គណៈកម្មការរៀបចំការប្រឡងប្រជែង នៃ​​ក្រសួងមុខងារ​សាធារណៈ បាន​ឱ្យដឹងថា ការប្រឡងប្រជែង​ជ្រើសរើស​គ្រូបង្រៀន​នៅ​កម្រិតបឋមសិក្សា ឱ្យ​ចូលបម្រើការងារ​ក្នុង​ក្របខណ្ឌ​ក្រសួងអប់រំ យុវជន និងកីឡា គ្រោងនឹងប្រព្រឹត្ត​ទៅ​ចាប់ពីថ្ងៃទី១២-១៤ និងថ្ងៃទី២០-២១ ខែកក្កដា ឆ្នាំ២០២៤ខាងមុខ ដោយមានបេក្ខជន​ចូលរួម​ប្រឡង​សរុប​ចំនួន ៣៨,១៦៨នាក់។

ឯកឧត្តម ហ៊ុន ម៉ានី ឧបនាយករដ្ឋមន្រ្តី រដ្ឋមន្រ្តីក្រសួងមុខងារសាធារណៈ និង​ជា​ប្រធាន​គណៈកម្មការ​ប្រឡង​ប្រជែងជ្រើសរើស​មន្រ្តី​រាជការ បាន​ឱ្យដឹងថា សម្រាប់ការ​ប្រឡង​លើកទី១ ដែលគ្រោង​ធ្វើនៅខែកក្កដា ខាងមុខនេះ គឺដើម្បីជ្រើសសម្រាំង​បេក្ខជន​ ចំនួន ៤០៤១នាក់ ចេញពីបេក្ខជន​ដែលមានសិទ្ធិប្រឡង​ចំនួនសរុប ៣៨១៦៨នាក់ ខណៈ​ដែលបេក្ខជន​ដេលត្រូវ​ជ្រើសរើស​ជាប់ស្ថាពរ​ចុងក្រោយ គឺមានចំនួន​ត្រឹម​តែ ១៣៤៧នាក់។

តាមសេចក្តីជូនដំណឹង​របស់ក្រសួងមុខងារសាធារណៈ ការប្រឡងជ្រើសរើសគ្រូបង្រៀនបឋមសិក្សា សម្រាប់វិញ្ញាសាសរសេរ លើកទី១ នឹងធ្វើឡើងនៅ៣មណ្ឌល គឺ មណ្ឌលសាកលវិទ្យាល័យភូមិន្ទភ្នំពេញ ស្ថិត​នៅ​តាម​បណ្តោយ​មហាវិថីសហព័ន្ធរុស្ស៊ី ខណ្ឌទួលគោក រាជធានីភ្នំពេញ, មណ្ឌលសាលាភូមិន្ទរដ្ឋបាល ស្ថិត​តាម​បណ្តោយវិថី​ឧកញ៉ា​ញឹកជូឡុង ខណ្ឌចំកាមន រាជធានីភ្នំពេញ និង​មណ្ឌលសាកលវិទ្យាល័យ​ភូមិន្ទនិតិសាស្រ្ត និង​វិទ្យាសាស្រ្តសេដ្ឋកិច្ច ស្ថិត​នៅ​តាម​បណ្តោយមហាវិថីព្រះមុនីវង្ស ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។

ក្នុងនោះការ​ប្រឡង​ត្រូវ​បែងចែកជា៨វេន ដោយ​រួមមាន សម័យប្រឡង​ថ្ងៃទី១៣ ខែកក្កដា ឆ្នាំ២០២៤ មានចំនួន២វេន នៅមណ្ឌលប្រឡង​សាកលវិទ្យាល័យភូមិន្ទភ្នំពេញ ដោយ វេនទី១ សម្រាប់បេក្ខជន​មក​ពី​ខេត្តសៀមរាប, ពោធិ៍សាត់, ប៉ៃលិន ចាប់ពីម៉ោង១២ ដល់ម៉ោង១៤ ។ វេនទី២ សម្រាប់បេក្ខជនមកពីខេត្ត​បាត់ដំបង, បន្ទាយមានជ័យ, ឧត្តរមានជ័យ ចាប់ពីម៉ោង១៦ ដល់ម៉ោង ១៨។

សម័យ​ប្រឡង​ថ្ងៃទី១៤ ខែកក្កដា ឆ្នាំ២០២៤ នៅមណ្ឌលប្រឡង​សាកលវិទ្យាល័យភូមិន្ទភ្នំពេញ ចំនួន២វេន គឺវេនទី៣ សម្រាប់បេក្ខជនមកពី​រាជធានីភ្នំពេញ, ខេត្តកោះកុង, មណ្ឌលគិរី, រតនគិរី, ស្ទឹងត្រែង, ព្រះវិហារ ចាប់ពីម៉ោង១២ ដល់ម៉ោង១៤ និង វេនទី៤ សម្រាប់បេក្ខជនមក​ពីខេត្តកណ្តាល, កំពង់ស្ពឺ, កំពង់ឆ្នាំង ចាប់ពីម៉ោង​១៦ ដល់ម៉ោង១៨។

សម័យប្រឡងថ្ងៃទី២០ ខែកក្កដា ឆ្នាំ២០២៤ នៅមណ្ឌលប្រឡង​សាលា​ភូមិន្ទរដ្ឋបាល និង​សាកលវិទ្យាល័យភូមិន្ទនីតិសាស្រ្ត និងវិទ្យាសាស្រ្តសេដ្ឋកិច្ច សម្រាប់វេនទី៥ បេក្ខជន​មកពីខេត្តកំពង់ចាម, ក្រចេះ ចាប់ពីម៉ោង១២ ដល់ម៉ោង ១៤, វេនទី៦ បេក្ខជន​មក​ពីខេត្តត្បូងឃ្មុំ, កំពង់ធំ ចាប់ពីម៉ោង១៦ ដល់ម៉ោង ១៨។

សម័យប្រឡង​ថ្ងៃទី២១ ខែកក្កដា ឆ្នាំ២០២៤ នៅមណ្ឌលប្រឡង​សាលា​ភូមិន្ទរដ្ឋបាល និង​សាកលវិទ្យាល័យ​ភូមិន្ទនីតិសាស្រ្ត និង​វិទ្យាសាស្រ្តសេដ្ឋកិច្ច សម្រាប់វេនទី៧ បេក្ខជន​មក​ពីខេត្តតាកែវ, កំពត, កែប, ខេត្តព្រះសីហនុ ចាប់ពីម៉ោង១២ ដល់ម៉ោង១៤។ ហើយវេនទី៨ បេក្ខជន​មក​ពីខេត្តព្រៃវែង និង​ខេត្តស្វាយរៀង ចាប់ពីម៉ោង១៦ ដល់ម៉ោង១៨។

ចំពោះការ​បែងចែក​លេខបន្ទប់ លេខតុ និង​ព័ត៌មានផ្សេងៗ ពាក់ព័ន្ធដំណើរការ នៃការប្រឡង គណៈកម្មការ​រៀបចំការ​ប្រឡង​ប្រជែង នៃក្រសួងមុខងារសាធារណៈ នឹង​ប្រកាស​ផ្សព្វផ្សាយ​នៅពេលក្រោយ៕