ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ លើកឡើងថា រាជរដ្ឋាភិបាល ដោយមានការចូលរួមពីដៃគូអភិវឌ្ឍ ក៏ដូចជាវិស័យឯកជន នឹងខិតខំធ្វើយ៉ាងណា ឱ្យទារកដ្ឋានសហគមន៍ ឬមត្តេយ្យសហគមន៍ មាននិរន្តរភាព និងអាចដំណើរការបានជានិរន្តន៍ ដើម្បីជាប្រយោជន៍ទាំងគ្រួសារ វិស័យឯកជន និងសង្គមរបស់យើង។

ក្នុងពិធីអបអរខួបលើកទី១១៣ នៃទិវាអន្តរជាតិនារី ៨ មីនា ឯកឧត្តម ហេង សួរ មានប្រសាសន៍ថា បន្ថែមពីលើកម្មវិធីឧបត្ថម្ភសាច់ប្រាក់ ទៅដល់ស្រ្តីដែលជាកម្មករនិយោជិត រាជរដ្ឋាភិបាលក៏នឹងបង្កើតឱ្យមាន និងជំរុញឱ្យមាននូវកន្លែងថែទាំ ទារកដ្ឋានសហគមន៍ ឬមួយក៏មត្តេយ្យសហគមន៍បន្ថែមទៀត ដើម្បីជាឱកាសសម្រាប់ស្រ្តីដែលជាកម្មករនិយោជិក ក្រោយពេលដែលគាត់បានបញ្ចប់នូវលម្ហែមាតុភាពចំនួន៣ខែ គឺគាត់អាចនាំទារក ដែលជាកូនរបស់គាត់មកទុកដាក់នៅកន្លែងទារកដ្ឋាន ដែលមានវិជ្ជាជីវៈត្រឹមត្រូវ។

បើតាមប្រសាសន៍របស់ ឯកឧត្តម ហេង សួរ ទារកដ្ឋាន មិនត្រឹមតែមើលថែទាំកូនៗរបស់ស្រ្តីជាកម្មករនិយោជិត ត្រឹមតែផ្តល់នូវអាហារដែលមានជីវជាតិត្រឹមត្រូវទៅតាមអ្វីដែលជាស្តង់ដារសុខភាពប៉ុណ្ណោះទេ ប៉ុន្តែក៏មានអ្នកថែទាំប្រកបដោយវិជ្ជាជីវៈ ដែលអាចជួយបណ្តុះបណ្តាល អាចជួយបង្រៀនទារក តាំងពីនៅវ័យក្មេងឱ្យយល់ដឹង ឱ្យចេះនូវកិច្ចការងារ ឬក៏មានចំណេះដឹងមូលដ្ឋានមួយចំនួន ធ្វើឱ្យទារកពេលមានអាយុ៣ឆ្នាំ គេអាចនឹងមានចំណេះដឹងមូលដ្ឋាន មានសុខភាពល្អ មានការរីកលូតលាស់ កាយសម្បទារបានល្អ ទាំងស្មារតីរឹងមាំ អាចទទួលយកនូវការអប់រំទូទៅ នៅមតេយ្យសិក្សា នៅបឋមសិក្សា ឬមួយរហូតទៅដល់មធ្យមសិក្សា។

ឯកឧត្តមរដ្ឋមន្រ្តីសង្កត់ធ្ងន់ថា នេះគឺជាអត្ថប្រយោជន៍ថ្មីមួយដែលក្រសួងការងារ និងបណ្តុះបណ្តាលវិជ្ជាជីវៈ នឹងត្រូវសហការជាមួយក្រសួងស្ថាប័នពាក់ព័ន្ធ ដើម្បីធ្វើយ៉ាងណាបង្កើតទារកដ្ឋានសហគមន៍ ឬក៏មត្តេយ្យសហគមន៍ឱ្យក្លាយទៅជាការពិត ដោយមានការចូលរួមពីរាជរដ្ឋាភិបាល ដៃគូអភិវឌ្ឍ វិស័យឯកជន និងការចូលរួមពីបងប្អូនកម្មករនិយោជិតផងដែរ ក្នុងការជួយឱ្យមត្តេយ្យសហគមន៍នេះ អាចមាននិរន្តរភាព និងអាចដំណើរការបាន ដើម្បីប្រយោជន៍ទាំងគ្រួសារ ជាប្រយោជន៍ទៅដល់វិស័យឯកជន និងជាប្រយោជន៍សង្គមរបស់យើងផងដែរ។

គួររំលឹកថា ក្នុងពិធីសំណេះសំណាលជាមួយបងប្អូនកម្មករកម្មការិនី កាលពីកំឡុងខែវិច្ឆិកា ឆ្នាំ២០២៣ សម្តេចធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានណែនាំឱ្យក្រសួងការងារនិងបណ្តុះបណ្តាលវិជ្ជាជីវៈ សហការជាមួយស្ថាប័នពាក់ព័ន្ធ ដើម្បីវិនិយោគលើការរៀបចំបង្កើតទារកដ្ឋាននិងមត្តេយ្យសហគមន៍ នៅតាមបណ្តាតំបន់ជិតរោងចក្រ ដើម្បីចូលរួមចំណែកក្នុងការជួយសម្រាលបន្ទុកដល់កម្មករ កម្មការិនីដែលមានកូននៅក្នុងបន្ទុក សំដៅជួយបង្កើនប្រសិទ្ធភាពនិងផលិតភាពការងាររបស់បងប្អូន កម្មករ កម្មការិនី អាចជួយដល់ការរីកចម្រើនរបស់រោងចក្រផងដែរ។

លើសពីនេះ បើតាមការសិក្សារបស់ក្រសួងអប់រំ យុវជន និងកីឡា សិស្សដែលបានចូលរួមថ្នាក់បឋមសិក្សា ប្រសិនបើបានឆ្លងកាត់នូវមត្តេយ្យមួយជំហានមុន គឺងាយស្រួល និងងាយចាប់បាននៅថ្នាក់បឋមសិក្សា។ សម្តេចធិបតីក៏បានបញ្ជាក់ដែរថា ជាមួយគ្នានេះ ការរៀបចំនូវទារកដ្ឋាន និងមត្តេយ្យសហគមន៍ ក៏ចូលរួមចំណែកនៅក្នុងការយកចិត្តទុកដាក់ទៅលើសុខភាព សុខុមាលភាពរបស់ទារក តាមរយៈការគ្រប់គ្រង ការជួយបំប៉ន ទាំងការហូបចុក ទាំងអាហាររូបត្ថម្ភ និងការបង្ហាត់បង្រៀនផ្សេងៗ៕