ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ដើម្បីអបអរសាទរ ទិវាជាតិអំណានលើកទី១០ (១១ មីនា ២០២៥) ក្រសួងអប់រំ យុវជន និងកីឡា បានរៀបចំឱ្យមានការប្រឡងប្រជែងអត្ថបទឧស្សាហ៍កថា ដោយឆ្នាំនេះនឹងធ្វើឡើងក្រោមប្រធានបទ «តម្លៃគុណធម៌តាមរយៈវណ្ណកម្មអក្សរសិល្ប៍ខ្មែរ»។
បើតាមក្រសួងអប់រំ ការប្រឡងប្រជែងនេះ នឹងជ្រើសរើសជ័យលាភីចំនួន៣រូប ហើយអ្នកដែលអាចចូលរួមប្រកួតរួមមាន ព្រះសង្ឃ បុគ្គលិកអប់រំ គ្រូបង្រៀន គរុនិស្សិត គរុសិស្ស និស្សិត សិស្ស និងសាធារណជនទូទៅ។ ស្នាដៃដែលត្រូវដាក់ចូលរួមប្រឡងប្រជែង ត្រូវស្ថិតក្នុងរង្វង់ពី ១៥ទៅ២០ទំព័រជាអត្ថបទវាយដោយកុំព្យូទ័រ។
ចំពោះការរៀបចំអត្ថបទ និងការប្រើពុម្ពអក្សរក្នុងស្នាដៃប្រកួត ៖ សម្រាប់ចំណងជើងនិងចំណងជើងរង ប្រើពុម្ពអក្សរ Khmer OS Moul Light ទំហំ១២ សម្រាប់តួអត្ថបទ ប្រើពុម្ពអក្សរ Khmer OS Siemreap ទំហំ១២ តម្រឹមលើ 1.5cm តម្រឹមក្រោម 1.5cm តម្រឹមឆ្វេង 1.5cm តម្រឹមស្តាំ 1.5cm ក្រដាស A4។ អត្ថបទរបស់បេក្ខជនត្រូវមានក្រប ដែលមានព័ត៌មានសំខាន់ ៤គឺបាវចនាជាតិ ប្រធានបទ ឈ្មោះបេក្ខជន និងអាសយដ្ឋានរបស់បេក្ខជន។
បេក្ខជនមិនតម្រូវឱ្យបង់ប្រាក់ និងចុះឈ្មោះជាមុននោះទេ ។ ស្នាដៃត្រូវដាក់ចូលរួមប្រឡងប្រជែងត្រូវធានាថាមានអ្នកសរសេរតែមួយនាក់ប៉ុណ្ណោះ។ ស្នាដៃទាំងឡាយណាដែលមិនគោរពតាមលក្ខខណ្ឌខាងលើនឹងមិនត្រូវបានដាក់វាយតម្លៃក្នុងការប្រឡងប្រជែងនោះឡើយ។
សម្រាប់បេក្ខជនដែលចាប់អារម្មណ៍ចង់ចូលរួមប្រកួតស្នាដៃ តម្រូវឱ្យបំពេញព័ត៌មានមួយចំនួន និងផ្ញើស្នាដៃតាមរយៈ https://link.moeys.gov.kh/wr6ub7 ។ កាលបរិច្ឆេទឈប់ទទួលស្នាដៃត្រឹមថ្ងៃទី១៥ ខែកុម្ភៈ ឆ្នាំ២០២៥ វេលាម៉ោង១៧:០០នាទីជាកំហិត។ បេក្ខជនអាចសាកសួរព័ត៌មានបន្ថែមតាមរយៈតេឡេក្រាម 010 220 788 ។
គួរជម្រាបជូនថា អត្ថបទឧស្សាហ៍កថា គឺជាប្រភេទស្នាដៃបែបអត្ថាធិប្បាយ ឬការបញ្ចេញទស្សនៈ និងមតិផ្ទាល់ខ្លួនរបស់អ្នកនិពន្ធ អ្នកសិក្សា។ អត្ថបទបែបឧស្សាហ៍កថា នេះ ត្រូវបានគេប្រើយ៉ាងទូលំទូលាយនៅក្នុងស្នាដៃអក្សរសិល្ប៍ ជារបៀបសាច់រឿង ឬកំណាព្យ ជាដើម៕
