ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ឆ្នាំ២០២៤នេះ ជាឆ្នាំដែលលទ្ធផល នៃការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប មានកំណើនខ្ពស់ជាងគេបង្អស់ក្នុងរយៈពេល១០ឆ្នាំចុងក្រោយនេះ ពោលគឺមានអ្នកជាប់រហូតដល់ទៅដល់ ១០៦ ៣៥១នាក់ ខណៈសិស្សជាប់និទ្ទេស A មានរហូតដល់ ២ ២១៦នាក់។ អ្នកនាំពាក្យក្រសួងអប់រំ លើកឡើងថា នេះបង្ហាញពីលទ្ធផលដែលទទួលបានពីកំណែទម្រង់ ដែលក្រសួងបានប្រឹងប្រែងអស់រយៈពេលជាង១០ឆ្នាំ។
លោកជំទាវ ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា មានប្រសាសន៍ថា នៅដំណាក់កាលទី១ នៃកំណែទម្រង់ ក្រសួងបានផ្តោតសំខាន់ទៅលើការកែលម្អគោលនយោបាយ ក៏ដូចជាសមត្ថភាពរបស់បុគ្គលិក ក៏ដូចជាការគ្រប់គ្រងហិរញ្ញវត្ថុ និងការគ្រប់គ្រងសាលារៀន កំណែទម្រង់រង្វាយតម្លៃ និងកំណែទម្រង់កម្មវិធីសិក្សា គុណវុឌ្ឍរបស់គ្រូជាដើម។ លោកជំទាវបន្តថា បន្ទាប់ពីជោគជ័យនៅក្នុងដំណាក់កាលកំណែទម្រង់ដំណាក់កាលទី១ ក្រសួងបានដាក់ចេញនូវយន្តការ និងកំណែទម្រង់បន្ទាប់ គឺការធ្វើកំណែទម្រង់តាមសាលារៀន ហើយកំណែទម្រង់តាមសាលារៀននេះ ក្រសួងបានដាក់ចេញដំណើរការសាកល្បងនៅសាលារៀនជំនាន់ថ្មី ដើម្បីស្វែងយល់ពីរបៀបនៃការគ្រប់គ្រង ក៏ដូចជាការដាក់ចេញនូវយន្តការ នៃការបង្រៀន ដោយមានដាក់បញ្ចូលនូវគុណសម្បទាសតវត្សរ៍ទី២១ ដើម្បីជំរុញឱ្យលោកគ្រូអ្នកគ្រូបណ្តុះបណ្តាលប្អូនៗឱ្យចេះប្រើប្រាស់ភាសាអង់គ្លេស ICT និងវិធីសាស្រ្តបង្រៀនថ្មីៗ, និយាយរួមបង្រៀនយ៉ាងណាឱ្យប្អូនៗមានចំណេះដឹងជាមូលដ្ឋានផង និងចេះសិក្សារៀនដោយខ្លួនឯង ចេះស្រាវជ្រាវ ធ្វើការងារជាក្រុម និងការធ្វើការងារតាមគម្រោងជាដើម។
បើតាមលទ្ធផល នៃការប្រឡងសញ្ញាបត្រមធ្យមសិក្សាទុតិយភូមិ ដែលត្រូវបានកត់ត្រាទុក កាលពីឆ្នាំ២០១៤ មានសិស្សដែលប្រឡងជាប់សញ្ញាបត្រមធ្យមសិក្សាទុតិយភូមិ តែត្រឹមជាង៣ម៉ឺននាក់ប៉ុណ្ណោះ ហើយជាបន្តបន្ទាប់ ចំនួនសិស្សប្រឡងជាប់សញ្ញាបត្រមធ្យមសិក្សាទុតិយភូមិបានកើនឡើងជារៀងរាល់ឆ្នាំ រហូតដល់ឆ្នាំ២០២៤នេះ សិស្សដែលជាប់សញ្ញាបត្រមធ្យមសិក្សាទុតិយភូមិបានកើនដល់ជាង ១០ម៉ឺននាក់ ខណៈសិស្សនិទ្ទេស A កាលពីឆ្នាំ២០១៤ មានត្រឹមតែ ១១នាក់ បានកើនជាបន្តបន្ទាប់ រហូតដល់ជាង ២ពាន់នាក់នៅក្នុងឆ្នាំ២០២៤នេះ។
លោកជំទាវ ឃួន វិច្ឆិកា លើកឡើងថា លទ្ធផលដ៏ល្អប្រសើររបស់សិស្សានុសិស្សនេះ គឺកើតចេញពីការខិតខំប្រឹងប្រែងរបស់ពួកគេផ្ទាល់ ក៏ដូចជាអ្នកអាណាព្យាបាល មាតាបិតា លោកគ្រូអ្នកគ្រូដែលខិតខំប្រឹងប្រែងក្នុងការបណ្តុះបណ្តាល ហើយចុងក្រោយគឺទាក់ទងទៅនឹងកំណែទម្រង់ដែលក្រសួងអប់រំ យុវជន និងកីឡា បានដាក់ចេញ។
យ៉ាងណាក៏ដោយលោកជំទាវអ្នកនាំពាក្យបញ្ជាក់ថា ការប្រឡងសញ្ញាបត្រមធ្យមសិក្សាទុតិយភូមិ មិនមែនជាការប្រឡងដើម្បីកំណត់ថា អ្នកណាជាប់ អ្នកណាធ្លាក់ដើម្បីជ្រើសរើសចំនួនទៅកាន់សាកលវិទ្យាល័យនោះទេ ប៉ុន្តែជាការវាស់ស្ទង់សមត្ថភាពរបស់ប្អូនៗ ជារង្វាយតម្លៃការសិក្សារបស់ប្អូនៗរយៈពេល១២ឆ្នាំចុងក្រោយនៅក្នុងកម្រិតចំណេះទូទៅ ដូច្នេះហើយក្រសួងក៏នៅតែអនុវត្តនូវគោលការណ៍អ្នកចេះ គឺជាប់ ហើយស្របទៅតាមកម្មវិធីដែលបានសិក្សានៅក្នុងសាលារៀនដែលប្អូនៗបានសិក្សា៕
