ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងបាឋកថាពិសេស ស្ដីពី «យុវជន និងព្រះពុទ្ធសាសនា» នាព្រឹកថ្ងៃទី០៧ ខែសីហា ឆ្នាំ២០២៤ ដើម្បីអបអរខួបលើកទី២៥ នៃទិវាអន្តរជាតិសម្រាប់យុវជន ឆ្នាំ២០២៤ ព្រះភិក្ខុវជិរប្បញ្ញោ គូ សុភាព មានសង្ឃដីកាថា យុវជនត្រូវចេះរៀបចំការគិតឱ្យល្អតាំងពីក្មេងទើបមិនប្រឈមបញ្ហាច្រើននៅថ្ងៃអនាគត។
ព្រះអង្គ គូ សុភាព មានសង្ឃដីកាបន្ថែមថា នៅពេលយើងទទួលបានពាក្យសម្ដីឌឺដង មើលងាយ របស់អ្នកដទៃ គឺបង្ហាញថាគេមានចិត្តអាក្រក់, តែប្រសិនបើចិត្តយើងព្រមទទួលធ្វើទង្វើអាក្រក់តបវិញ នោះយើងនឹងអាក្រក់ដូចគេដែរ។ ដូច្នេះ យើងកុំទទួលយកមកទុកក្នុងចិត្ត នោះយើងនឹងនៅតែរក្សាចិត្តបានល្អ។
ព្រះអង្គ គូ សុភាព មានសង្ឃដីកាបញ្ជាក់ថា យុវជនត្រូវមានចំណេះដឹង និងជំនាញមួយច្បាស់លាស់។ ទន្ទឹមគ្នានេះ ត្រូវរក្សាសុខភាពឱ្យល្អ និងជៀសវាងការឈឺ ដោយកុំផឹកស្រា សេពគ្រឿងញៀន និងភេសជ្ជៈមានជាតិផ្អែមខ្ពស់ បរិភោគអាហារឱ្យម៉ត់ល្អ និងហូបតាមប្រមាណ។
«មនុស្សត្រូវចេះធ្វើខ្លួនឱ្យសប្បាយ កុំក្ដៅក្រហាយ កុំសប្បាយជ្រុល សម្រាកឱ្យបានគ្រប់គ្រាន់ ធ្វើជាមនុស្សល្អ កុំលួចឆក់អ្នកដទៃ ត្រូវរៀនរស់នៅជាមួយមនុស្ស ចេះគោរពឱ្យតម្លៃ និងលើកទឹកចិត្តអ្នកដទៃ នេះជាធម៌នាំឱ្យអាយុវែង»។
ព្រះអង្គ គូ សុភាព
ព្រះអង្គ គូ សុភាព មានសង្ឃដីកាបន្ថែមថា ដើម្បីជួយយុវជនឱ្យក្លាយជាមនុស្សរឹងមាំ មានទីពឹងសម្រាប់ខ្លួនឯង ទៅណាមកណាគេស្រឡាញ់ចូលចិត្ត និងអាចដោះស្រាយបញ្ហាដោយខ្លួនឯងបាន ត្រូវមាន ១. ចរិកឬកពារសមរម្យ ថ្លៃថ្នូរ ពាក្យសម្ដីទន់ភ្លន់, ២. រៀនសូត្រឱ្យច្រើន ចេះដឹងឱ្យច្រើន, ៣. សេពគប់មនុស្សល្អ, ៤. ចេះស្គាល់ទោសកំហុសខ្លួនឯង, ៥. ប៉ិនប្រសព្វជាមួយការងារ, ៦. ស្រឡាញ់អ្វីដែលត្រឹមត្រូវ, ៧. មានសេចក្ដីព្យាយាម តស៊ូមិនបោះបង់, ៨. ដឹងគុណឪពុកម្ដាយ, ៩. មានស្មារតីល្អ និង ១០. មានបញ្ញា៕
