ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
កម្មវិធីផ្តល់អាហារតាមសាលារៀនដោយប្រើប្រាស់កសិផលក្នុងសហគមន៍ ដែលកំពុងអនុវត្តនៅសាលារៀនគោលដៅប្រមាណជាង១ពាន់សាលា គ្រោងនឹងត្រូវពង្រឹងបន្ថែមឱ្យក្លាយទៅជាយន្តការស្តុកទុកស្បៀង ដើម្បីធានាស្បៀងគ្រប់គ្រាន់សម្រាប់ការនៅពេលមានគ្រោះអាសន្នកើតឡើង។
ក្នុងឱកាសចុះពិនិត្យទីតាំងដើម្បីត្រៀមរៀបចំដំណើរទស្សនកិច្ចនៅសាលារៀន នៃកម្មវិធីផ្តល់អាហារតាមសាលារៀនដោយប្រើប្រាស់កសិផលក្នុងសហគមន៍ ដែលគ្រោងនឹងប្រព្រឹត្តទៅក្រោមអធិបតីភាព លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ក្នុងពេលខាងមុខនេះ ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា មានប្រសាសន៍ថា ការអនុវត្តកម្មវិធីផ្តល់អាហារតាមសាលារៀន បានបង្ហាញជាសាធារណៈអំពីឆន្ទៈរបស់រាជរដ្ឋាភិបាល ក្នុងការរួមចំណែកដល់ការកសាងមូលធនមនុស្ស ពិសេសការគិតគូរយ៉ាងហ្មត់ចត់អំពីអាហារូបត្ថម្ភដល់សិស្សនៅបឋមសិក្សា ក្នុងតំបន់មានអសន្តិសុខស្បៀង មានភាពក្រីក្រខ្ពស់ និងភាពងាយរងគ្រោះខ្លាំង ក្នុងការរួមចំណែកបង្កើនផលិតភាពស្បៀង ក៏ដូចជាឱកាសរកប្រាក់ចំណូលសម្រាប់អ្នកផ្គត់ផ្គង់ស្បៀង ឬកសិករខ្នាតតូចតាមមូលដ្ឋាន។
ឯកឧត្តមរដ្ឋមន្រ្តីមានប្រសាសន៍ទៀតថា កម្មវិធីផ្តល់អាហារតាមសាលារៀន បានដើរតួនាទីយ៉ាងសំខាន់ក្នុងការកសាងស្មារតីជាតិដល់កុមារឱ្យមានគំនិតស្រឡាញ់សហគមន៍ និងសាលារៀន មានអារម្មណ៍ទទួលបានសមភាពសង្គម និងភាពជាផ្នែកមួយ នៃការយកចិត្តទុកដាក់របស់សង្គម។
បើតាមឯកឧត្តម ហង់ជួន ណារ៉ុន ជាទិសដៅបន្តទៀត កម្មវិធីផ្តល់អាហារតាមសាលារៀន នឹងអាចរៀបចំពង្រឹងបន្ថែម ឱ្យក្លាយជាយន្តការស្តុកទុកស្បៀង ដែលនឹងអាចកា្លយជាការធានាភាពមានស្បៀងគ្រប់គ្រាន់ សម្រាប់កុមារនៅពេលមានគ្រោះអាសន្នកើតឡើង។
កម្មវិធីផ្តល់អាហារតាមសាលារៀនដោយប្រើប្រាស់កសិផលក្នុងសហគមន៍ បានចាប់អនុវត្តចាប់តាំងពីឆ្នាំ១៩៩៩មក ក្នុងគោលបំណងរួមចំណែកដល់ការអភិវឌ្ឍមូលធនមនុស្ស តាមរយៈការផ្ដល់អាហារចម្អិនក្ដៅៗ មានជីវជាតិដល់សិស្សនៅតាមសាលាបឋមសិក្សាសាធារណៈ (សាលារដ្ឋ) ក្នុងតំបន់ដែលមានអសន្តិសុខស្បៀង មានភាពក្រីក្រច្រើន និងភាពងាយរងគ្រោះខ្ពស់។
ឯកឧត្តម ចន ណារិទ្ធ រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាអគ្គលេខាធិការក្រុមប្រឹក្សាជាតិគាំពារសង្គម មានប្រសាសន៍ថា កម្មវិធីផ្តល់អាហារតាមសាលារៀន កំពុងត្រូវបានអនុវត្តនៅតាមបណ្តាខេត្តចំនួន១០ រួមមាន ខេត្តសៀមរាប, កំពង់ធំ, ព្រះវិហារ, បាត់ដំបង, ស្ទឹងត្រែង, បន្ទាយមានជ័យ, កំពង់ចាម, កំពង់ឆ្នាំង, ពោធិ៍សាត់ និងឧត្តរមានជ័យ ក្នុងនោះក្រសួងអប់រំ យុវជន និងកីឡា អនុវត្តកម្មវិធីនេះនៅសាលារៀនគោលដៅចំនួន ៨១៦ ដោយប្រើប្រាស់ថវិកាជាតិ និងសាលារៀនគោលដៅចំនួន ២៩៨ ផ្សេងទៀត កំពុងអនុវត្តដោយកម្មវិធីស្បៀងអាហារពិភពលោក (WFP)។
បើតាម ឯកឧត្តម ចន ណារិទ្ធ កម្មវិធីផ្តល់អាហារតាមសាលារៀន បានចូលរួមលើកកម្ពស់កម្រិតអាហារូបត្ថម្ភ, បង្កើនអត្រាចុះឈ្មោះចូលរៀន, ជំរុញសិស្សានុសិស្សឱ្យមករៀនបានទៀងទាត់, កាត់បន្ថយការបោះបង់ការសិក្សា ព្រមទាំងរួមចំណែកដល់ការលើកកម្ពស់សេដ្ឋកិច្ច និងសមធម៌នៅក្នុងសហគមន៍ ផងដែរ៕
