ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងកម្មវិធីដាក់ដំណើរការគម្រោងគំនិតផ្តួចផ្តើមភាពជាដៃគូសិក្សារវាងសាលារៀនជំនាន់ថ្មី និងសាកលវិទ្យាល័យគ្រប់គ្រងអាស៊ីបូព៌ា កាលពីពេលថ្មីៗនេះ ឯកឧត្តមបណ្ឌិត អ៊ុម រម្យណី រដ្ឋលេខាធិការក្រសួងអប់រំ យុវជន និងកីឡា មានប្រសាសន៍ សាលារៀនជំនាន់ថ្មី បាននឹងកំពុងដើរតួនាទីយ៉ាងសំខាន់សម្រាប់ការរីកចម្រើននៃការអប់រំសិស្សដែលមានគុណភាពខ្ពស់នៅកម្ពុជា។
ឯកឧត្តមបណ្ឌិត អ៊ុម រម្យណី បានគូសបញ្ជាក់ថា សម្រាប់អាទិភាពនៃកំណែទម្រង់សាលារៀន ក្រសួងអប់រំមានគោលបំណងបើកសាលារៀនជំនាន់ថ្មី ដោយផ្តោតលើការផ្តល់ស្វ័យភាពក្នុងការអនុវត្តកម្មវិធីសិក្សា ដើម្បីអប់រំធនធានមនុស្សដែលមានជំនាញសម្រាប់សតវត្សរ៍ទី២១។ សាលាជំនាន់ថ្មីបានចាប់ផ្ដើមដំបូងដោយក្រសួងអប់រំ យុវជន និងកីឡាក្នុងឆ្នាំ២០១៤ ដើម្បីបង្កើតជាសាលារៀនរដ្ឋ “ស្វយ័ត” ជាមួយនឹងមុខងារក្នុងការច្នៃប្រឌិត និងកែលម្អគុណភាពអប់រំ។
រដ្ឋលេខាធិការក្រសួងអប់រំ បានបន្ថែមថា តាមរយៈបទពិសោធន៍ជោគជ័យរបស់សាលាជំនាន់ថ្មីនៅកម្ពុជា ក្រសួងអប់រំមានផែនការពង្រីកសាលារៀនជំនាន់ថ្មីកាន់តែច្រើនឡើង នៅទូទាំងប្រទេសកម្ពុជាក្នុងអាណត្តិនេះ។ ដើម្បីសម្រេចបាននូវគោលដៅនេះ ការសហការប្រកបដោយប្រសិទ្ធភាពរវាងអាជ្ញាធរសាធារណៈ និងភាគីពាក់ព័ន្ធទាំងអស់គឺជាការចាំបាច់។
បើតាម ឯកឧត្តមបណ្ឌិត អ៊ុម រម្យណី ភាពជោគជ័យនៃប្រព័ន្ធសាលារៀនជំនាន់ថ្មី អាស្រ័យលើកត្តាជាច្រើន ជាពិសេសគ្រូបង្រៀនដែលមានគុណវុឌ្ឍិ សិស្សដែលមានសមត្ថភាព សម្ភារៈសិក្សាគ្រប់គ្រាន់ និងការចូលរួមពីក្រុមគ្រួសារ។ ទន្ទឹមនោះ កំណែទម្រង់សំខាន់ៗរបស់ក្រសួងអប់រំផ្តោតលើសាលារៀន ការអភិវឌ្ឍគ្រូបង្រៀនតាមរយៈគ្រឹះស្ថានបណ្តុះបណ្តាលគ្រូ ការអប់រំតាមប្រព័ន្ធឌីជីថល ការអប់រំវិទ្យាសាស្ត្រ និងបច្ចេកវិទ្យា ការលើកកម្ពស់សុខភាព ការអភិវឌ្ឍយុវជន ដើម្បីលើកកម្ពស់ជំនាញក្នុងសតវត្សទី២១ ការបង្កើតមជ្ឈមណ្ឌលឧត្តមភាពក្នុងគ្រឹះស្ថានឧត្តមសិក្សា ការកសាងប្រព័ន្ធ និងការអភិវឌ្ឍន៍សមត្ថភាព។
គួរជម្រាបជូនថា បច្ចុប្បន្នមានសាលារៀនចំនួន ១១ កំពុងដាក់ឱ្យអនុវត្តកម្មវិធីសិក្សាសាលារៀនជំនាន់ថ្មី រួមមាន ១.សាលាបឋមសិក្សាអនុវត្តហ៊ុន សែន ក្រុងកំពង់ចាម ខេត្តកំពង់ចាម ២. សាលាបឋមសិក្សាស្វាយព្រហូត ស្រុកស្វាយជ្រំ ខេត្តស្វាយរៀង ទី៣. សាលាបឋមសិក្សាអង្គរបាន ស្រុកកងមាស ខេត្តកំពង់ចាម ៤.សាលាបឋមសិក្សាសម្តេចព្រះរាជអគ្គមហេសីនរោត្តម មុនីនាថ សីហនុ ស្រុកឧដុង្គ ខេត្តកំពង់ស្ពឺ, ៥. វិទ្យាល័យហ៊ុន សែន កំពង់ចាម ខេត្តកំពង់ចាម ៦. វិទ្យាល័យព្រះស៊ីសុវត្ថិ រាជធានីភ្នំពេញ ទី៧. វិទ្យាល័យហ៊ុន សែន ព្រែកលៀប រាជធានីភ្នំពេញ ទី៨. វិទ្យាល័យ សម្តេចអគ្គមហាធម្មពោធិសាលជា ស៊ីម ព្រែកអញ្ចាញ ខេត្តកណ្តាល ទី៩. អនុវិទ្យាល័យគោកព្រីង ខេត្តស្វាយរៀង ១០. វិទ្យាល័យហ៊ុន សែន ពាមជីកង ខេត្តកំពង់ចាម និង១១. វិទ្យាល័យ ព្រះយុគន្ធ រាជធានីភ្នំពេញ E2 STEM៕
