ក្រសួងអប់រំ យុវជន និ​ងកីឡា អាចនឹងប្រកាស​លទ្ធផលនៃការប្រឡងសញ្ញាបត្រមធ្យមសិក្សា​ទុតិយភូមិ ឬបាក់ឌុបភ្លាមៗ ពោលគឺមុនកាលកំណត់ ប្រសិនបើដំណើរការកំណែសន្លឹកកិច្ចការ និង​បូកស្រង់ពិន្ទុបេក្ខជន រួចរាល់មុនការគ្រោងទុក។ នេះ​បើតាម​ប្រសាសន៍លើកឡើងរបស់លោកជំទាវបណ្ឌិត ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា ។

បច្ចុប្បន្នដំណើរការកំណែ កំពុងតែប្រព្រឹត្តទៅយ៉ាងមមារញឹកនៅតាមមណ្ឌលកំណែទាំង១០ ក្រោមការដឹកនាំរបស់ប្រធានមណ្ឌល ប្រធានអនុ ដើម្បីធ្វើកំណែមុខវិជ្ជាទាំង១០ នៅក្នុងការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ៖ ០៦ វិច្ឆិកា ២០២៣។ លោកជំទាវបណ្ឌិត ឃួន វិច្ឆិកា មានប្រសាសន៍ថា នៅពេលដែលលទ្ធផលការងារកំណែសន្លឹកកិច្ចការ និងបូកស្រង់ពិន្ទុបេក្ខជនប្រឡងបាក់ឌុបបញ្ចប់រួចរាល់ ក្រសួងអប់រំ យុវជ​ និងកីឡា នឹងប្រកាសលទ្ធផលភ្លាមៗដូចគ្នា ដោយមិនបង្កកទុកលទ្ធផលយូរនោះទេ ដើម្បីរក្សាឱ្យដំណើរការកែសន្លឹកកិច្ចការនេះឱ្យមានតម្លាភាព និងលទ្ធផលទទួលយកបាន។

អ្នកនាំពាក្យក្រសួងអប់រំ បញ្ជាក់បន្ថែមថា សម្រាប់ដំណើរការកំណែសន្លឹកកិច្ចការបេក្ខជនប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប នៅតាមមណ្ឌលកំណែទាំង១០ មកដល់ត្រឹមថ្ងៃនេះ ឃើញថា ដំណើរការកំណែសន្លឹកកិច្ចការប្រប្រឹត្តទៅបានល្អ មិនមានឧបទ្ទវហេតុមិនប្រក្រតីណាមួយគួរឱ្យកត់សម្គាល់នោះឡើយ។ ដោយឡែក សម្រាប់ថ្ងៃស្អែកនេះ (១៥ វិច្ឆិកា) នឹងបញ្ចប់ដំណើរការកែ ហើយឈានចូលដំណាក់កាលថ្មីមួយទៀត គឺដំណើរការបូកស្រង់ពិន្ទុ។

“សម្រាប់ដំណើរការបូកស្រង់ លោកគ្រូ អ្នកគ្រូ ជាសមាជិកក្រុមកំណែមុខវិជ្ជាទាំង១០ ខិតខំបំពេញការងារប្រកបដោយការទទួលសុខត្រូវ ហើយមិនមានឈប់សម្រាកសូម្បីតែថ្ងៃសៅរ៍ ឬថ្ងៃអាទិត្យ”។

លោកជំទាវបណ្ឌិត ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា

លោកជំទាវបណ្ឌិត បន្តថា តាមការគ្រោងទុកការប្រកាសលទ្ធផលប្រឡងបាក់ នឹងធ្វើនៅថ្ងៃទី២៨ ខែវិច្ឆិកា ឆ្នាំ២០២៣ សម្រាប់រាជធានីភ្នំពេញ និងថ្ងៃទី២៩ ខែវិច្ឆិកា ឆ្នាំ២០២៣ សម្រាប់បណ្ដាខេត្ត ប៉ុន្តែប្រសិនបើក្រសួងរៀបចំរួចរាល់អាចប្រកាសលទ្ធផលបាន ក្រសួងនឹងរៀបចំប្រកាសលទ្ធផលមុនការគ្រោងទុក។

បើយោងតាមកាលវិភាគ នៃការប្រឡងសញ្ញាបត្រមធ្យមសិក្សាទុតិយភូមិឆ្នាំសិក្សា​២០២២-២០២៣នេះ ដំណើរការកំណែប្រព្រឹត្តទៅចាប់ពីថ្ងៃទី០៩ ដល់ថ្ងៃទី១៥ ខែវិច្ឆិកា ឆ្នាំ២០២៣ ហើយដំណើរស្រង់បូកពិន្ទុ ដោយកុំព្យូទ័រ និង​ផ្ទៀងផ្ទាត់ពិន្ទុ ចាប់ពីថ្ងៃទី១៦ ដល់ថ្ងៃទី២៦ ខែវិច្ឆិកា ឆ្នាំ២០២៣៕