បណ្ណាល័យសហគមន៍សួនបញ្ញា មានទីតាំងនៅភូមិ កំប៉ូវ ឃុំភ្នំសំពៅ ស្រុកបាណន់ ខេត្តបាត់ដំបង ។ បណ្ណាល័យសហគមន៍នេះ បានបើកដំណើរការកាលពីឆ្នាំ២០១៨ ដើម្បីផ្តល់ឱកាសដល់ កុមារ និងយុវជននៅក្នុងសហគមន៍ បានទទួលចំណេះដឹងតាមរយៈការអានសៀវភៅ និងកម្មវិធីផ្សេងៗ។ តែគួរ​ឱ្យសោកស្តាយ​បណ្ណាល័យមួយនេះបានបិទទៅវិញកាលពីឆ្នាំ២០២០ កំឡុងនៃការរីករាលដាលជំងឺកូវីដ១៩។

លោកស្រី សៀង ចាន់រ៉ា អ្នកអាណាព្យាបាលសិស្ស រស់នៅក្នុងភូមិកំប៉ូវ មានប្រសាសន៍ថា កាលដើមឡើយក្មេងៗនៅក្នុងតំបន់នេះ ភាគច្រើនចូលចិត្តលេងទូរស័ព្ទដៃ ប៉ុន្តែ​ចាប់តាំងពីបណ្ណាល័យសហគមន៍សួនបញ្ញា បានបើកដំណើរការ លោកស្រីសង្កេតឃើញថា ក្មេងៗបានចាប់អារម្មណ៍មកអានសៀវភៅនៅបណ្ណាល័យ ដោយកាត់បន្ថយការលេងទូរស័ព្ទ ហើយមើលទៅពួកគេ​ហាក់ខិតខំរៀន ក៏ដូចជាចូលចិត្តអានសៀវភៅ។

លោកស្រី បញ្ជាក់ថា គាត់ចង់ឱ្យបណ្ណាល័យសហគមន៍ សួន បញ្ញា នេះបើកឡើងវិញ ដើម្បីជួយឱ្យកុមារ សិស្សានុសិស្ស និងយុវជន បានមករៀនសូត្រ អានសៀវភៅ ព្រោះមានទីតាំងនៅជិតផ្ទះ។ លោកស្រី​ បន្តថា ការដែលមានបណ្ណាល័យសហគមន៍សួនបញ្ញា នៅក្នុងសហគមន៍ គឺល្អ ក្មេងៗក្រោយពេលចេញពីរៀនគាត់មកអានសៀវភៅជុំគ្នា។

«ក្នុងសហគមន៍ខ្ញុំនេះមានតែបណ្តាល័យ សួន បញ្ញា នេះដែលខ្ញុំយកកូនខ្ញុំមកអានសៀវភៅ និងមកលេង។ ខ្ញុំចង់ឱ្យបណ្ណាល័យនេះដំណើរការដូចដើមវិញ»។

លោកស្រី សៀង ចាន់រ៉ា អ្នកអាណាព្យាបាលសិស្ស

យុវជន នឿន ទិត្យសត្យា សិស្សថ្នាក់ទី៩ នៅអនុវិទ្យាល័យសម្តេចឪសម្តេចម៉ែ ស្ថិតក្នុងស្រុកបាណន់ ខេត្តបាត់ដំបង បានប្រាប់ឱ្យដឹងថា​ នៅពេលទំនេរពីការសិក្សានៅសាលារៀនរូបគេតែងតែមកអានសៀវភៅនៅបណ្ណាល័យសហគមន៍សួនបញ្ញា ជាពិសេសនៅពេលមានកម្មវិធីនៅបណ្ណាល័យ។

យុវជន នឿន ទិត្យសត្យា បន្តថា បន្ទាប់ពីបណ្ណាល័យបិទដំណើរការរូបគេមិនបានមកអានសៀវភៅដូចពេលមុនទៀតឡើយ។ ទន្ទឹមគ្នានេះ ប្រសិនបើបណ្ណាល័យសហគមន៍សួនបញ្ញា បើកដំណើរការឡើងវិញនោះគេមានឱកាសអានសៀវភៅ ចូលរួមកម្មវិធីបណ្ណាល័យផ្សេង ដើម្បីទទួលបានចំណេះដឹងបន្ថែម។

កញ្ញា យ៉ែម បញ្ញា សហស្ថាបនិកបណ្ណាល័យសហគមន៍សួនបញ្ញា បាននិយាយថា ការដំណើរការបណ្ណាល័យនៅតាមសហគមន៍ គឺប្រឈមនឹងបញ្ហាជាច្រើន ជាពិសេសកាលពីអំឡុងវិបត្តិជំងឺកូរីដ១៩ ដែលជាហេតុនាំឱ្យបណ្ណាល័យនេះមិនអាចបន្តដំណើរការទៅមុខបាន។ ប៉ុន្តែក្រោយពីមានកិច្ចគាំទ្រទាំងនេះ កញ្ញា បានប្រកាសប្តេជ្ញាចិត្តថា នឹងបើកដំណើរការបណ្ណាល័យសហគមន៍នេះឡើងវិញ នៅក្នុងពេលឆាប់ៗ ដើម្បីបន្តបេសកម្មរបស់ខ្លួន ដែលតាមរយៈបណ្ណាល័យនេះ អាចឱ្យយុវជន និងកុមារនៅស្រុកកំណើតទទួលបានចំណេះដឹងពីការអានសៀវភៅ។

បើទោះជាបណ្ណាល័យមិនទាន់បើកដំណើរការឡើងវិញក៏ដោយ តែកញ្ញា បញ្ញា បានអះអាងថា ក្រុមយុវជន និង​កុមារ តែងគៀងគរគ្នាមកជួបជុំគ្នា ដើម្បីអានសៀវភៅម្តងម្កាលដែរ ។ កញ្ញា រំពឹងថា សាធារណជននឹងបន្តគាំទ្រដល់បណ្ណាល័យសហគមន៍សួនបញ្ញា បន្តទៀតទាំងសម្ភារៈ និង​ស្មារតី។

លោក សុខ ឡាក់ សហស្ថាបនិកសៀវភៅមួយសហគមន៍មួយ និងជាស្ថាបនិកបណ្តាល័យបញ្ញវន្ត លើកឡើងថា កាលពីពេលថ្មីៗនេះ លោកនិងក្រុមការងារបានរៀបចំបេសកម្មរយៈពេល២ថ្ងៃមកកាន់ខេត្តបាត់ដំបង ដោយមានគោលដៅដើម្បីចែករំលែកសៀវភៅសម្ភារៈសិក្សា និងចែករំលែកក្តីស្រលាញ់ទៅដល់កុមារ និងយុវជននៅក្នុងសហគមន៍ដោយផ្ទាល់ ។ លោកថា គោលដៅសំខាន់ក្នុងបេសកកម្មនោះ គឺដើម្បីគាំទ្របណ្ណាល័យតាមសហគមន៍ ក៏ដូចជាបណ្ណាល័យសហគមន៍សួនបញ្ញា ដើម្បីអាចដំណើរការបណ្ណាល័យឡើងវិញ។

«យើងដាក់សៀវភៅបន្ថែមឱ្យពួកគាត់ ដើម្បី​ឱ្យពួកគាត់មានសមត្ថភាព ឬសៀវភៅច្រើនជាជម្រើសដល់សាធារណជន និងក្មេងៗ។ យើងក៏មកសិក្សាបន្ថែម ព្រោះក្នុងអំឡុងកូវីដ-១៩ មានបណ្តាល័យមួយចំនួនមិនដំណើរការទេ។ ដូច្នេះ យើងនឹងជជែកគ្នាដើម្បីផ្តល់ការគាំទ្រពួកគាត់ឱ្យដំណើរការបណ្ណាល័យឡើងវិញ»

លោក សុខ ឡាក់ សហស្ថាបនិកសៀវភៅមួយសហគមន៍មួយ

សម្រាប់ កញ្ញា យ៉ែម បញ្ញា សហស្ថាបនិកបណ្ណាល័យសហគមន៍សួនបញ្ញា ថា ការចុះមកដល់ផ្ទាល់របស់ក្រុមការងារយុទ្ធនាការសៀវភៅមួយសហគមន៍មួយ គឺជាគុណប្រយោជន៍មួយដែលពួកគាត់អាចយកសំឡេងជាបណ្ណាល័យ ឬជាសៀវភៅនេះមកដល់សហគមន៍ ជាពិសេសក្មេងៗនៅតាមតំបន់ជនបទ។ ទន្ទឹមគ្នានេះ នៅពេលសហគមន៍ឃើញសកម្មភាពនៃការគាំទ្រនេះ អាចបង្ហាញឱ្យយុវជនបានផ្សារភ្ជាប់គ្នាដើម្បីលើកកម្ពស់ការអាននៅកម្ពុជា។

គួរជម្រាបជូនថា គិតត្រឹមឆ្នាំ២០២៣ កន្លងមកនេះ យុទ្ធនាការសៀវភៅមួយសហគមន៍មួយ បានចូលរួមគាំទ្រដល់សហគមន៍នៅទូទាំងប្រទេស បានបង្កើតបណ្ណាល័យសហគមន៍ចំនួន ២៨កន្លែង ខណៈឆ្នាំ២០២៤នេះ បេសកម្មយុទ្ធនាការសៀវភៅមួយសហគមន៍មួយ គ្រោងពង្រីងបណ្ណាល័យនៅទូទាំងប្រទេសឱ្យបានដល់ទៅ ៦០កន្លែង៕