ថ្លែងក្នុងពិធីអបអរសាទរ​ជោគជ័យនៃការរៀបចំការប្រកួតកីឡាស៊ីហ្គេម និងអាស៊ានប៉ារ៉ាហ្គេម កាលពីរសៀលថ្ងៃទី១៧ ខែវិច្ឆិកា ឆ្នាំ២០២៣កន្លងទៅ នៅពហុកីឡដ្ឋានមរតកតេជោ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា មានប្រសាសន៍ថា សម្តេចឯកភាពលើសំណើរបស់ឯកឧត្តម​បណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា ដោយសម្រេចឱ្យកីឡាករ-កីឡាការិនី ដែលដណ្តើមបានមេដាយជូនជាតិមាតុភូមិ ក្នុងព្រឹត្តិការណ៍ប្រកួតកីឡាស៊ីហ្គេមលើកទី៣២ ជាប់សញ្ញាបត្រមធ្យមសិក្សាទុតិយភូមិ (បាក់ឌុប) ដោយស្វ័យប្រវត្តិ។

សម្តេចមហាបវរធិបតី ហ៊ុន ម៉ាណែត បញ្ជាក់បន្ថែមថា ការសម្រេចនេះ គឺជាការសមស្របមួយ ដើម្បីតបស្នងទៅនឹងការខិតខំប្រឹងប្រែងរបស់កីឡាករ កីឡាការិនីកម្ពុជា ដែលខិតខំរហូតយកបាននូវមេដាយមាស ប្រាក់ សំរិទ្ធ ជូនប្រទេសជាតិ។

សម្តេចនាយករដ្ឋមន្ត្រីបញ្ជាក់បន្ថែមថា ការលើកទឹកចិត្តដល់កីឡាករ កីឡាការិនី ដែលត្រូវប្រឡងបាក់ឌុបតាមរយៈការឱ្យជាប់ដោយស្វ័យប្រវត្តិនេះ មិនមែនជាលើកទី១ទេ ដោយកាលពីព្រឹត្តិការណ៍ប្រកួតកីឡាស៊ីហ្គេមលើកទី៣១ សម្តេចតេជោ ហ៊ុន សែន អតីតនាយករដ្ឋមន្ត្រីនៃកម្ពុជា ក៏សម្រេចឱ្យកីឡាករ កីឡាការិនីចំនួន ៨នាក់ ជាប់បាក់ឌុប ដោយស្វ័យប្រវត្តិផងដែរ។ «ល្ងាចមិញនេះ (ថ្ងៃទី២៦) ឯកឧត្តម ហង់ជួន ណារ៉ុន បានស្នើសុំគោលការណ៍ គឺចំពោះកីឡាករ កីឡាការិនីយើងចំនួន ២៦រូប ដែលបានទទួលមេដាយមាស មេដាយប្រាក់ និងសំរិទ្ធ នៅក្នុងព្រឹត្តិការណ៍ប្រកួតកីឡាស៉ីហ្គេមលើកទី ៣២ កន្លងទៅនេះ ហើយឆ្នាំនេះត្រូវប្រឡងបាក់ឌុប ហើយសុំគោលការណ៍ជាប់ដោយស្វ័យប្រវត្តិ ខ្ញុំបានចារឯកភាពល្ងាចមិញ សុំជាការលើកទឹកចិត្ត ព្រោះបងប្អូនខិតខំប្រឹងប្រែង ដើម្បីយកមេដាយជូនជាតិ ហើយខិតខំរៀនផង អ៊ីចឹងខ្ញុំគិតថាសមណាស់ហើយ ហើយកាលពីការប្រកួតស៉ីហ្គេមលើកទី៣១ យើងបានប្រគល់ជូនចំនួន៨នាក់ សម្តេចតេជោបានផ្តល់ ហើយនេះជាការលើកទឹកចិត្ត ហើយសមស្រប»។

លោកជំទាវ ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា មានប្រសាសន៍ថា​ ការសម្រេចឱ្យកីឡាករ-កីឡាការិនីចំនួន២៦រូប ដែលដណ្តើមបានមេដាយជូនជាតិមាតុភូមិក្នុងព្រឹត្តិការណ៍កីឡាស៊ីហ្គេមលើកទី៣២ ជាប់បាក់ឌុបស្វ័យប្រវត្តិ ជាឆន្ទានុសិទ្ធិរបស់រាជរដ្ឋាភិបាល។ ដោយឡែកសម្រាប់និទ្ទេស​ដែលបេក្ខជនជាកីឡាករកីឡាការិនីទាំង២៦នាក់ទទួលបានវិញ បើតាមការបញ្ជាក់របស់លោកជំទាវ ឃួន វិច្ឆិកា ក្រសួងនឹងមានការប្រជុំពិភាក្សាដោយឡែកមួយទៀត ហើយក្រសួងអប់រំ នឹងប្រកាសលទ្ធផលរួមមួយនៅថ្ងៃទី២៧ ខែវិច្ឆិកា ឆ្នាំ២០២៣ខាងមុខ។

គួរជម្រាបជូនថា តាមការគ្រោងទុកលទ្ធផលប្រឡងនឹងត្រូវប្រកាស នៅតាមមណ្ឌលប្រឡងក្នុងរាជធានីភ្នំពេញ និងខេត្តកណ្ដាល នៅរសៀលថ្ងៃទី២៧ ខែវិច្ឆិកា ឆ្នាំ២០២៣ និងនៅតាមមណ្ឌលប្រឡង ក្នុងខេត្តផ្សេងទៀត នាថ្ងៃទី២៨ ខែវិច្ឆិកា ឆ្នាំ២០២៣៕