ការអប់រំនៅ​ឧត្តមសិក្សាបាន​ដើរតួយ៉ាងសំខាន់ក្នុងការអភិវឌ្ឍធនធានមនុស្ស និងអនុវិស័យគន្លឹះមួយ ដែលចូលរួមចំណែកដល់ការអភិវឌ្ឍសេដ្ឋកិច្ច និងសង្គម នៃប្រទេសជាតិនីមួយៗ, ដោយ​មើលឃើញពីសារៈសំខាន់នេះ ប្រទេស​កម្ពុជា​កំពុង​តែធ្វើ​ការ​ពង្រឹងគុណភាពនៅ​ថ្នាក់ឧត្តមសិក្សា ដើម្បីជួយ​សម្រេច​នូវ​ចក្ខុវិស័យ​កម្ពុជា​ឆ្នាំ​២០៣០ និងឆ្នាំ២០៥០។

កាលពីដើមសប្តាហ៍នេះ ក្រសួងអប់រំ យុវជន និងកីឡា បានបើក​កិច្ច​ប្រជុំដើម្បីពិនិត្យ​កែលម្អ​យន្តការ​គ្រប់គ្រង​គុណភាព​ឧត្តមសិក្សា​នៅ​កម្ពុជា, ក្នុង​ឱកាស​នោះ ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួង​អប់រំ យុវជន និងកីឡា បានផ្តល់​អនុសាសន៍ក្រុមការងារពាក់ព័ន្ធ រៀនសូត្រ​ពី​ប្រព័ន្ធអប់រំ នៅ​ប្រទេស​នានា​​ដែល​មានការ​ទទួលស្គាល់គុណភាពជាអន្តរជាតិ ហើយ​ពង្រឹងការបណ្តុះបណ្តាលនិស្សិត​ថ្នាក់បណ្ឌិត ជាពិសេស​ទៅលើវិធីសាស្រ្ត​ស្រាវជ្រាវ ទម្រង់នៃការសរសេរនិក្ខេបបទ ក៏​ដូចជាពិនិត្យ​វាយតម្លៃ​ជា​ប្រចាំ​នូវ​កម្មវិធីសិក្សា​ជាដើម។

តាម​របាយការណ៍របស់ក្រសួងអប់រំ ក្នុងមួយ​ឆ្នាំ កម្ពុជា​មាន​និស្សិត​បញ្ចប់​ការ​សិក្សា​ថ្នាក់ឧត្តម​សិក្សា​សរុបប្រមាណជិត៥ម៉ឺននាក់ ក្នុងនោះថ្នាក់បរិញ្ញាបត្ររងប្រមាណ៧ពាន់នាក់ ថ្នាក់បរិញ្ញាបត្រជាង ៣ម៉ឺននាក់ ថ្នាក់បរិញ្ញាបត្រជាន់ខ្ពស់ជាង៣ពាន់នាក់ និង​ថ្នាក់បណ្ឌិតជាង១រយនាក់។

លោកបណ្ឌិត យង់ ពៅ អគ្គលេខាធិការរាជបណ្ឌិត្យសភាកម្ពុជា គាំទ្រ​ចំពោះការពង្រឹងគុណភាពបណ្តុះបណ្តាល​និស្សិតឧត្តមសិក្សារបស់ក្រសួងអប់រំ ពិសេសថ្នាក់បណ្ឌិត។ លោកបណ្ឌិតមានប្រសាសន៍ថា ការបណ្ដុះបណ្ដាលថ្នាក់បណ្ឌិត គឺជា​ការសិក្សាលក្ខណៈវិទ្យាសាស្រ្ត ដោយវា​មិនមានភាពខុសគ្នារវាងការសិក្សានៅកម្ពុជា ឬក៏នៅបរទេស​នោះទេ។ ប៉ុន្តែ​លោកក៏​មើលឃើញថា មានការបណ្ដុះបណ្ដាលខ្លះមិនបាន​គោរពក្រមសីលធម៌នៃវិទ្យាសាស្រ្តដែរ។ ការអនុវត្តតាមក្រឹតក្រមវិទ្យាសាស្រ្ត គឺនិស្សិតត្រូវតែសរសេរនិក្ខេបបទ មានគណៈកម្មការការពារវាយតម្លៃ។

សម្រាប់លោកបណ្ឌិត យង់ ពៅ ការបណ្ដុះបណ្ដាលថ្នាក់បណ្ឌិត ប្រសិនបើគ្មានក្រមសីលធម៌ក្នុងផ្នែកវិទ្យាសាស្រ្តកម្រិតខ្ពស់ទេ នឹងធ្វើឱ្យប្រទេសមិនឱ្យគុណតម្លៃលើការសិក្សាស្រាវជ្រាវ។ ដូច្នេះ យើងត្រូវតែបណ្ដុះបណ្ដាលឱ្យត្រូវតាមប្រព័ន្ធក្រឹតក្រមវិទ្យាសាស្រ្ត។ “បើសិនយើងបណ្ដុះបណ្ដាលថ្នាក់បណ្ឌិតតាមប្រព័ន្ធក្រឹតក្រមវិទ្យាសាស្រ្ត គឺមិនខុសគ្នារវាងក្នុងស្រុក និងក្រៅស្រុកទេ”៕