ភ្នំពេញ – ការរៀនប្រកបដោយគុណភាព ឬរៀនពិតប្រាកដ ទាមទារឱ្យគ្រូបង្រៀនពោរពេញដោយគុណសម្បទាជាគ្រូបង្រៀនពូកែ ឬគុណសម្បទាមនុស្សពូកែ។ ទន្ទឹមគ្នានេះ គ្រូបង្រៀនសម្រាប់សិស្សក្នុងសតវត្សរ៍ទី២១ និងយុគឧស្សាហកម្ម៤.០ ត្រូវមានគុណសម្បទាច្រើនបែប ច្រើនយ៉ាង ។ បន្ថែមពីលើគុណសម្បទាសតវត្សរ៍ទី២១ គុណសម្បទាពលរដ្ឋសកល គុណតម្លៃមនុស្ស និងចរិយ៉ាមនុស្ស គ្រូបង្រៀន ត្រូវយល់អំពីបរិបទសិស្ស និងការរៀនបន្តជាមួយសិស្ស។ នេះបើតាមឯកសារស្ដីពីសិក្សាបញ្ញត្តិដើម្បីអភិវឌ្ឍគុណសម្បទាសតវត្សរ៍ទី២១ របស់ក្រសួងអប់រំ យុវជន និងកីឡា។

ទី១. គ្រូបង្រៀនពូកែយល់ពីបរិបទសិស្ស ៖ គ្រូបង្រៀនយល់បរិបទសិស្ស សំដៅដល់គ្រូបង្រៀនដែលដឹកនាំសិស្សឱ្យរៀនក្នុងថ្នាក់ និងក្រៅថ្នាក់មានប្រសិទ្ធភាព។ ការយល់អំពីបរិបទសិស្ស សំដៅដល់ការយល់សាវតារ តម្រូវការ ទម្លាប់ និងឥរិយាបថរបស់សិស្ស។ ក្នុងបរិបទនៃការរៀននៅកម្ពុជា សិស្សខ្លះមិនអាចរៀន ធ្វើកិច្ចការសាលានៅផ្ទះបានទេ ចំណែកគ្រូបង្រៀនចង់ឱ្យសិស្សចេះ គ្រូបង្រៀនត្រូវបង្ខំសិស្សឱ្យធ្វើកិច្ចការសាលាកាន់តែច្រើន គ្រូបង្រៀនខ្លះខឹងសិស្សមិនធ្វើកិច្ចការ និងមិនដាក់កិច្ចការឱ្យគ្រូបង្រៀនកែ។ គ្រូបង្រៀនមួយចំនួនដាក់ទណ្ឌកម្មសិស្សផងដែរ ។ ទណ្ឌកម្មកាន់តែបង្កបញ្ហាផ្លូវចិត្តដល់សិស្សដែលមានបញ្ហាកាន់តខ្លាំង។ សិស្សអាចបាត់បង់អារម្មណ៍ចង់រៀនបន្ត និងសិស្សអាចបោះបង់ការសិក្សា ។

ជាមួយគ្នានេះ គ្រូបង្រៀនដែលមិនយល់បរិបទសិស្ស អាចបង្ខំសិស្សកាន់តែច្រើន និងកាន់តែខ្លាំង ។ របកគំហើញ នៃការស្រាវជ្រាវជាច្រើនពន្យល់ថា ការរៀនពិតប្រាកដពុំអាចកើតឡើង ដោយបង្ខំបានទេ ។ ការបង្ខំសិស្សឱ្យធ្វើកិច្ចការសាលា លើសពីការពិតនៃការធ្វើបានរបស់សិស្ស គឺបង្កភាពភ័យខ្លាច។ ដូច្នេះ គ្រូបង្រៀនត្រូវយល់ មិនមែនត្រឹមដឹង អំពីដើមហេតុដែលសិស្សមិនធ្វើកិច្ចសាលានោះទេ។ គ្រូបង្រៀនត្រូវរកដំណោះស្រាយផ្សេង និងកែពីបង្ខំ ដើម្បីឱ្យសិស្សនោះមានចំណាប់អារម្មណ៍ធ្វើកិច្ចសាលាដូចសិស្សផ្សេង ។ ការគ្រប់គ្រងដំណើរការរៀនក្នុងថ្នាក់ និងក្រៅថ្នាក់ អាចជាកិច្ចការលំបាកបន្ទុកធ្ងន់ និងបន្ថែមលើការងារបង្រៀនរបស់គ្រូបង្រៀន។ ជាពិសេស ការគ្រប់គ្រងដំណើរការរៀនជាមួយសិស្សរៀនយឺត រៀនខ្សោយ ឬសិស្សមានតម្រូវការពិសេស ជាការលំបាករបស់គ្រូបង្រៀនមួយជាន់ទៀត ។

សម្រាប់ដំណោះស្រាយដែលជួយគ្រូបង្រៀនក្នុងការគ្រប់គ្រងដំណើរការរៀនជាមួយសិស្សរៀនយឺត រៀនខ្សោយ ឬសិស្សមានតម្រូវការពិសេសរួមមាន៖

• សិស្សចូលចិត្តរៀនជាមួយសិស្សពូកែ ឬជាមួយមិត្តភក្តិជិតដិតបំផុតក្នុងថ្នាក់។ គូបង្រៀនអាចឱ្យសិស្សពូកែជួយសិស្សរៀនយឺតមួយនាក់ លើបញ្ញត្តិអ្វីមួយតាមបរិបទ និងលក្ខខណ្ឌដែលសិស្សពូកែ ឬមិត្តភក្តិអាចជួយបាន។ ការជួយគ្នាបែបនេះ អាចបណ្ដុះទម្លាប់ចង់រៀនដល់សិស្សរៀនយឺត។ ការយល់អំពីទម្លាប់ តម្រូវការ និងឥរិយបថផ្សេងគ្នារបស់សិស្ស ជាសិល្បៈនិងវិទ្យាសាស្ត្រជួយដល់ការដឹកនាំការរៀន ឱ្យសិស្សចូលរួមយ៉ាងសកម្មក្នុងសកម្មភាពថ្នាក់រៀន ហើយការប្រើទម្លាប់របស់សិស្សក្នុងដំណើរការរៀនជួយអភិវឌ្ឍបំណិនច្រើនបែបច្រើនយ៉ាង។ ឧទាហរណ៍ សិស្សមួយនាក់មានទម្លាប់និយាយលេងច្រើន រៀនខ្សោយ រៀនយឺត។ គ្រូបង្រៀនអាចដឹកនាំសិស្សនោះឱ្យសរសេរនូវអ្វីដែលសិស្សនោះចូលចិត្តនិយាយ ដោយក្តីពេញចិត្តនិងមិនបង្ខំ។

• ការប្រែក្លាយពីទម្លាប់និយាយមកជាទម្លាប់សរសេរ សំដៅអភិវឌ្ឍបំណិនសរសរ និងរៀបចំគំនិតតាមសំណេរ។ ក្នុងដំណាក់កាលដំបូង គ្រូបង្រៀនកុំខ្វល់អំពីកំហុស ឬភាពល្អឥតខ្ចោះនៃសំណេររបស់សិស្សនោះ ។ គ្រូបង្រៀនខ្វល់តែអំពីការសរសេរ ទោះតិចក្តី ឬច្រើនក្តី។ ការស្តីបន្ទោស ទណ្ឌកម្ម ការធ្វើឱ្យសិស្សខ្មាស និងដេញសិស្សចេញពីបន្ទប់រៀន ដោយសារទម្លាប់ ឬឥរិយាបថខុសពីការចង់បានរបស់គ្រូបង្រៀន ជាការបំបាក់ទំនុកចិត្តសិស្ស។ ទន្ទឹមនោះ ការផ្ដល់ឱកាសឱ្យសិស្សរៀនយឺត ឬសិស្សចូលចិត្តនិយាយច្រើន ប៉ុន្តែមិនចូលចិត្តសរសេរ មិនចង់សរសេរ ចាប់ផ្តើមការសរសេរជាការលំបាក អ្នកគ្រូ លោកគ្រូអាចចាប់ផ្តើម ពីការសរសេរគំនិតជាប្រយោគខ្លីៗ ប៉ុន្តែកុំចប់ត្រឹមសរសេរ អ្នកគ្រូ លោកគ្រូត្រូវឱ្យសិស្សនោះរកដៃគូ ឬមិត្តរួមថ្នាក់ផ្តល់យោបល់ និងកែលម្អប្រយោគរបស់គាត់ និងបន្ថែមយោបល់កែលម្អទៅលើការសរសេររបស់គាត់។

ទី២. ការរៀនបន្តជាមួយសិស្ស ៖ គ្រូបង្រៀនបើកចិត្តរៀនបន្តជាមួយសិស្ស ជាគុណសម្បទាមួយរបស់គ្រូបង្រៀនពូកែ។ គ្រូបង្រៀនពូកែតែងលើកទឹកចិត្តសិស្សឱ្យប្រមូលព័ត៌មានកាន់តែច្រើន អភិវឌ្ឍចំណេះដឹងនិងវិជ្ជា សម្រាប់ប្រើការ ក្នុងការរៀនបន្ត និងសម្រាប់ជីវភាពប្រចាំថ្ងៃ។ លើសពីនេះ គ្រូបង្រៀនដែលមានចិត្តទូលាយ តែងបង្កបរិយាកាសឱ្យសិស្សពង្រីកសមត្ថភាពឆ្ងល់ គិត បង្កើតសំណួរ សួរ និងរកព័ត៌មាន ឬស្វែងរកចំណេះដឹងថ្មីៗពីច្រើនប្រភព។ ម៉្យាងវិញទៀត ផ្ដល់ឱកាសឱ្យសិស្សចែករំលែកចំណេះដឹងសម្បូរបែបក្នុងថ្នាក់។

មិនតែប៉ុណ្ណោះ ថ្នាក់រៀននៃយុគឧស្សាហកម្ម៤.០ ត្រូវការគ្រូបង្រៀនប្រតិបត្តិសេចក្តីពិតនៃការរៀនពេញមួយជីវិត ។ គ្រូបង្រៀនពុំមែនដឹង ចាំ ចេះ និងយល់គ្រប់យ៉ាង និងពូកែជ្រៅជ្រះជាងសិស្សគ្រប់យ៉ាងទេ។ ដូច្នេះ គ្រូបង្រៀនត្រូវត្រៀមខ្លួននិងប្រតិបត្តិទម្លាប់រៀនបន្តជាមួយសិស្ស និងរៀនពីសិស្សក្នុងយុគ នៃបច្ចេកវិទ្យាព័ត៌មាន ព្រោះសិស្សអាចសួរ Google ឬ Youtube ក្នុងមួយនាទី ឱ្យតែសិស្សស្គាល់ពាក្យបច្ចេកទេសជាភាសាអង់គ្លេសមួយពាក្យ និងអនាគត បណ្តាញអ៊ិនធឺណេតនឹងសម្បូរឯកសារជាភាសាខ្មែរ។ តើសិស្សពេញចិត្តរៀនពី Youtube ជាង ឬពេញចិត្តរៀនពីគ្រូបង្រៀនផ្ទាល់ជាងក្នុងមេរៀនខ្លះដែរឬទ? ដូច្នេះ ប្រព័ន្ធសាលារៀន ថ្នាក់រៀន និងគ្រូបង្រៀន ត្រូវស្ទាត់ជំនាញក្នុងការប្រើបច្ចេកវិទ្យាព័ត៌មាន ឧបករណ៍អ៊ិនធឺណិត និងឌីជីថល ដូចជា ទូរស័ព្ទ និងកុំព្យូទ័រ ដើម្បីបង្កបរិយាកាសថ្នាក់រៀន និងដឹកនាំសិស្សឱ្យសិស្សរៀន ដោយពេញចិត្ត និងចូលរួមយ៉ាងសកម្ម៕