ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការប្រឡងជ្រើសរើសសិស្សពូកែប្រចាំរាជធានី ខេត្ត សម្រាប់ឆ្នាំសិក្សា២០២៥-២០២៦នេះ នឹងចាប់ផ្តើមហើយ ហើយការប្រឡងទូទាំងប្រទេសគ្រោងនឹងធ្វើនៅថ្ងៃទី២៦ ខែមេសា ឆ្នាំ២០២៦។
ក្នុងសេចក្តីណែនាំ ដែលផ្សព្វផ្សាយនៅថ្ងៃនេះ ក្រសួងអប់រំ បានណែនាំឱ្យមន្ទីរអប់រំ យុវជន និងកីឡា រាជធានី ខេត្ត ត្រូវម្ចាស់ការរៀបចំការប្រឡងជ្រើសរើសសិស្សពូកែប្រចាំរាជធានីខេត្ត ផ្នែកអក្សរសិល្ប៍ខ្មែរ គណិតវិទ្យា និងរូបវិទ្យា ថ្នាក់ទី៩ និងថ្នាក់ទី១២ ទៅតាមពេលវេលាសមស្របណាមួយ ហើយវិញ្ញាសាក្នុងការប្រឡងជ្រើសរើសសិស្សពូកែប្រចាំរាជធានី ខេត្ត រួមមានមុខវិជ្ជាអក្សរសិល្ប៍ខ្មែរ គណិតវិទ្យា រូបវិទ្យា ដែលមានរយៈពេល ៣ម៉ោង និងវប្បធម៌ទូទៅ មានរយៈពេល២ម៉ោង។
សេចក្តីណែនាំក៏បានបញ្ជាក់ដែរថា សម្រាប់ការប្រឡងនេះ បេក្ខជនសិស្សពូកែម្នាក់ៗ អាចជ្រើសរើសមុខវិជ្ជាឯកទេស ដើម្បីធ្វើការប្រឡងបានតែមួយមុខវិជ្ជាប៉ុណ្ណោះ ក្នុងចំណោមមុខវិជ្ជា អក្សរសិល្ប៍ខ្មែរ គណិតវិទ្យា និងរូបវិទ្យា។ ចំណែកមុខវិជ្ជាវប្បធម៌ទូទៅ ជាមុខវិជ្ជាដែលបេក្ខជនម្នាក់ៗត្រូវបំពេញឱ្យគ្រប់លក្ខខណ្ឌនៃការប្រឡងជ្រើសរើស។
ជារៀងរាល់ឆ្នាំ ក្រសួងអប់រំ តែងរៀបចំការប្រឡងសិស្សពូកែទូទាំងប្រទេស ដើម្បីលើកកម្ពស់គុណភាពអប់រំ តាមរយៈការអភិវឌ្ឍធនធានមនុស្ស ដែលមានចំណេះដឹង។ ការប្រឡងនេះ ក៏លើកកម្ពស់ជំនាញប្រកបដោយសមត្ថភាពខ្ពស់ សំដៅអភិវឌ្ឍសេដ្ឋកិច្ច ក៏ដូចជាកសាងសង្គមជាតិ ឱ្យបានរឹងមាំ។ នៅក្នុងឆ្នាំ២០២៥កន្លងទៅនេះ មានបេក្ខជនចំនួន៣០នាក់ មកពីរាជធានីខេត្តចំនួន១៤ បានជាប់ជ័យលាភី។
តាមប្រកាសរបស់ក្រសួងអប់រំ បេក្ខជនដែលជាប់ជ័យលាភីក្នុងការប្រឡងសិស្សពូកែទូទាំងប្រទេសនេះ នឹងទទួលបានរង្វាន់ និងការលើកទឹកចិត្តពីរាជរដ្ឋាភិបាល ដូចជា ប្រកាសស្តីពីការទទួលស្គាល់សិស្សពូកែដោយឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា មួយច្បាប់, មេដាយមួយគ្រឿង សម្រាប់បេក្ខជនជ័យលាភី ចំណាត់ថ្នាក់ពីលេខ១ ដល់លេខ៣ ព្រមទាំងវិញ្ញាបនបត្របញ្ជាក់សិស្សពូកែទូទាំងប្រទេសមួយច្បាប់។
ជាមួយគ្នានេះ ជ័យលាភីសិស្សពូកែពីលេខ១ ដល់លេខ៥ ក៏ទទួលបានជាប្រាក់រង្វាន់តាមចំណាត់ថ្នាក់ ពី ២លាន៣សែនរៀន ដល់ ៣លាន៥សែនរៀល ហើយអាចមានប្រាក់រង្វាន់ ឬវត្ថុផ្សេងៗបន្ថែមទៀតពីសប្បុរសជន៕
