ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – អស់រយៈពេល១ឆ្នាំហើយ ដែលវិទ្យាស្ថានបច្ចេកទេសឧស្សាហកម្ម (ITI) បានអនុវត្តសាកល្បងនូវប្រព័ន្ធបណ្តុះបណ្តាលឆ្លាស់ ដោយអនុញ្ញាតឱ្យនិស្សិតកំពុងសិក្សានៅឆ្នាំទី២បានចុះធ្វើកម្មសិក្សានៅតាមក្រុមហ៊ុន សហគ្រាសដែលជាដៃគូ ។ ក្នុងនោះជាលទ្ធផល សិស្សដែលចូលរួមក្នុងប្រព័ន្ធនេះ ទទួលបាននូវការចុះកម្មសិក្សាដោយត្រូវនឹងជំនាញរបស់ពួកគេ ហើយមួយចំនួនមានឱកាសក្លាយជាបុគ្គលិកពេញសិទ្ធិ នៃក្រុមហ៊ុនដែលចុះកម្មសិក្សាថែមទៀត។
ក្នុងពិធីបើកបវេសនកាល និងតម្រង់ទិស សិស្សនិស្សិតវិទ្យាស្ថានបច្ចេកទេសឧស្សាហកម្មសម្រាប់ឆ្នាំសិក្សា២០២២-២០២៣ កាលពីថ្ងៃទី២៦ ខែមករា ឆ្នាំ២០២៣ ឯកឧត្តម ជិន តារ៉ា នាយកវិទ្យាស្ថាន បានមានប្រសាសន៍ថា កាលពីឆ្នាំ២០២២ វិទ្យាស្ថានបានរៀបចំកម្មវិធីសិក្សាមួយ ដែលហៅថា ប្រព័ន្ធបណ្តុះបណ្តាលឆ្លាស់ សម្រាប់ថ្នាក់ជាន់ខ្ពស់បច្ចេកទេស ដោយរៀបចំម៉ូលឌុលស្នូលសំខាន់ៗមកសិក្សាពេញម៉ោងទាំងព្រឹក និងរសៀលនៅឆ្នាំទី១ ក្នុងមួយថ្ងៃ៧ម៉ោងកន្លះ ពីថ្ងៃចន្ទ ដល់ថ្ងៃសុក្រ ទាំងទ្រឹស្តី និងការអនុវត្តនៅក្នុងរោងជាង និងបន្ទប់បណ្តុះបណ្តាលរបស់វិទ្យាស្ថាន។
ដោយឡែកនៅឆ្នាំទី២ និស្សិតត្រូវបញ្ជូនទៅធ្វើកម្មសិក្សាដើម្បីហាត់ការដោយផ្ទាល់នៅក្រុមហ៊ុនជាដៃគូ ដោយទទួលបានប្រាក់ឧបត្ថម្ភពីក្រុមហ៊ុន សហគ្រាស យានដ្ឋានទាំងនោះ តាមលទ្ធភាព គោលការណ៍ និងការព្រមព្រៀងគ្នា ដោយមានការិយាល័យសេវាកម្ម និងផលិតកម្មនៃទ្យាស្ថានបច្ចេកទេសឧស្សាហកម្ម ជាអ្នកសម្របសម្រួល។ ករណីនេះ ដើម្បីបំពេញ ម៉ូឌុលដែលនៅសល់ និស្សិតតម្រូវមករៀននៅពេលយប់ ព្រមទាំងបង់ថវិកាឧបត្ថម្ភម៉ោងបង្រៀនក្រៅកាតព្វកិច្ចរបស់គ្រូ ។ ប៉ុន្តែ និស្សិតក៏មានជម្រើសមួយទៀត ក្នុងករណីមិនមានបំណងចុះកម្មសិក្សា ដោយតម្រូវឱ្យរៀនព្រឹក និងរសៀលដដែល ដោយមិនមានបង់ថវិកាឧបត្ថម្ភម៉ោងបង្រៀនរបស់គ្រូឡើយ។
ជាលទ្ធផល នៃការអនុវត្តប្រព័ន្ធបណ្តុះបណ្តាលឆ្លាស់នោះឃើញថា មាននិស្សិតបានទទួលយកចំនួនលើសពី៨៥% និងបានកាត់បន្ថយការបោះបង់ការសិក្សាក្នុងអត្រាទាបជាង១០% ដែលជាអត្រាមួយទាបមិនធ្លាប់មាន។
ប្រព័ន្ធបណ្តុះបណ្តាលឆ្លាស់នេះ ក៏ជួយឱ្យនិស្សិតទទួលបានប្រាក់ឧបត្ថម្ភ និងចុះកម្មសិក្សាត្រូវជំនាញ ហើយក្រុមហ៊ុនក៏ទទួលបានបុគ្គលិកដែលមានជំនាញ និងមានពេលវេលាគ្រប់គ្រាន់ដើម្បីអង្កេតពីបុគ្គលិកលក្ខណៈរបស់និស្សិត ក្នុងការផ្តល់ឱកាសជាបុគ្គលិកពេញសិទ្ធិផងដែរ។
លោក សយ សុខឃាង នាយករងវិទ្យាស្ថានបច្ចេកទេសឧស្សាហកម្ម មានប្រសាសន៍ថា ប្រព័ន្ធបណ្តុះបណ្តាលឆ្លាស់នេះ ត្រូវបានគេអនុវត្តនៅប្រទេសជឿនលឿនផ្នែកឧស្សាហកម្មមួយចំនួនដូចជាប្រទេសអាល្លឺម៉ង់ជាដើម, ប្រព័ន្ធនេះត្រូវបានវិទ្យាស្ថានបច្ចេកទេសឧស្សាហកម្មយកមកអនុវត្តមុនគេ ដើម្បីជាការផ្សារភ្ជាប់ទ្រឹស្តីនៅក្នុងថ្នាក់រៀនជាមួយនឹងការអនុវត្តផ្ទាល់នៅរោងចក្រសហគ្រាស ដែលជួយឱ្យនិស្សិតកំពុងសិក្សាជំនាញបច្ចេកទេសកាន់តែមានសមត្ថភាពនៅកន្លែងការងារ។
បើតាមលោក សុខឃាង ប្រព័ន្ធបណ្តុះបណ្តាលឆ្លាស់បានទទួលការគាំទ្រពីក្រុមហ៊ុនដៃគូជាច្រើនដូចជាក្រុមហ៊ុនកូមិនខ្មែរ ក្រុមហ៊ុន Toyota Cambodia ជាដើម ដែលបានទទួលយកនិស្សិតដែលចូលរួមក្នុងប្រព័ន្ធបណ្តុះបណ្តាលឆ្លាស់, ហើយជាមួយគ្នាក្រុមហ៊ុនសហគ្រាសជាដៃគូ ក៏បានវាយតម្លៃខ្ពស់ចំពោះសមត្ថភាពនិស្សិតទាំងនោះផងដែរ៕
