេរៀនពីស៊ីហ្គេមលើកទី៣២នេះ ក៏ជាមេរៀនដ៏ល្អមួយដែរ ដែលរាជរដ្ឋាភិបាលយើងបានរៀបចំឡើងធ្វើឱ្យពិភពលោកមានការភ្ញាក់ផ្អើលតាមរយៈការមិនយកថ្លៃលើការស្នាក់នៅ ធ្វើដំណើរ និងសិទ្ធិផ្សព្វផ្សាយជាដើម ដោយទាំងអស់នេះ គឺជាអ្វីដែលស៊ីហ្គេម និងការរៀបចំកីឡាពិភពលោកមិនដែលមាននោះទេ។
” អញ្ចឹងរាជរដ្ឋាភិបាលបានធ្វើកិច្ចការនេះ ហើយបានធ្វើផលិតផលទាំងនេះផ្សព្វផ្សាយចេញទៅពិភពលោកយ៉ាងផុសផុល ដែលធ្វើឱ្យគេស្គាល់កម្ពុជាយ៉ាងច្បាស់។ ទាំងអស់នេះដែលយើងត្រូវរៀនសូត្រ និងបន្តជ្រោមជ្រែងបន្តទៅទៀត…”
ជាមួយគ្នានេះដែរ លោកបណ្ឌិត យ៉ង់ ពៅ ក៏បានធ្វើការអំពាវនាវដល់ប្រជាពលរដ្ឋ ក៏ដូចជាអ្នកគាំទ្រកីឡាក្នុងព្រឹត្តិការណ៍ស៊ីហ្គេមមិនថាដោយផ្ទាល់ ឬនៅលើបណ្តាញសង្គម សូមបើកចិត្តឱ្យទូលាយ កុំវាយប្រហារគ្នា ដែលនាំឱ្យមានអរិយភាពទៅដល់នយោបាយ និងមិត្តភាពនៃបណ្តាប្រទេសជិតខាង ដោយថា វាមិនបានបង្ហាញនូវគំរូល្អនោះទេ តែផ្ទុយទៅវិញ យើងគួរសាទរគ្នាទៅវិញទៅមក ព្រោះថា ទ្រឹស្តីនៃកីឡា គឺនាំឱ្យយើងមានសុខភាពល្អ មិត្តភាពល្អ ដូច្នេះអ្នកគាំទ្រទាំងអស់សូមកុំភ្លេចនូវគោលគ្រឹះដើមនៃកីឡា ក៏ដូចជាព្រឹត្តិការណ៍ស៊ីហ្គេមនេះ៕
