ភ្នំពេញ – ជាមួយ​នឹង​ការ​ថ្លែង​អបអរ​ដល់​សិស្ស​ប្រឡង​ជាប់សញ្ញាបត្រ​មធ្យមសិក្សា​ទុតិយភូមិ​ សម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រ​កម្ពុជា ក៏​បាន​ថ្លែង​លើកទឹកចិត្ត​​ដល់បេក្ខជន​ដែល​ប្រឡង​ធ្លាក់​សញ្ញាបត្រ​មធ្យមសិក្សា​ទុតិយភូមិ​ផងដែរ។ ក្នុងជំនួប​ជាមួយ​សិស្ស​ទទួលបាន​និទ្ទេស A ជាង​១ពាន់នាក់​នៅមជ្ឈមណ្ឌលពាណិជ្ជកម្មជ្រោយចង្វារ នាព្រឹក​ថ្ងៃទី២ ខែកុម្ភៈ សម្តេចតេជោ​នាយករដ្ឋមន្រ្តីលើក​ឡើងថា នៅសម័យបច្ចុប្បន្ន​នេះ គឺមានជម្រើសជាច្រើន​ដែលជា​ឱកាសសម្រាប់​អ្នក​ដែលប្រឡង​ធ្លាក់សញ្ញាបត្រ​មធ្យមសិក្សា​ទុតិយភូមិ​ ។

បើតាម​សម្តេចតេជោ​ សិស្ស​ដែលប្រឡង​ធ្លាក់​អាចជ្រើសរើស​បន្តរៀនត្រួតថ្នាក់ ហើយ​បន្ត​ប្រឡង​នៅ​ឆ្នាំក្រោយ, ជម្រើសទី២ គឺអាចចូលទៅ​រៀន​យក​បរិញ្ញាបត្ររង ហើយ​នៅពេល​ប្រឡងសញ្ញាបត្រ​មធ្យមសិក្សា​ទុតិយភូមិ អាចវិលមក​ប្រឡង​ម្តងទៀត ​និងជម្រើសមួយ​ទៀត គឺទៅរៀន​សាលា​បណ្តុះបណ្តាលវិជ្ជាជីវៈ ដែលនឹង​ផ្តល់ឱកាសឱ្យយុវជន​យើង​ទទួលបាន​នូវ​ជំនាញវិជ្ជាជីវៈសម្រាប់​បម្រើ​ឱ្យ​ការ​អភិវឌ្ឍ​ប្រទេស ក៏​ដូចជា​មុខ​របរខ្លួន​ឯង។

“តាសូមចូលរួមជាមួយ​នឹង​ការ​សោកស្តាយ ក៏ប៉ុន្តែសង្ឃឹមថា ចៅៗមិនបោះបង់​ចោល​ការ​ខិតខំទាំងឡាយ​ដែលខ្លួន​ត្រូវ​បន្ត​”

សម្តេចតេជោបន្តថា សិស្សានុសិស្ស​ដែល​ប្រឡង​ធ្លាក់បាក់ឌុបមិន​ត្រូវ​បោះ​បង់​ចោល​ការ​ខិតខំ​ប្រឹងប្រែងរបស់ខ្លួនឡើយ ។ សម្តេចថា ​បើប្រៀបធៀបទៅសម័យ​ប្រឡង ​ក៏​មានអ្នក​គ្រូ​ម្នាក់នៅ​ខេត្តឧត្តរមានជ័យ ដែល​គាត់​​អាយុ​៥៦ឆ្នាំ តែគាត់ប្រឡងធ្លាក់ ហើយ​គាត់​នៅ​តែប្តូរផ្តាច់ដើម្បីប្រឡងនៅឆ្នាំក្រោយទៀត ដើម្បីបំពេញបំណង​ប្រាថ្នារបស់គាត់ ដែល​នេះសម្តេច​តេជោ​បាន​ធ្វើការ​កោតសរសើរ និង​​ហៅថា វាជាការរៀនពេញមួយ​ជីវិត។

គួរ​បញ្ជាក់ថា ការ​ប្រឡង​សញ្ញាបត្រ​មធ្យមសិក្សា​ទុតិយភូមិ ឬបាក់ឌុប សម័យ​ប្រឡង ៥ ធ្នូ ២០២២ មាន​បេក្ខជន​ដាក់ពាក្យ​ប្រឡង​សរុប​ចំនួន ១២៨ ១៣៥នាក់ ក្នុងនោះបេក្ខជន​ដែលប្រឡង​ជាប់មាន​ចំនួន ៩០៩៥០នាក់ ដោយ​បេក្ខជន​ដែលបានប្រឡងធ្លាក់មាន​ចំនួន ៧៧១៨៥នាក់។ ក្នុងនោះដែរ ​បេក្ខជន​ដែលទទួលបាននិទ្ទេស A មាន​ចំនួន ១០៤៩នាក់, និទ្ទេស B ចំនួន ៧២៣២នាក់, និទ្ទេស C ចំនួន ១៩០៥៣នាក់, និទ្ទេស D ចំនួន ៣១១៦៦នាក់ និង​ និទ្ទេស E ចំនយន ៣២៤៥០នាក់៕