ក្នុងសេចក្តីប្រកាស​ព័ត៌មាន​កាលពីពេលថ្មីៗនេះ អង្គការទស្សនៈពិភពលោក​ប្រចាំ​ប្រទេស​កម្ពុជា បាន​ឱ្យដឹងថា កាលពីដើមខែមករា ខ្លួន​បានដាក់​ឱ្យ​អនុវត្ត​គម្រោង​លើក​កម្ពស់​សមភាពយេនឌ័រ​ក្នុង​កម្មវិធីអាហារូបត្ថម្ភ ហៅកាត់ថា ReactsIn នៅស្រុកព្រែកប្រសព្វ ខេត្តក្រចេះ ។ គម្រោងថ្មីនេះ គេ​រំពឹងថា នឹង​ជួយ​ឱ្យ​កុមារ​ប្រមាណ ៣០០០នាក់ មានសុខភាព​កាន់តែ​ប្រសើរឡើង។

លោកវេជ្ជបណ្ឌិត អាស្រាត តូឡូសូ (Asrat Tolosso) ប្រធានគម្រោងលើកកម្ពស់សមភាពយេនឌ័រក្នុងកម្មវិធីអាហារូបត្ថម្ភ ReactsIn នៃអង្គការទស្សនៈពិភពលោកកាណាដា បាននិយាយថា “កុមាររីកចម្រើន និងឈានដល់សក្តានុពលពេញលេញរបស់ពួកគេ នៅពេលពួកគេទទួលបានការថែទាំពីម្ដាយ និងឪពុក។ ទោះបីជាម្តាយជាអ្នកទទួលខុសត្រូវចម្បង ជាពិសេសនៅក្នុងផ្នែកដូចជាការផ្តល់អាហារ ការថែទាំ និងការស្វែងរកសេវាថែទាំសុខភាពក៏ដោយ ក៏ឪពុកមានតួនាទីសំខាន់ក្នុងការអភិវឌ្ឍរបស់កូនៗផងដែរ។”

លោកជំទាវ ខាំ សុភាព អភិបាលរងខេត្តក្រចេះ បាននិយាយក្នុងពេលបើកអនុវត្តគម្រោងថា “ខ្ញុំលើកទឹកចិត្តឱ្យអ្នកចូលរួមទាំងអស់ក្នុងការបើកអនុវត្តគម្រោងនេះ ឱ្យយកចិត្តទុកដាក់ចំពោះការអនុវត្ត និងបើកចំហរទៅនឹងការរៀនសូត្រអ្វីថ្មីៗពីគម្រោង ដើម្បីបម្រើសហគមន៍របស់យើងឱ្យកាន់តែប្រសើរ និងធ្វើឱ្យសុខភាពកុមារនៅស្រុកព្រែកប្រសព្វកាន់តែប្រសើរ។”

កម្ពុជាគឺជាប្រទេសទីប្រាំដែលចូលរួមក្នុងគម្រោងលើកកម្ពស់សមភាពយេនឌ័រក្នុងកម្មវិធីអាហារូបត្ថម្ភ ReactsIn បន្ទាប់ពីប្រទេស បង់ក្លាដែស កេនយ៉ា សូម៉ាលី និងតង់ហ្សានី ដោយនាំមកនូវវិធីសាស្រ្តពិសេសមួយដើម្បីដោះស្រាយបញ្ហាអាហារូបត្ថម្ភកុមារតាមរយៈការពង្រឹងសមភាពយេនឌ័រ។ ទោះបីជាមានការរីកចម្រើនដ៏លេចធ្លោនៅលើបញ្ហានេះក្នុងអំឡុងទសវត្សរ៍កន្លងមកក៏ដោយ កម្ពុជានៅតែមានអត្រាកុមារខ្វះអាហារូបត្ថម្ភខ្ពស់ ដោយមានកុមារ ២២% មានកម្ពស់ទាបធៀបនឹងអាយុរបស់ពួកគេ (ការក្រិះក្រិន) ដែលតំណាងឱ្យគម្លាតការលូតលាស់របស់មនុស្ស។

អង្គការ​ទស្សនៈពិភពលោក​លើកឡើងថា ជាមួយនឹងថវិកាចំនួន ៤៣៤ ០៧៤ ដុល្លារអាមេរិក គម្រោងលើកកម្ពស់សមភាពយេនឌ័រក្នុងកម្មវិធីអាហារូបត្ថម្ភ ReactsIn នឹងរួមចំណែកដោយផ្ទាល់ទៅនឹងគោលដៅយុទ្ធសាស្រ្តបញ្ចកោណទី១ (ការអភិវឌ្ឍធនធានមនុស្ស) និងទី៤ (ការអភិវឌ្ឍដែលមានភាពធន់ ការអភិវឌ្ឍប្រកបដោយចីរភាព និងបរិយាបន្ន) របស់រាជរដ្ឋាភិបាល និងគោលដៅអភិវឌ្ឍន៍ប្រកបដោយចីរភាពលេខ ២ (ការលុបបំបាត់ការអត់ឃ្លាន) និងលេខ៥ (ភាពសមភាពយេនឌ័រ) របស់អង្គការសហប្រជាជាតិ ដោយផ្តោតលើការលើកកម្ពស់តួនាទី សមភាពយេនឌ័រដែលទាក់ទងនឹងអាហារូបត្ថម្ភ សុខភាព និងសុខភាពបន្តពូជ និងសិទ្ធិ នៅកម្រិតសហគមន៍ ប៉ុន្តែថែមទាំងពង្រឹងការផ្តល់សេវាសាធារណៈ និងបង្កើនការយល់ដឹងរបស់ភាគីពាក់ព័ន្ធអំពីភាពសមធម៌យេនឌ័រនៅក្នុងស្រុកតាមរយៈការស្វែងរកមតិគាំទ្រ និងការសន្ទនាគោលនយោបាយផងដែរ។

សូមបញ្ជាក់ថា គម្រោងលើកកម្ពស់សមភាពយេនឌ័រក្នុងកម្មវិធីអាហារូបត្ថម្ភ ដើម្បីពង្រឹងសមភាពយេនឌ័រ និងអាហារូបត្ថម្ភ ក្នុងខេត្តក្រចេះ គឺជាការ​អនុវត្ត​របស់អង្គការទស្សនៈពិភពលោក ដោយមានកិច្ចសហការជាមួយក្រសួងសុខាភិបាល ក្រសួងកិច្ចការនារី និងក្រសួងអភិវឌ្ឍន៍ជនបទ ដែលនឹងផ្តល់អត្ថប្រយោជន៍ដល់ប្រជាជនជាង ៣១ ០០០នាក់ នៅក្នុងភូមិចំនួន២៥ ក្នុងឃុំចំនួន៥ ក្នុងស្រុកព្រែកប្រសព្វ ឱ្យ​បានមុនឆ្នាំ២០២៩។ គម្រោងលើកកម្ពស់សមភាពយេនឌ័រក្នុងកម្មវិធីអាហារូបត្ថម្ភ មានគោលបំណងធ្វើឱ្យប្រសើរឡើងនូវអាហារូបត្ថម្ភ សិទ្ធិដែលទាក់ទងនឹងអាហារូបត្ថម្ភ និងសមភាពយេនឌ័រ សម្រាប់អ្នកមានជីវភាពក្រីក្រ និងអ្នកដែលត្រូវបានគេរំលង ដោយផ្តោតជាពិសេសលើស្ត្រី ក្មេងស្រីវ័យជំទង់ និងកុមារដែលមានអាយុក្រោម ៥ ឆ្នាំ៕