រដ្ឋមន្រ្តីក្រសួងអប់រំ យុវជន និងកីឡា បានអះអាងថា ក្រសួងបានត្រៀម​រួចជាស្រេច​ហើយ​ក្នុងការ​ដោះដូរ​មណ្ឌលប្រឡង ប្រសិន​បើមណ្ឌលនោះមានបញ្ហា​ណាមួយ​កើត​ឡើង​ដោយសារ​ទឹកជំនន់។

ក្នុង​សន្និសីទសារព័ត៌មានស្តីពីការ​ប្រឡងសញ្ញាបត្រ​មធ្យមសិក្សា​ទុតិយភូមិ សម័យ​ប្រឡង ៨ តុលា ២០២៤ ឯកឧត្តម​បណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា មានប្រសាសន៍ថា បច្ចុប្បន្ន​នេះ ដោយសារ​តែជារដូវភ្លៀងធ្លាក់ ក្រសួងបានត្រៀម​ក្នុងការដោះដូរ​មណ្ឌលប្រឡង ដូចជាមណ្ឌលមួយ​នៅ​ខេត្ត​កំពង់ចាម ដែលត្រូវ​បានទឹកលិច ក៏ដូចជាមណ្ឌលមួយ​ទៀត​នៅ​ខេត្ត​សៀមរាប ក៏​បានដោះស្រាយ​រួច។

ដោយឡែកមណ្ឌលចំនួន៣នៅរាជធានីភ្នំពេញ​ដែល​ត្រូវ​គំរាម​កំហែង​ដោយ​ជំនន់ទឹកភ្លៀង អាជ្ញាធរ​រាជធានីភ្នំពេញបានជួយ​ដោះស្រាយ ដោយ​ការ​ចាក់បំពេញដី ក៏​ដូចជា​បង្ហូរ​ទឹកចេញជាបន្ទាន់ ដើម្បីធានាថា មណ្ឌលប្រឡង​អាច​ដំណើរការ​បាន។

“ខ្ញុំសូមវាយតម្លៃខ្ពស់ចំពោះកិច្ចសហការរបស់អាជ្ញាធររាជធានីភ្នំពេញ ជាពិសេសឯកឧត្តម កើត ឆែ ដែលបានចាក់ដីបំពេញនៅវិទ្យាល័យ​ហ៊ុនសែនភ្នំពេញថ្មី ហើយ​បន្ទាប់​មក​ដោះស្រាយបង្ហូរ​ទឹក ឧទាហរណ៍​វិទ្យាល័យឬស្សីកែវ ទឹកក៏ស្រកចុះ…”

បើតាមអ្នកនាំពាក្យក្រសួងអប់រំ យុវជន និងកីឡា លោកជំទាវ ឃួន វិច្ឆិកា កាលពីថ្ងៃម្សិលមិញនេះ មានមណ្ឌលប្រឡង​ចំនួន៤បានរងការលិចទឹកភ្លៀង តែក្នុងនោះមណ្ឌល​មួយ​បានស្រកទាំងស្រុង រីឯមណ្ឌល៣​ទៀត​ស្ថិត​ក្នុង​ស្ថានភាព​អាចគ្រប់គ្រងបាន។ ក្នុងនោះ​រួមមាន ៖ វិទ្យាល័យហ៊ុនសែនជម្ពូវ័ន (បានដាក់រថយន្តបូមទឹក និងកាយប្រឡាយ គ្រប់គ្រងស្ថានភាពជនលិចធានាបាន១០០%), វិទ្យាល័យសម្តេចហ៊ុនសែនភ្នំពេញថ្មី (បានដោះស្រាយចាក់ខ្សាច់ភ្ជាប់ពីអគារមួយទៅអគារមួយ និង ក្រាលក្តារបន្ទះ ដើម្បីសម្រួលដល់ការធ្វើដំណើររបស់បេក្ខជនចូលរួមការប្រឡង ធានាបាន ១០០%), សាលាបឋមសិក្សាភ្នំពេញថ្មី (រដ្ឋបាលរាជធានីភ្នំពេញបានដាក់រថយន្តបូមទឹកប្រចាំការនៅទីនោះ បានដោះស្រាយបញ្ហាជនលិច១០០%) និង វិទ្យាល័យឫស្សីកែវ (ទឹកលិចក្នុងទីធ្លា ជាដំណោះស្រាយ គណៈនាយកដោយមានការចូលរួមអន្តរាគមន៍ពីរដ្ឋបាលខណ្ឌឫស្សីកែវបានច្រកបាវខ្សាច់ លើកផ្លូវ ក្រាលការ៉ូឡា ដើម្បីរៀបជាផ្លូវសម្រាប់ឱ្យបេក្ខជនដើរក្នុងថ្ងៃប្រឡង)។

ឯកឧត្តម កើត ឆែ អភិបាល​ស្តីទី នៃគណៈអភិបាល​រាជធានីភ្នំពេញ មានប្រសាសន៍ថា សម្រាប់ការប្រឡង​សញ្ញាបត្រ​មធ្យមសិក្សា​ទុតិយភូមិ ឬបាក់ឌុបនេះ អាជ្ញាធរដែនដីបានខិតខំរៀបចំទីតាំងប្រឡង ដោយផ្តល់កិច្ចការពារសន្តិសុខ និង​សណ្តាប់ធ្នាប់ ហើយ​ក្នុងនោះ​ក៏​​ធានាបានថា មណ្ឌលប្រឡងមិនមានការលិចទឹក និយាយរួម​បេក្ខជនបេក្ខនារី​អាច​ទុកចិត្ត​បានថា មណ្ឌលប្រឡង​របស់ខ្លួនមិន​មានបញ្ហា ហើយ​ក្នុងនោះ​អាជ្ញាធរ​រាជធានីភ្នំពេញក៏​ធានា​ចំពោះ​ការ​ផ្ញើកង់ម៉ូតូ​សម្រាប់បេក្ខជន​ប្រឡង​ដោយមិនយកប្រាក់​នោះឡើយ។

យ៉ាងណាក៏ដោយ បើតាម​ប្រសាសន៍​របស់ ឯកឧត្តមបណ្ឌិតសភាចារ្យ ហង់ជួន ណារ៉ុន នៅឆ្នាំក្រោយនេះ ការ​ប្រឡងមធ្យមសិក្សា​ទុតិយភូមិ នឹងលែងមានបញ្ហា​ដោយសារ​ទឹកលិច​មណ្ឌលប្រឡងទៀតហើយ ដោយ​ក្រសួង​នឹងធ្វើការ​បង្ខិតការប្រឡងនេះ មកធ្វើ​នៅ​ខែសីហាវិញ ដែលជាខែមិនមានភ្លៀងធ្លាក់៕