ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្រសួងអប់រំ យុវជន និងកីឡា កំពុងជំរុញដល់គ្រប់គ្រឹះស្ថានសិក្សាទាំងអស់ ទាំងគ្រឹះស្ថានសាធារណៈ ក៏ដូចជាឯកជនធ្វើសកម្មភាពប្រកួតប្រជែងតែងនិពន្ធ និងស្មូតកំណាព្យ ដើម្បីអបអរសាទរទិវាគ្រូបង្រៀន ៥ តុលា ២០២៥។ ការប្រកួតប្រជែងការតែងនិពន្ធនេះ ជាការដណ្តើមពានរង្វាន់ សម្ដេចព្រះសង្ឃរាជ ជួន ណាត និងប្រកួតប្រជែងស្មូតកំណាព្យ ពានរង្វាន់ព្រះភិរម្យភាសាអ៊ូ ហៅ ង៉ុយ ក្រោមប្រធានបទ “គ្រូបង្រៀនជាតួអង្គសំខាន់នៃបដិវត្តកម្មបញ្ញាសិប្បនិម្មិត”។
ក្នុងកិច្ចប្រជុំពិភាក្សាស្តីពីការត្រៀមប្រារព្ធទិវាគ្រូបង្រៀនឆ្នាំ២០២៥ កាលពីពេលថ្មីៗនេះ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា មានប្រសាសន៍ថា ទិវាគ្រូបង្រៀន ៥ តុលា ត្រូវបានចាត់ទុកជាទិវាកម្រិតសកល ហើយត្រូវប្រារព្ធឡើងក្នុងគោលបំណង ដើម្បីបំផុសនូវវប្បធម៌ និងប្រពៃណី នៃការរំឭកគុណូបការៈដ៏ថ្លៃថ្លាជូនចំពោះគ្រូបង្រៀននៅគ្រប់ភូមិសិក្សាទូទាំងប្រទេស ដែលបានចំណាយពេលវេលា កម្លាំងកាយ កម្លាំងចិត្ត ស្មារតី និងវិជ្ជាជីវៈ ក្នុងការបំពេញភារកិច្ចជាអ្នកបណ្ដុះបណ្ដាលដែលមិនមែនផ្ទេរត្រឹមតែចំណេះដឹងនិងចំណេះវិជ្ជាប៉ុណ្ណោះទេ ថែមទាំងទូន្មានឱ្យសិស្សានុសិស្សធ្វើតែអំពើល្អ ស្គាល់ខុស ស្គាល់ត្រូវ និងចេះគោរពចាស់ទុំ ក្លាយខ្លួនជាធនធានមនុស្សដ៏មានសក្ដានុពលសម្រាប់ប្រទេសជាតិ។
សម្រាប់ឆ្នាំ២០២៥នេះ រដ្ឋមន្ត្រីក្រសួងអប់រំ ស្នើឱ្យក្រុមការងារបន្តសហការគ្នាឱ្យកាន់តែល្អប្រសើរ ដោយត្រូវបន្តយកចិត្តទុកដាក់លើកិច្ចការងារតាមជំនាញ ជ្រើសរើសប្រធានបទ និងពាក្យស្លោកសម្រាប់កម្មវិធីស្របតាមចក្ខុវិស័យ និងការវិវឌ្ឍថ្មីៗក្នុងវិស័យអប់រំ ជាពិសេសផ្តោតលើការអប់រំឌីជីថល និងបញ្ញាសិប្បនិម្មិត (AI) ចាត់ចែងរៀបចំការប្រឡងតែងនិពន្ធ និងស្មូតកំណាព្យឱ្យដំណើរការរលូន បង្ហាញសមិទ្ធផលនានារបស់គ្រូបង្រៀន ក៏ដូចជាត្រៀមរៀបចំរបាយការណ៍សម្រាប់កម្មវិធី។
បើតាមសេចក្ដីណែនាំរបស់ក្រសួងអប់រំ ការប្រកួតប្រជែង តែងនិពន្ធ និងស្មូតកំណាព្យនេះ តម្រូវឱ្យរៀបចំទាំងនៅថ្នាក់ក្រោមជាតិ និងថ្នាក់ជាតិ ដោយត្រូវជ្រើសរើសសិស្ស និស្សិត គ្រូបង្រៀននៅតាមគ្រឹះស្ថានសិក្សាសាធារណៈ និងឯកជន គ្រឹះស្ថានបណ្ដុះបណ្ដាលគ្រូបង្រៀន និងសាធារណៈជន ដើម្បីចូលរួមប្រកួតប្រជែង។
ក្នុងនោះថ្នាក់ក្រោមជាតិនឹងត្រូវរៀបចំឡើងដោយមន្ទីរអប់រំ យុវជន និងកីឡា រាជធានីខេត្ត ហើយការប្រកួតថ្នាក់ជាតិ គ្រោងនឹងប្រព្រឹត្តទៅពីថ្ងៃទី៣០ ខែកញ្ញា ដល់ថ្ងៃទី១ ខែតុលា ឆ្នាំ២០២៥ នៅក្រសួងអប់រំ យុវជន និងកីឡា ហើយការប្រគល់ពានរង្វាន់ដល់ជ័យលាភី នឹងប្រព្រឹត្តទៅក្នុងពិធីប្រារព្ធទិវាគ្រូបង្រៀន នាថ្ងៃទី៣ ខែតុលា ឆ្នាំ២០២៥ នៅវិទ្យាស្ថានជាតិអប់រំ។
ដោយឡែកសម្រាប់គោលការណ៍ និងលក្ខណៈវិនិច្ឆ័យ សម្រាប់ការតែងនិពន្ធ នឹងត្រូវផ្តោតទៅលើ អត្ថរូប (រង្វាស់កាព្យ ចំណាប់ចួន ភាសាកាព្យ), អត្ថន័យ (ត្រឹមត្រូវតាមប្រធានបទ), អត្ថរស (តម្លៃអប់រំ តម្លៃគុណធម៌ តម្លៃសីលធម៌ និង អក្ខរាវិរុទ្ធ។ ហើយសម្រាប់ការស្មូតកំណាព្យ នឹងត្រូវវិនិច្ឆ័យលើ ការស្មូតគោរពតាមលំនាំបទនៃកំណាព្យ, ទឹកដមសំឡេងពិរោះក្រអៅក្រអួន, សំឡេងមិនដាច់ មិនភ្លាត់ ឬភ្លាវនាំឱ្យខុសចង្វាក់ និង ទឹកមុខ កាយវិការទៅតាមបរិយាកាសនៃបទនីមួយៗ។
សូមជំរាបជូនថា ទិវាគ្រូបង្រៀន ត្រូវបានរាជរដ្ឋាភិបាលប្រកាសតាមរយៈអនុក្រឹត្យលេខ៤៧ អនក្រ.បក ចុះថ្ងៃទី០៣ ខែកញ្ញា ឆ្នាំ១៩៩៧ ដោយកំណត់យកថ្ងៃទី០៥ ខែតុលា ដើម្បីប្រារព្ធពិធីនេះជារៀងរាល់ឆ្នាំ ក្នុងគោលបំណងដើម្បីបំផុសនូវគ្រប់ភូមិសិក្សាទូទាំងប្រទេស និងរំលឹកពីគុណបំណាច់របស់គ្រូបង្រៀន ដែលបានចំណាយពេលវេលា កម្លាំងកាយ កម្លាំងចិត្ត ស្មារតី និងវិជ្ជាជីវៈ ក្នុងការបំពេញភារកិច្ច ជាអ្នកបណ្ដុះបណ្ដាលដើម្បីផ្ទេរនូវតម្លៃ ព្រមទាំងទូន្មានឱ្យសិស្សានុសិស្សធ្វើតែអំពើល្អ ស្គាល់ខុស ស្គាល់ត្រូវ និងចេះគោរពចាស់ទុំ៕
