ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – ក្នុងពិធីជួបសំណេះសំណាល និងផ្ដល់រង្វាន់លើកទឹកចិត្តដល់សិស្សនិទ្ទេស A ក្នុងឆ្នាំសិក្សា២០២១-២០២២ សរុបចំនួន១,០៤៩នាក់ នាព្រឹកថ្ងៃទី០២ ខែកុម្ភៈ ឆ្នាំ២០២៣ សម្ដេចតេជោ ហ៊ុន សែន នាយករដ្ឋមន្ត្រី បានសម្តែងមោទនភាពអំពីការកើនឡើង នៃចំនួនសិស្សជាស្រ្តីដែលបានប្រឡងជាប់សញ្ញាមធ្យមសិក្សាទុតិយភូមិរហូតដល់ជាង៧០ភាគរយ តែជាមួយគ្នានោះ សម្តេចក៏បារម្ភពីការធ្លាក់ចុះនៃការសិក្សារបស់សិស្សប្រុស ដោយបានប្រាប់ឱ្យក្រសួងអប់រំធ្វើការសិក្សាពីករណីនេះ។
ក្នុងការប្រឡងសញ្ញាបត្រមធ្យមសិក្សាទុតិយភូមិកន្លងទៅនេះ មានបេក្ខជនសរុបចំនួន ១២៥៧៣៩នាក់បានដាក់ពាក្យប្រឡង ក្នុងនោះសិស្សដែលប្រឡងជាប់មានចំនួន ៩០៩៥០នាក់ ស្មើ ៧២,៣៧ភាគរយ ក្នុងចំណោមអ្នកជាប់នោះ គេឃើញថា បេក្ខជនជាសិស្សស្រីមានរហូតដល់ទៅ ៥២៥១២នាក់ ដែលស្មើនឹង ៧៧,៥២ភាគរយ ។ សម្តេចតេជោលើកឡើងថា លទ្ធផលនេះសម្តេចមានមោទនភាពចំពោះការកើនឡើងនៃចំនួនសិស្សស្រីដែលប្រឡងជាប់ ប៉ុន្តែសម្តេចក៏មានកង្វល់ផងដែរចំពោះការធ្លាក់ចុះការសិក្សា របស់សិស្សប្រុស។
សម្តេច ហ៊ុន សែន នាយករដ្ឋមន្រ្តី
“ម្ខាងយើងមានមោទនភាពអំពីការកើនឡើងនៃចំនួនសិស្សជាស្រ្តីដែលបានប្រឡងជាប់នៅមធ្យមសិក្សាទុតិយភូមិ តែម្ខាងទៀតយើងក៏មានការកង្វល់ដែរ កង្វល់ត្រង់ថា ហេតុអីបានជាក្នុងចំនួនអ្នកដែលជាប់១០០នាក់ ៧៧នាក់បានទៅស្រ្តី តើមកពីមូលហេតុអ្វី… យុវជនចូលចិត្តដើរលេង ក្នុងពេលដែលយុវនារីសម្ងំរៀននៅផ្ទះ ឬយ៉ាងម៉េច?”
ចំពោះការកើនឡើងចំនួនសិស្សស្រីដែលជាប់សញ្ញាបត្រមធ្យមសិក្សាទុតិយភូមិរហូតដល់ជាង៧៧ភាគរយនេះ បើតាមការលើកឡើងរបស់ លោកបណ្ឌិត សុខ សូត្រ ព្រឹទ្ធបុរសមហាវិទ្យាល័យអប់រំ នៃសាកលវិទ្យាល័យភូមិន្ទភ្នំពេញ ថា កត្តាដែលនាំឱ្យសិស្សស្រីទទួលបានលទ្ធផលសិក្សាខ្ពស់ជាងសិស្សប្រុស គឺទី១. កត្តាជីវភាពប្រជាជនខ្ពស់អាចផ្ដល់ឱកាសឱ្យកូនស្រីបានរៀន ឪពុកម្ដាយចាប់ផ្ដើមងាកចេញឆ្ងាយពីប្រពៃណីឱ្យកូនស្រីរៀនតិចជាងកូនប្រុសនៅក្នុងគ្រួសារ ទី២. ក្មេងស្រីជាទូទៅរៀនពូកែជាងក្មេងប្រុស ព្រោះរបៀបគិត របៀបរស់នៅមានការអត់ធ្មត់ និងមានការយកចិត្តទុកដាក់ខ្ពស់ជាងក្មេងប្រុស។
ចំណែកកត្ដាដែលនាំឱ្យក្មេងប្រុសបោះបង់ការសិក្សាច្រើនជាងក្មេងស្រីវិញ គឺទី១. តម្រូវការសេដ្ឋកិច្ចច្រើននៅក្នុងគ្រួសារ ឪពុកម្ដាយចង់ឱ្យមានជីវភាពធូរធារទាមទារឱ្យមានកូនប្រុសចេញធ្វើការដើម្បីរកចំណូល, ទី២. ការរៀនជាការវិនិយោគរយៈពេលយូរ និងចង់បណ្ដុះក្មេងស្រីឱ្យមានចំណេះដឹងក្នុងការចិញ្ចឹមកូន និងចេះចាត់ចែងគ្រួសារបានល្អ។ លោកបណ្ឌិត សុខ សូត្រ បន្តថា មកដល់ឧត្តមសិក្សាក្មេងស្រីហាក់ដូចជាថយចុះវិញ ដោយសារដល់វ័យត្រូវរៀបការផង ហើយជីវភាពចិញ្ចឹមកូនវែងឆ្ងាយផង និងការរៀននៅថ្នាក់ឧត្តមសិក្សាមានរយៈពេលយូរ និងពេលខ្លះមិនបានដូចចិត្តផង ក៏ងាកទៅការគិតបែបប្រពៃណីវិញគឺក្មេងស្រីចាប់ផ្ដើមថយចុះនៅកម្រិតឧត្តមសិក្សា។
លោកបណ្ឌិត សុខ សូត្រ
“ខ្ញុំគិតថាជារឿងគួរឱ្យចាប់អារម្មណ៍បើនិយាយអំពីការសិក្សាពីមុនយើងឃើញថា កុមារីបោះបង់ការសិក្សាច្រើន ប៉ុន្តែឥឡូវសិស្សប្រុសបោះបង់ច្រើនទៅវិញ ហើយបើសិស្សប្រុសមិនយកចិត្តទុកដាក់រឿងរៀននេះទេ ថ្ងៃក្រោយក្មេងប្រុសនឹងជួបការលំបាកក្នុងការដឹកនាំគ្រួសារជាមិនខាន”
ព្រឹទ្ធបុរសមហាវិទ្យាល័យអប់រំ នៃសាកលវិទ្យាល័យភូមិន្ទភ្នំពេញរូបនេះបន្ថែមថា ដើម្បីចូលរួមជួយជំរុញឱ្យអត្រាការសិក្សារបស់សិស្សស្រី និងសិស្សប្រុសទទួលបានលទ្ធផលគាប់ប្រសើរ គឺឪពុកម្ដាយគប្បីយល់ដឹងពីការវិនិយោគលើការសិក្សាកូនៗរបស់ខ្លួន ដោយបើកឱកាសឱ្យសិស្សប្រុស និងសិស្សស្រីបានចូលរៀនគ្រប់ៗគ្នា និងការធ្វើផែនការគ្រួសារឱ្យបានច្បាស់លាស់។ លើសពីនេះ មានការចូលរួមពីអន្តរក្រសួងទាំងមន្រ្តីមូលដ្ឋាន សង្គមកិច្ច លើកកម្ពស់ការរៀនបំណិនជីវិតដែលរៀននៅសាលាអាចរកចំណូលបានក្នុងការចិញ្ចឹមជីវិត និងជួយឪពុកម្ដាយ ដើម្បីឱ្យយុវជន យុវនារីបានរៀនរហូតមកដល់ថ្នាក់ឧត្តមសិក្សា សម្រេចឱ្យបានគោលដៅឆ្នាំ២០៣០ដល់២០៥០ ឱ្យបានអត្រា៤០% ដោយបច្ចុប្បន្នយើងមានត្រឹមតែជាង១០ភាគរយប៉ុណ្ណោះ៕
