សាលារៀនចំនួន៦ ក្នុង​ចំណោម​សាលា​រៀនចំនួន៣៥ បានក្លាយជា​ម្ចាស់ជ័យលាភី ជា “សាលាមេត្រីបរិស្ថាន” ក្នុងឆ្នាំ២០២៥នេះ ដោយ​រួមមានវិទ្យាល័យ​ចំនួន២ អនុវិទ្យាល័យចំនួន២ និង​សាលា​បឋមសិក្សា​ចំនួន២។

ក្នុងចំណោម​សាលា​រៀនទាំង៦ដែលឈ្នះជ័យលាភី សាលាមេត្រីបរិស្ថាន នេះ មានសាលារៀនចំនួន២ បានឈ្នះពានជ័យលាភីកម្រិតមាស, សាលារៀន២ទៀត ឈ្នះពានជ័យលាភីកម្រិតប្រាក់ និងពានជ័យលាភីកម្រិតសំរិទ្ធ ចំនួន២សាលា។

ឯកឧត្តម អ៊ាង សុផល្លែត រដ្ឋមន្រ្តីក្រសួងបរិស្ថាន បានសម្តែង​ការ​អបអរ​ដល់សាលារៀនទាំង៦ដែលបានទទួលជ័យលាភី ហើយ​លើកទឹកចិត្ត​ដល់សាលារៀន​ដែល​មិន​ទាន់ជាប់ ឱ្យ​បន្តការ​ខិតខំប្រឹងប្រែង​ដើម្បីបុព្វហេតុនិរន្តរភាពបរិស្ថាន និង​ការ​បណ្តុះបណ្តាល​យុវជន​ស្របតាមសសរត្តម្ភ ៣ នៃយុទ្ធសាស្រ្តចក្រា​វិស័យបរិស្ថាន គឺ ភាពស្អាត ភាពបៃតង និងចីរភាព នៅ​តាមសាលារៀន និង​នៅ​ក្នុងសហគមន៍​ជុំវិញ​ ដោយផ្តើមចេញពីភាពស្អាត និង​ភាពបៃតង​នៅ​ក្នុង​ចិត្ត​របស់យើងម្នាក់ៗជាមុន។

ឯកឧត្តមបន្តថា កិច្ចសហការដ៏ល្អរវាងសហគមន៍ និងអាជ្ញាធរមូលដ្ឋាន គឺដើម្បី​ធានាការអប់រំប្រកបដោយប្រសិទ្ធភាព និងការអភិវឌ្ឍប្រកបដោយនិរន្តរភាព ព្រោះ​បញ្ហាបរិស្ថានគឺជាបញ្ហាអន្តរវិស័យ ដូច្នេះការចូលរួមពីគ្រប់ក្រសួង ស្ថាប័ន និងភាគីពាក់ព័ន្ធ គឺចាំបាច់ដើម្បីសម្រេចបានកម្ពុជាមានភាព «ស្អាត» «បៃតង» និង «ចីរភាព»។

ជាមួយគ្នានេះ ឯកឧត្តមរដ្ឋមន្រ្តី ក៏បានថ្លែងអំណរគុណយ៉ាងជ្រាលជ្រៅចំពោះ ឯកឧត្តមបណ្ឌិតសភាចារ្យ ហង់ ជួនណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា និង ឯកឧត្ដមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងថ្នាក់ដឹកនាំ មន្រ្តីរាជការក្រសួង ស្ថាប័នពាក់ព័ន្ធ ដែលបានគាំទ្រ និងផ្តល់កិច្ចសហការយ៉ាងល្អក្នុងការជំរុញចលនាសាលាមេត្រីបរិស្ថាននៅកម្ពុជា។

“សាលាមេត្រីបរិស្ថាន” គឺជាសាលាដែលលើកកម្ពស់គុណតម្លៃនៃការអនុវត្តចីរភាពបរិស្ថាន តាមរយៈការកសាងជាសាលាស្អាត បៃតង និងមានបរិយាកាសសិក្សាល្អ សម្រាប់បម្រើដល់ផលប្រយោជន៍របស់សាលារៀន សហគមន៍ និងសង្គមទាំងមូល។ ការប្រឡងប្រណាំងនេះ ត្រូវបានរៀបចំឡើងជារៀងរាល់ពីរឆ្នាំម្តង ដោយផ្តើមដំបូងកាលពីឆ្នាំ២០១៧។

នៅក្នុងឆ្នាំ២០២៥នេះ មានសាលារៀនចំនួន ៣៥ មកពីបណ្តាខេត្តចំនួន ១៧ បានដាក់ពាក្យចូលរួមប្រកួត ដោយ​បាន​ឆ្លងកាត់ការវាយតម្លៃជាដំណាក់កាលធំៗ ក្នុងនោះទី១ ការប្រកាសជូនដំណឹងរយៈពេល ១ ខែ, ទី២ ការជ្រើសរើសរបស់មន្ទីរបរិស្ថានខេត្ត (២ សាលា/ខេត្ត) ដោយផ្អែកលើ ការរៀបចំ «ភាពស្អាត» និង «ភាពបៃតង» និងការចូលរួមយុទ្ធនាការគំរូរបស់ក្រសួង ដូចជា «ថ្ងៃនេះ ខ្ញុំមិនប្រើថង់ប្លាស្ទិកទេ» «កម្ពុជាស្អាត ខ្មែរធ្វើបាន» «យុទ្ធនាការពន្លកបៃតង» ជាដើមឈើជាដើម។ ដំណាក់កាលទី៣ គឺការត្រួតពិនិត្យ និងវាយតម្លៃដោយ​នាយកដ្ឋាន​អប់រំបរិស្ថាន ផ្អែកលើលក្ខណៈវិនិច្ឆ័យ ៤ ចំណុច៖ (១) គោលការណ៍ និងរដ្ឋបាល, (២) ការបង្រៀន និងសកម្មភាពអប់រំបរិស្ថាន, (៣) សម្ភារៈបរិក្ខាអប់រំបរិស្ថាន, និង (៤) ភាពជាដៃគូជាមួយអ្នកពាក់ព័ន្ធ។ ហើយដំណាក់កាលទី៤ ការប្រគល់បណ្ណ និងពានជ័យលាភីសាលាមេត្រីបរិស្ថាន៕