ចាប់តាំងពីថ្ងៃទី៤ ខែមិថុនា ឆ្នាំ​២០១៥ ប្រទេសកម្ពុជា​បានទទួលសិទ្ធិជា​ផ្លូវ​ការ​ធ្វើជា​ម្ចាស់ផ្ទះ​នៃការប្រកួតកីឡាស៊ីហ្គេម​លើកទី៣២ និង​អាស៊ានប៉ារ៉ាហ្គេម​លើកទី១២ ។ ព្រឹត្តិការណ៍ នៃការ​ប្រកួតកីឡា​ស៊ីហ្គេម​លើកទី៣២ នឹងប្រព្រឹត្តទៅ​ចាប់ពីថ្ងៃទី៥ ខែឧសភា ឆ្នាំ​២០២៣ខាងមុខ ខណៈ​ព្រឹត្តិការណ៍ នៃការ​ប្រកួតកីឡា​អាស៊ាន​ប៉ារ៉ា​ហ្គេមលើកទី១២ គ្រោងនឹង​ប្រព្រឹត្ត​ទៅ​នៅ​ថ្ងៃទី៧ ខែមិថុនា ឆ្នាំ​២០២៣។

សម្រាប់ព្រឹត្តិការណ៍កីឡាស៊ីហ្គេមលើកទី៣២ និងព្រឹត្តិការណ៍អាស៊ាន​ប៉ារ៉ា​ហ្គេមលើកទី១២ ក្នុង​នាមជាម្ចាស់ផ្ទះ​ កម្ពុជា​បាន​រចនានិម្មិតសញ្ញា នៃព្រឹត្តិការណ៍​ប្រវត្តិសាស្រ្ត​នេះ ដោយ​រួម​មាន​ការ​បញ្ចូល​នូវ​រូបភាពសំខាន់ៗ​ដូចជា រូបអង្គវត្តពណ៌មាស និងនាគរាជដែលមានពណ៌ចម្រុះចំនួនបួន រួមមានពណ៌ បៃតង ក្រហម ខៀវ និងលឿង ។ តើនិម្មិតសញ្ញា នៃព្រឹត្តិការណ៍កីឡាស៊ីហ្គេមលើកទី៣២នេះ មានអត្ថន័យ​យ៉ាងដូចម្តេចខ្លះ?

យោង​តាមឯកសាររបស់ CAMSOC បានបង្ហាញថា និម្មិតសញ្ញានៃព្រឹត្តិការណ៍​ទាំងពីរនេះបង្កប់នូវថាមពល នៃវប្បធម៌ អរិយធម៌ អត្តសញ្ញាណជាតិដ៏ត្រចះត្រចង់របស់ខ្មែរ ដោយ​ក្នុងនោះ រូបប្រាសាទអង្គរវត្ត ជាអច្ឆរិយវត្ថុ ដែលបានដាក់បញ្ចូលទៅជាសម្បត្តិបេតិកភណ្ឌពិភពលោក ហើយ​មិនគ្រាន់តែជានិមិត្ត និងអត្តសញ្ញាណរបស់កម្ពុជាប៉ុណ្ណោះទេ ប៉ុន្តែក៏បង្ហាញពីមោទកភាព និងសេចក្ដីអំណររបស់ជនជាតិកម្ពុជាផងដែរ។ ដោយឡែក ពណ៌មាស ត្រូវបានជ្រើសរើសជាពណ៌ចម្បងនៃនិម្មិតសញ្ញា ដែលបង្ហាញថា កម្ពុជា ជាព្រះរាជាណាចក្រកំពុងរីកចម្រើនជាបន្តបន្ទាប់នៃទ្រព្យសម្បត្តិ សុខភាព និងសុភមង្គល។ រីឯ រូបនាគរាជចំនួន៤ គឺតំណាង​ជាអ្នកការពារ និងផ្ដល់នូវស្ថិរភាព សម្រាប់កម្ពុជាទាំងមូល។ ចំណែក នាគរាជ ដែលមានពណ៌ខុសគ្នាៗរួមមានពណ៌បៃតង ក្រហម ខៀវ និងលឿង វ័ណ្ណគ្នាតែមួយ គឺបញ្ជាក់អំពីសាមគ្គីភាព និងភាពទីទៃគ្នានៃសហគមន៍អាស៊ីអាគ្នេយ៍។

ដោយ​ឡែក​និមិត្តសញ្ញារូបសត្វតំណាង(Mascot) សម្រាប់ព្រឹត្តិការណ៍​ស៊ីហ្គេម គឺជានិមិត្តរូបសុភាទន្សាយញីឈ្មោលចំនួនពីរមានឈ្មោះថា “បុរី” ជាតួអង្គប្រុស និង “រំដួល” ជាតួអង្គស្ត្រី ដែលតួអង្គប្រុសដៃស្តាំកាន់ភ្លើងគប់កីឡា តួអង្គស្រ្តី សំពះស្វាគមន៍ភ្ញៀវ ហើយតួអង្គទាំងពីរបញ្ចេញទឹកមុខ និងស្នាមញញឹមខ្មែរ រួសរាយរាក់ទាក់ស្វាគមន៍យ៉ាងកក់ក្តៅ ប្រតិភូ និងភ្ញៀវ SEA Games លើកទី៣២ ឆ្នាំ២០២៣។ ចំណែកការគ្រងសម្លៀកបំពាក់ជាកីឡាករ-កីឡាការិនីគុនល្បុក្កតោ ដែលជាប្រភេទកីឡាអត្តសញ្ញាណជាតិ គឺជាប្រភេទកីឡាដែលបានចុះបញ្ជីបេតិកភណ្ឌអរូបិយជាតិពីក្រសួងវប្បធម៌ និងវិចិត្រសិល្បៈ និងបានស្នើសុំចុះបញ្ជីបេតិកភណ្ឌអរូបិយនៃមនុស្សជាតិរបស់អង្គការ UNESCO ផងដែរ។ ចំពោះខ្លឹមសារអត្ថន័យ អត្ថរសនៃ Mascot គឺជារូបសុភាទន្សាយតំណាងឱ្យតួអង្គសន្តិភាពនិយម ជាតួអង្គសុភាពរាបសារ ទន់ភ្លន់ បញ្ញាឈ្លាសវៃ យុត្តិធម៌គួរឱ្យស្រឡាញ់ នៃប្រជាជនខ្មែរគ្រប់រូប គ្រប់ជំនាន់ ពិសេសគុណសម្បត្តិ និងគុណតម្លៃដ៏ អស្ចារ្យនៃសុភាទន្សាយបានលេចត្រដែតក្នុងរឿងនិទានខ្មែរ ដែលជាអក្សរសិល្ប៍ប្រជាប្រិយខ្មែរដ៏ល្អឥតខ្ចោះ។ ម្យ៉ាងទៀត ឆ្នាំ២០២៣ គឺជាឆ្នាំថោះ ឆ្នាំសត្វទន្សាយផងដែរ។ សម្រាប់ បាវចនា «កីឡារស់ក្នុងសន្តិភាព-SPORTS LIVE IN PEACE » គឺមានអត្ថន័យស៊ីជម្រៅក្នុងគុណប្រយោជន៍នៃសន្តិភាព មានសន្តិភាពទើបកីឡាមានជីវិត កីឡាមានសកម្មភាព និងកីឡាមានការអភិវឌ្ឍ។ ជាមួយគ្នានេះដែរ SEA Games លើកទី៣២ ឆ្នាំ២០២៣ កើតមានបានដោយសារកម្ពុជាមានសន្តិភាព ជាកត្តាសត្យានុម័ត។ គ្មានសន្តិភាព គ្មានអ្វីៗទាំងអស់ គ្មានសន្តិភាព គ្មានសិទ្ធិធ្វើសកម្មភាពកីឡា គ្មានសិទ្ធិរៀបចំប្រកួតកីឡា គ្មានសន្តិភាព គ្មានការអភិវឌ្ឍ ហើយក៏គ្មាន SEA Games នៅកម្ពុជាផងដែរ៕