ឆ្លៀត​ក្នុងឱកាស​កម្មវិធី «រត់ដើម្បីលើកកម្ពស់ការបំបៅកូនដោយទឹកដោះម្តាយ» កាលពីពេលថ្មីៗនេះ លោកជំទាវសាស្រ្តាចារ្យ អ៊ឹម សិទ្ធិការ្យ រដ្ឋលេខាធិការក្រសួងសុខាភិបាល មានប្រសាសន៍លើកឡើងថា ដើម្បីឱ្យម្តាយអនុវត្តន៏បាននូវការបំបៅដោះកូនមានប្រសិទ្ធភាពខ្ពស់ បុគ្គលិកមណ្ឌលសុខភាពទាំងអស់ត្រូវចាប់ផ្តើមផ្តល់ប្រឹក្សាការបំបៅកូនដោយទឹកដោះម្តាយនៅពេលស្ត្រីមកពិនិត្យផ្ទៃពោះលើកទី១ និងបន្តផ្តល់ប្រឹក្សាការបំបៅកូនដោយទឹកដោះម្តាយរាល់ពេលស្រ្តីមកពិនិត្យរៀងរាល់លើក។

បើតាម​ប្រសាសន៍លោកជំទាវសាស្រ្តាចារ្យ ទឹកដោះម្តាយ មានគុណតម្លៃមហាសាល ដូច្នេះហើយ​ទើបក្រសួងសុខាភិបាល បានដាក់ចេញ​នូវ​គោលនយោបាយចំនួនបីក្នុងការជំរុញលើកកម្ពស់ គាំទ្រ និងការពារ ការបំបៅកូនដោយទឹកដោះម្តាយ រួមមាន ទី១ ការចាប់ផ្តើមបំបៅកូនដោយទឹកដោះម្តាយភ្លាមក្នុងអំឡុងម៉ោងដំបូងបន្ទាប់ពីសម្រាល, ទី២​ ការបំបៅកូនដោយទឹកដោះម្តាយតែមួយមុខគត់រយៈពេល៦ខែដំបូងនៃជីវិត និងទី៣ បន្តបំបៅកូនដោយទឹកដោះម្តាយរហូតកុមារអាយុ២ឆ្នាំឬលើស ជាមួយនឹងការផ្តល់អាហារបន្ថែមនៅពេលកុមារមានអាយុចាប់ពី៦ខែឡើងទៅ ដោយផ្តល់អាហារដែលមានសារជាតិចិញ្ចឹមគ្រប់គ្រាន់ និងមានសុវត្ថិភាពសមស្របតាមអាយុរបស់កុមារ។

បើតាមការស្ទង់មតិប្រជាសាស្រ្ត និងសុខភាពកម្ពុជា បានបង្ហាញថា អត្រា​នៃ​ការ​បំបៅ​កូន​ដោយ​ទឹកដោះតែមួយ​មុខគត់ បាន​ធ្លាក់​ចុះពី ​៧៤% ក្នុងឆ្នាំ២០១០ មកនៅត្រឹម ៦៥% ក្នុងឆ្នាំ ២០១៤ និងបន្តធ្លាក់ចុះមកនៅត្រឹម ៥០% នៅឆ្នាំ២០២១-​២០២២។ ការធ្លាក់ចុះនៃការបំបៅកូនដោយទឹកដោះម្តាយតែមួយមុខគត់នេះ គេ​បានរកឃើញថា គឺមានការរួមចំណែកមួយផ្នែកពីការកើនទ្បើងនៃការប្រើប្រាស់ផលិតផលជំនួសទឹកដោះម្តាយ និងការបោះបង់ការបំបៅកូនដោយទឹកដោះម្តាយនៅពេលស្រ្តីជាម្តាយត្រឡប់ចូលធ្វើការវិញបន្ទាប់ពីការលំហែមាតុភាព។

ដើម្បី​ឱ្យ​ការ​បំបៅកូនដោយទឹកដោះម្តាយនៅតែអាចបន្ត លោកជំទាវសាស្រ្តាចារ្យ អ៊ឹម សិទ្ធិការ្យ លើកឡើងថា ជាទូទៅនៅពេលការបំបៅកូនដោយទឹកដោះម្តាយបានរយៈពេលបីខែ ស្រ្តីជាម្តាយត្រូវត្រឡប់ចូលធ្វើការវិញ ដូច្នេះស្ត្រីត្រូវមានចំណេះដឹងលើរបៀបច្របាច់ និងរក្សាទុកទឹកដោះម្តាយសម្រាប់បំបៅកូន។ នៅពេលកុមារអាយុបាន៦ខែ ម្តាយត្រូវបន្តបំបៅកូនដោយទឹកដោះម្តាយជាមួយនឹងការផ្តល់អាហារបន្ថែមមានសារជាតិចិញ្ចឹមគ្រប់គ្រាន់ និងមានសុវត្ថិភាព។

លោកជំទាវសាស្រ្តាចារ្យ អ៊ឹម សិទ្ធិការ្យ បញ្ជាក់ថា ប្រសិនបើម្តាយបានយល់ច្បាស់ពីគុណតម្លៃ និងផលប្រយោជន៍ នៃការបំបៅកូនដោយទឹកដោះម្តាយនៅអំឡុងការពិនិត្យផ្ទៃពោះលើកទីមួយ និងជាបន្តបន្ទាប់ ស្រ្តីពិតជាបំបៅកូនដោយទឹកដោះម្តាយ និងមិនបំបៅដោយទឹកដោះគោម្សៅនោះទេ ព្រោះពួកគេចង់បានទារកមានសុខភាពល្អ។

កញ្ញា ពេជ្រ រដ្ឋា មន្រ្តីសុខាភិបាល នៃមន្ទីរសុខាភិបាលខេត្តស្ទឹងត្រែង ផ្នែកគាំពារមាតា និងទារក លើកឡើងថា​ ការបំបៅកូនដោយទឹកដោះម្តាយ ពិតជាមានសារៈសំខាន់ ព្រោះទឹកដោះម្ដាយមានសារធាតុចិញ្ចឹមគ្រប់គ្រាន់សម្រាប់ទារកប្រសិនបើម្ដាយមានសុខភាពល្អ។ ការបំបៅកូនដោយទឹកដោះម្តាយ ធ្វើឱ្យកូនមានភាពស្និទស្នាល មានការលូតលាស់បានល្អ។ លើសពីនេះ ការពារទាំងម្ដាយ និងកូន ជួយកាត់បន្ថយមហារីសុដន់ ហើយប្រសិនម្ដាយមិនបានបំបៅកូនដោយទឹកដោះម្ដាយ នោះអត្រាប្រឈមបញ្ហាមហារីសុដន់ខ្ពស់ កូនងាយនឹងឈឺ។

កញ្ញា ពេជ្រ រដ្ឋា បន្ថែមថា នៅពេលចុះតាមមូលដ្ឋាន ឬសហគមន៍ កញ្ញាតែងតែផ្តល់ប្រឹក្សាការបំបៅកូនដោយទឹកដោះម្តាយនៅរាល់លើកដែលបានជួបស្រ្តីមានផ្ទៃពោះ ឬស្រ្តីទើបសម្រាលរួច ព្រមទាំងពន្យល់ដល់ស្រ្តីមុនមានផ្ទៃពោះ ដើម្បីត្រៀមខ្លួនក្នុងការបំបៅកូនដៅយទឹកដោះម្ដាយ។ កញ្ញា រដ្ឋា លើកឡើងថា ការផ្ដល់ប្រឹក្សានេះ ពិតជាជំរុញលើកទឹកចិត្តអ្នកម្ដាយឱ្យបំបៅកូនដោយទឹកដោះម្ដាយ ព្រោះស្រ្តីជាម្ដាយបានយល់ច្បាស់ពីអត្ថប្រយោជន៍នៃទឹកដោះម្ដាយ និងចង់បំបៅកូនដោយទឹកដោះម្ដាយ៕