ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – ក្នុងពិធីចែកសញ្ញាបត្រជូនដល់និស្សិតសាកលវិទ្យាល័យបៀលប្រាយ នាព្រឹកថ្ងៃទី១៦ ខែមីនា ឆ្នាំ២០២៣ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានស្នើទៅដល់សាកលវិទ្យាល័យទាំងអស់ពង្រឹងគុណភាពឱ្យដូចគ្នា រវាងសាកលវិទ្យាល័យនៅរាជធានីភ្នំពេញ និងតាមបណ្តាខេត្ត។
សម្តេចតេជោមានប្រសាសន៍ថា តាំងតែពីមុនឆ្នាំ១៩៧០ ព្រះករុណាសម្តេចព្រះ នរោត្តម សីហនុ ព្រះអង្គធ្លាប់បង្កើតសាកលវិទ្យាល័យនៅតាមបណ្តាខេត្តរួចមកហើយ ហើយបច្ចុប្បន្ននេះ កម្ពុជាក៏មានសាកលវិទ្យាល័យនៅបាត់ដំបង សៀមរាប ត្បូងឃ្មុំ ព្រៃវែង ស្វាយរៀង កំពង់ចាម និងក្រចេះជាដើម, ក្នុងនោះសម្តេចលើកទឹកចិត្តឱ្យសាកលវិទ្យាល័យឯកជន ចូលរួមក្នុងការរៀបចំបណ្តាញឧត្តមសិក្សានៅតាមខេត្ត ដែលវាកាត់បន្ថយនូវការលំបាករបស់និស្សិតដែលត្រូវបន្តការសិក្សា ហើយគ្មានកន្លែងស្នាក់នៅទីក្រុងភ្នំពេញ។
តែជាមួយគ្នានេះ សម្តេចតេជោក៏សំណូមពរដល់សាកលវិទ្យាល័យទាំងអស់ ត្រូវពង្រឹងគុណភាពឱ្យដូចគ្នារវាងសាលវិទ្យាល័យនៅភ្នំពេញ និងសាកលវិទ្យាល័យនៅតាមបណ្តាខេត្ត។
សម្តេចតេជោ ហ៊ុន សែន នាយករដ្ឋមន្រ្តី
“អ្វីដែលជាសំណូមពររបស់ខ្ញុំនៅតាមបណ្តាខេត្ត គឺពង្រឹងគុណភាព កុំឱ្យសាលាតែមួយ ប៉ុន្តែគុណភាពខុសគ្នា រវាងអ្នករៀននៅភ្នំពេញ និងតាមខេត្ត ត្រូវធ្វើយ៉ាងម៉េចឱ្យគុណភាពដូចគ្នា នោះគឺជាការរួមចំណែកក្នុងការកាត់បន្ថយការលំបាករបស់និស្សិត”
ដូច្នេះ ដើម្បីឱ្យសាកលវិទ្យាល័យនៅបណ្តាខេត្តមានគុណភាពដូចគ្នាទៅនឹងសាកលវិទ្យាល័យនៅភ្នំពេញ សម្តេចបានប្រាប់ឱ្យសាកលវិទ្យាល័យទាំងអស់ ធ្វើការបណ្តុះបណ្តាលសាស្រ្តាចារ្យដែលមានកម្រិតដូចគ្នា ហើយបញ្ជូនទៅបង្រៀននៅតាមសាលកលវិទ្យាល័យនានានៅតាមបណ្តាខេត្ត។
ជាមួយគ្នានេះដែរ សម្តេចតេជោក៏បានផ្តល់ដំបូន្មានដល់សិស្សនិស្សិតទាំងអស់ ត្រូវមានស្មារតីរៀនជាប់ជានិច្ច ទោះជាសិក្សាដល់កម្រិតថ្នាក់ណា ឬមានតួនាទីក្នុងស្ថាប័នកំពូលរបស់ជាតិកម្រិតណាក៏ដោយ។
គួរបញ្ជាក់ដែរថា បើយោងតាមរបាយការណ៍របស់ក្រសួងអប់រំ យុវជន និងកីឡា បច្ចុប្បន្នកម្ពុជាមានគ្រឹះស្ថានឧត្តមសិក្សានៅទូទាំងប្រទេសសរុបចំនួន ១៣០ ក្នុងនោះគ្រឹះស្ថានឧត្តមសិក្សាសាធារណៈរបស់រដ្ឋមានចំនួន ៤៨ និងឯកជនចំនួន៨២ មានទីតាំងស្ថិតនៅ២០ខេត្ត និងរាជធានីភ្នំពេញ៕
