លោកស្រី ស្រី ផង់ពុទ្ធី នាយកសាលានៃវិទ្យាស្ថានពហុបច្ចេកទេស ភូមិភាគតេជោសែនសៀមរាប បានមានប្រសាសន៍ថា កម្មវិធីបណ្តុះបណ្តាលជំនាញបច្ចេកទេសវិជ្ជាជីវៈរបស់ថ្នាក់ដឹកនាំរាជរដ្ឋាភិបាល មិនត្រឹមតែជួយកាត់បន្ថយភាពក្រីក្រ និងផ្តល់ជំនាញច្បាស់លាស់ដល់និស្សិតប៉ុណ្ណោះទេ ថែមទាំងជាយុទ្ធសាស្ត្រដ៏មុតស្រួចដើម្បីប្រែក្លាយកម្ពុជា ទៅជាប្រទេសមានប្រាក់ចំណូលមធ្យមកម្រិតខ្ពស់នៅឆ្នាំ២០៣០ និងកម្រិតខ្ពស់នៅឆ្នាំ២០៥០។

លោកស្រី ស្រី ផង់ពុទ្ធី បានលើកឡើងថា វគ្គបណ្តុះបណ្តាលបច្ចេកទេសនិងវិជ្ជាជីវៈ ជាកម្មវិធីមួយរួមចំណែកធ្វើឱ្យប្រសើរឡើងនូវកំណើនសេដ្ឋកិច្ចកម្ពុជា គិតគូដល់ប្រជាពលរដ្ឋក្រីក្រ និងគ្រួសាររងហានិភ័យ ដោយសិក្សាឥតគិតថ្លៃ និងផ្តល់ប្រាក់ឧបត្ថម្ភ។ ម្យ៉ាងវិញទៀត ថ្នាក់ដឹកនាំបានផ្តោតលើចំណេះនិងជំនាញច្បាស់លាស់ ស្របតាមលំហរនៃទីផ្សារសកល។

មធ្យោបាយមួយ ជួយឱ្យយុវជនអាចចាប់យកជំនាញការងារ និងចូលរួមការអភិឌ្ឍន៍សង្គម សេដ្ឋកិច្ច ព្រមទាំងជាស្ពានសម្រាប់ជីវិត… កាលណាមានជំនាញ ដូចមានលុយក្នុងហោប៉ៅ ម្យ៉ាងអាចយកជំនាញទៅគ្រប់ទីកន្លែង និងធ្វើឱ្យជីវភាពកាន់តែប្រសើរឡើង

លោកស្រី ស្រី ផង់ពុទ្ធី នាយកសាលានៃវិទ្យាស្ថានពហុបច្ចេកទេស ភូមិភាគតេជោសែនសៀមរាប

សម្រាប់លោក ហាវ ធិន នាយកវិទ្យាស្ថានពហុបច្ចេកទេសខេត្តកំពង់ចាម លើកឡើងដូចគ្នាដែរថា កម្មវិធីបណ្តុះបណ្តាលជំនាញវិជ្ជាជីវៈនិងបច្ចេកទេស ដែលជ្រោមជ្រែងដោយថ្នាក់ដឹកនាំរាជរដ្ឋាភិបាល គឺក្នុងគោលបំណងជួយសម្រួលនិស្សិតមកពីគ្រួសារក្រីក្រ និងគ្រួសាររងហានិភ័យ និងផ្តល់ជំនាញជាក់លាក់មួយដល់យុវជន ដើម្បីជាយាន្តចូលប្រលូកក្នុងទីផ្សារការងារ។

លោកថា ការបណ្តុះបណ្តាលជំនាញវិជ្ជាជីវៈនិងបច្ចេកទេស ទៅដល់យុវជន ជាយុទ្ធសាស្រ្តដ៏មានសក្តានុពលមួយរបស់រាជរដ្ឋាភិបាលនៃកម្ពុជា ដើម្បីជម្រុញឱ្យយុវជនមានជំនាញវិជ្ជាជីវៈផ្ទាល់ខ្លួនសម្រាប់ជីវិត ក្នុងការស្វែងរកការងារសមរម្យ លើកកម្ពស់ជីវភាពគ្រួសារ និងសេដ្ឋកិច្ចប្រទេសជាតិ។

យុវជនមានឱកាសល្អណាស់ ក្នុងការចាប់យកជំនាញជាក់លាក់ ដែលជាតម្រូវការទីផ្សារការងារខ្ពស់

លោក ហាវ ធិន នាយកវិទ្យាស្ថានពហុបច្ចេកទេសខេត្តកំពង់ចាម

យ៉ាងណាម៉ិញ លោក ហាវ ធិន ក៏បានអំពាវនាវឱ្យយុវជនទាំងអស់ ចេះចាប់យកឱកាសមាស ឱកាសប្រាក់ ដែលរាជរដ្ឋាភិបាលបានដាក់ជាគោលនយោបាយ ដើម្បីធ្វើការបណ្តុះបណ្តាលជំនាញទៅដល់យុវជនមកពីគ្រួសារក្រីក្រ និងគ្រួសាររងហានិភ័យទូទាំងប្រទេស។

កាលពីថ្ងៃទី១៤ ខែវិច្ឆិកា ឆ្នាំ២០២៣ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃកម្ពុជា បានដាក់ឱ្យអនុវត្តជាផ្លូវការនូវការបណ្តុះបណ្តាលជំនាញវិជ្ជាជីវៈ និងបច្ចេកទេសដល់គ្រួសារក្រីក្រ និងគ្រួសារងាយរងហានិភ័យ ចំនួន ១លាន ៥ សែននាក់ សិក្សាដោយឥតគិតថ្លៃ និងទទួលបានប្រាក់ឧបត្ថម្ភប្រចាំខែ ២៨ម៉ឺនរៀល រយៈពេល ៤ខែ។

យោង​តាមរបាយការណ៍របស់ក្រសួងការងារ និង​បណ្តុះបណ្តាលវិជ្ជាជីវៈ គិត​ត្រឹម​ថ្ងៃទី៣ ខែមករា ឆ្នាំ២០២៤ មានយុវជន​សរុប​ចំនួន ១៩ ៨៨៦នាក់ បានចុះឈ្មោះចូលរៀនជំនាញបច្ចេកទេស តាមកម្មវិធីបណ្តុះបណ្តាល ១.៥លាននាក់ ដោយក្នុងនោះ នៅ​រាជធានីភ្នំពេញ​មានចំនួន ៧ ៧២៧នាក់ (ស្រី ២ ៥៣២នាក់), បាត់ដំបង ២ ៤៥១នាក់ (ស្រី ១០៦៥នាក់), សៀមរាប ១ ៣៦០នាក់ (ស្រី ២៨២នាក់), កណ្តាល ៧៤៣នាក់ (ស្រី ២១៤នាក់), ព្រះសីហនុ ៧០៤នាក់ (ស្រី ២៣៧នាក់), និងបណ្ដាខេត្តផ្សេងៗចំនួន ៦ ៩០១នាក់ (ស្រី ២ ៤៨៥នាក់)។

ដោយឡែកវិស័យដែលយុវជនបានចុះឈ្មោះចូលរៀនវិញ​រួមមាន ៖ វិស័យសំណង់សរុបចំនួន ២ ៩៨៩នាក់ (ស្រី ៤៤៧នាក់), អគ្គិសនី និងថាមពល ៦០៩នាក់ (ស្រី ៦៧នាក់), អេឡិចត្រូនិក ៤៤២នាក់ (ស្រី ៦៥នាក់), កម្មន្តសាល ១៤៣នាក់ (ស្រី ៩នាក់), មេកានិចទូទៅ/មេកានិចរថយន្ត ៣ ០៤៤នាក់ (ស្រី ១៣៩នាក់), ធុរកិច្ច និងព័ត៌មានវិទ្យា ៦ ៤១០នាក់ (ស្រី ៣ ៣៨០នាក់) , សេវាកម្ម ១ ១៦២នាក់ (ស្រី ៩៩៤នាក់), បរិក្ខារត្រជាក់ និងកម្តៅ ២៩៧២នាក់ (ស្រី ១០៣នាក់), ទេសចរណ៍ ១ ១៣០នាក់ (ស្រី ៨៤០នាក់), និងកសិកម្ម និងកសិ-ឧស្សាហកម្ម ៩៨៥នាក់ (ស្រី ៧៧១នាក់)៕