ការងារស្ម័គ្រចិត្ត ជាបរិយាកាសការងារមួយដែលផ្ដល់ឱកាសដល់យុវជនចូលរួមអនុវត្តការងារជាក់ស្ដែង ព្រមទាំងបណ្ដុះផ្នត់គំនិត ការសហការ ការដោះស្រាយបញ្ហា ក៏ដូចជាបង្កើតទំនាក់ទំនងជាមួយមនុស្សជុំវិញខ្លួន។ ម៉្យាងវិញទៀត ការងារស្ម័គ្រចិត្ត ផ្ដល់ឱកាសដល់យុវជន សិស្ស និស្សិត ដែលមិនទាន់មានបទពិសោធន៍ការងារ អាចកសាងសមត្ថភាព ចំណេះជំនាញ ដើម្បីអភិវឌ្ឍខ្លួនទៅរកការងារល្អក្រោយបញ្ចប់ការសិក្សា។

ជាមួយគ្នា យុវតីពីររូបដែលជាអតីតជ័យលាភីលេខ១ ក្នុងកម្មវិធីប្រកួតជជែកដេញដោលយុវជនថ្នាក់ជាតិ ឆ្នាំ២០២២ កន្លងទៅ បានយល់ឃើញថា ការងារស្ម័គ្រផ្ដល់ទាំងចំណេះដឹង និងអាចចូលរួមចំណែកជួយសង្គមបានច្រើន។

កញ្ញា ផន ម៉ាន់ស៊ី ជានិស្សិតឆ្នាំទី២ ផ្នែកវិទ្យាសាស្រ្តកុំព្យូទ័រ នៃសាលកលវិទ្យាល័យភូមិន្ទភ្នំពេញ បានប្រាប់ឱ្យដឹងថា រូបគេចង់សាកល្បងធ្វើការងារស្ម័គ្រចិត្តចាប់តាំងពីរនៅថ្នាក់វិទ្យាល័យ ប៉ុន្តែមិនដឹងចូលធ្វើដោយរបៀបណា។ ម៉ាន់ស៊ី បន្តថា រហូតបានចូលរួមប្រកួតក្នុងកម្មវិធីជជែកដេញដោលយុវជនថ្នាក់ជាតិ ទើបធ្វើឱ្យខ្លួនឯងយល់ច្បាស់ថា នៅពេលបានជួយសង្គម នឹងធ្វើឱ្យយើងមានអារម្មណ៍ សប្បាយចិត្ត។ ទើបក្នុងឆ្នាំ២០២៤ មានការប្រកាសជ្រើសរើសអ្នកស្ម័គ្រចិត្តរៀបចំកម្មវិធីជជែកដេញដោលយុវជនថ្នាក់ជាតិ រូបគេប្ដេជ្ញាចិត្តថា ត្រូវតែចូលរួមធ្វើការងារស្ម័គ្រចិត្តក្នុងកម្មវិធីជជែកដេញដោលយុវជនថ្នាក់ជាតិឱ្យបាន បើទោះជាមានកិច្ចការរវល់យ៉ាងណាក៏ដោយ។

និស្សិតឆ្នាំទី២ ផ្នែកវិទ្យាសាស្រ្តកុំព្យូទ័រ នៃសាលកលវិទ្យាល័យភូមិន្ទភ្នំពេញ រូបនេះ បញ្ជាក់បន្ថែមថា រូបគេស្រឡាញ់ការងារស្ម័គ្រចិត្តជាខ្លាំង បើទោះជាដឹងថាការងារស្ម័គ្រចិត្តមិនបានទទួលប្រាក់កម្រៃក៏ពិតមែន ប៉ុន្តែនៅពេលបានចូលរួមធ្វើ គឺឃើញថាខ្លួនឯងផ្លាស់ប្ដូរការគិត ទទួលចំណេះដឹងល្អៗ និងអាចសម្របខ្លួនទៅតាមសង្គមបានច្រើន។

និស្សិតឆ្នាំទី២ ផ្នែកវិស្វកម្មកុំព្យូទ័រ នៃសាលកលវិទ្យាល័យភូមិន្ទភ្នំពេញ រូបនេះ បញ្ជក់បន្ថែមថា ទោះបីរៀនមុខវិជ្ជាអ្វីក៏ដោយ យើងនៅតែអាចចូលរួមស្ម័គ្រចិត្តក្នុងកម្មវិធីជជែកដេញដោលយុវជនថ្នាក់ជាតិបាន ព្រោះកម្មវិធីនេះ ផ្ដលចំណេះដឹងដល់យើងលើសពីអ្វីដែលយើងរៀននៅសាលា។ ឧទាហរណ៍ បើយើងរៀនផ្នែក ពត៌មានវិទ្យា គឺយើងដឹងតែពីចំណេះដឹងពាក់ព័ន្ធនឹងពត៌មានវិទ្យា យើងមិនសូវដឹងចំណេះដឹងផ្សេងៗទៀតទាក់ទងទៅនឹងសង្គមខាងក្រៅ ប៉ុន្តែនៅពេលយើងចូលរួមការងារស្ម័គ្រចិត្ត ធ្វើឱ្យយើងដឹងមួយផ្នែកទៀតច្រើនជាងអ្វីដែលដឹងនៅសាលា។ ជាពិសេស ពីមុនខ្ញុំមិនសូវហ៊ាននិយាយ ប៉ុន្តែនៅពេលបានចូលរួមការងារស្ម័គ្រចិត្ត បានជួបបងៗច្រើន ហ៊ាននិយាយជាមួយពួកគាត់ ស្គាល់មនុស្សកាន់តែច្រើន។

កញ្ញា ផន ម៉ាន់ស៊ី លើកឡើងដែរថា បើទោះជារូបគេរៀននៅថ្នាក់វិទ្យាល័យផ្នែកវិទ្យាសាស្រ្តសង្គម ហើយធ្លាប់ជាបេក្ខជនដែលមានសមត្ថភាពក្នុងការប្រកួត ប៉ុន្តែការជ្រើសរើសបន្តការសិក្សាមកសាកលវិទ្យាល័យផ្នែកព័ត៌មានវិទ្យា គឺជាអ្វីដែលរូបគេស្រឡាញ់។ ទន្ទឹមគ្នានេះ ការចូលរួមស្ម័គ្រចិត្តក្នុងកម្មវិធីជជែកដេញដោលយុវជនថ្នាក់ជាតិ គឺមានតាមផ្នែក ក្នុងនោះផ្នែកប្រព័ន្ធផ្សព្វផ្សាយ (Madia) ក៏ជាផ្នែកមួយក្នុងជំនាញ ព័ត៌មានវិទ្យា។ ​ម៉ាន់ស៊ី បន្តថា ពេលចូលរួម​ការងារស្ម័គ្រចិត្ត ក៏ជាពេលវេលាមួយអាចសិក្សាស្រាវជ្រាវបន្ថែមទៀត បង្កើនទំនាក់ទំនងជាមួយសិស្សច្បងជាច្រើនដែលមានជំនាញខុសគ្នាៗ ដែលអាចចែករំលែកបទពិសោធន៍ ព័ត៌មានអាហារូបករណ៍ ក៏ដូចជាជំនាញផ្សេងៗជាច្រើន។

ម៉ាន់ស៊ី បន្ថែមថា ការរៀនផ្នែកព័ត៌មានវិទ្យា ទាមទារពេលវេលារៀនច្រើន ដូច្នេះ ត្រូវបែងចែកពេលវេលារៀនឱ្យបានច្បាស់លាស់ ព្រោះការងារស្ម័គ្រចិត្ត គឺធ្វើនៅថ្ងៃសៅរ៍ និងអាទិត្យ ហើយថ្ងៃច័ន្ទដល់ថ្ងៃសុក្រ ចំណាយពេលសម្រាប់រៀននៅសាកលវិទ្យាល័យ។ ចំពោះ ម៉ាន់ស៊ី ការធ្វើកិច្ចការសាលា ការសរសេរកូដ ច្រើនធ្វើនៅពេលយប់។ ការធ្វើបែបនេះ ជួយឱ្យខ្លួនមានទំនួលខុសត្រូវចំពោះកិច្ចការសាលាផង និងការងារស្ម័គ្រចិត្តផង។ ហើយចំពោះការងារស្ម័គ្រចិត្ត រូបគេ ជាអ្នកសម្របសម្រួល និងជាពិធីការិនីផងដែរ។

ចំណែក កញ្ញា អ៊ាង ណាវីត ជានិស្សិតឆ្នាំទី២ ផ្នែកវិស្វកម្មកុំព្យូទ័រ នៃវិទ្យាស្ថានបច្ចេកវិទ្យាកម្ពុជា បានបន្ថែមថា កាលរៀននៅវិទ្យាល័យ ក្រៅពីជួយកិច្ចការសាលារូបគេមិនធ្លាប់ចូលរួមការងារស្ម័គ្រចិត្តនោះឡើយ ប៉ុន្តែនៅពេលបានចូលរួមក្នុងកម្មវិធីជជែកដេញដោលយុវជនថ្នាក់ជាតិ កន្លងមក ទើបដឹងថា សង្គមជាតិត្រូវការអ្វីជាច្រើនទៀតដែលយើងជាយុវជនអាចចូលរួមជួយបាន។

កញ្ញា អ៊ាង ណាវីត បន្ថែមថា នៅថ្ងៃកម្មវិធី នាងបានឃើញសិស្សច្បងម្នាក់ៗមានភាពរួសរាយរាក់ទាក់ ដោយដំបូងគិតថា ខ្លួនជាសិស្សមកពីខេត្តប្រហែលគ្មានអ្នកស្គាល់ ឬចង់និយាយជាមួយ ប៉ុន្តែនៅពេលទៅដល់បានឃើញសិស្សច្បងម្នាក់ៗមានភាពរួសរាយរាក់ទាក់ ក៏មានអារម្មណ៍ថា សប្បាយចិត្ត ស្រឡាញ់ពួកគាត់ ហើយចង់ចូលរួមស្ម័គ្រចិត្តដូចពួកគាត់ដែរ។ ក្រោយមក តែងតែតាមដានកម្មវិធីនេះរហូត ហើយនៅពេលក្រសួងប្រកាសជ្រើសរើសយុវជនស្ម័គ្រចិត្តក្នុងកម្មវិធីជជែកដេញដោលយុវជនថ្នាក់ជាតិ ឆ្នាំ២០២៤ ក៏បានដាក់ពាក្យ ហើយសម្ភាសន៍ក៏ជាប់។ ណាវីត និយាយថា ប្រសិនបើយើងស្រឡាញ់ ឬមានឆន្ទៈ ទោះជារវល់យ៉ាណាក៏ដោយក៏នៅតែអាចឆ្លៀតពេលធ្វើអ្វីដែលយើងស្រឡាញ់ ទោះជាការងារស្ម័គ្រចិត្តក៏ពិតមែន ប៉ុន្តែត្រូវធ្វើជាមួយទំនួលខុសត្រូវ។ ចំពោះការងារស្ម័គ្រចិត្តនេះ រូបគេ ធ្វើនៅផ្នែករដ្ឋបាល ដែលជា ការងារមុនពេលកម្មវិធី និងក្រោយកម្មវិធី ទើបអាចចូលរួមជួយកម្មវិធីផង និងមានពេលវេលារៀនសូត្រផង។

កញ្ញា អ៊ាង ណាវីត ក៏បានលើកទឹកចិត្តឱ្យយុវជនទាំងអស់ងាកមកចាប់អារម្មណ៍ការងារស័គ្រចិត្ត ព្រោះវាអាចជួយឱ្យយើងទទួលបានអ្វីលើសពីការរៀននៅក្នុងសាលា រួមមាន ទី១. បង្កើនទំនាក់ទំនង ទី២. រៀនជំនាញទន់ ការចេះសហការក្រុម ការត្រិះរិះពិចារណា ការរៀនរស់នៅចុះសម្រុងជាមួយអ្នកដទៃ និងទី៣. អភិវឌ្ឍសមត្ថភាព។ លើសពីនេះ ជួយឱ្យសុខភាពផ្លូវចិត្តរឹងមាំជាងមុន ព្រោះមនុស្សមានអត្តចរិតខុសៗគ្នា ធ្វើឱ្យយើងចេះបើកចិត្តទូលាយជាងមុន និងមិនប្រកាន់ច្រើន។ ចំណែក កញ្ញា ផន ម៉ាន់ស៊ី លើកទឹកចិត្តឱ្យយុវជនទាំងអស់សាកល្បងចូលរួមក្នុងការងារស័្មគ្រចិត្ត ដើម្បីទទួលបានចំណេះដឹង ការសហការក្រុម ទំនាក់ទំនង ការនិយាយស្ដី សីលធម៌ និងមានឥរិយាបថល្អក្នុងការរស់នៅប្រចាំថ្ងៃ។ លើសពីនេះ ការអភិវឌ្ឍជំនាញ ការអនុវត្តការងារជាក់ស្ដែង ពង្រឹងសមត្ថភាពឱ្យកាន់តែខ្ពស់ មានទំនួលខុសត្រូវខ្ពស់ជាងមុន និងអាចអភិវឌ្ឍខ្លួនឱ្យកាន់តែល្អទៅមុខទៀត។ ម៉ាន់ស៊ី ថា «ឮគេនិយាយមួយរយដង មិនស្មើនឹងបានជួយដោយផ្ទាល់បានម្ដង ដើម្បីដឹងអំពីការងារស្ម័គ្រចិត្ត»។

ជាមួយគ្នានេះ កញ្ញា អ៊ាង ណាវីត និងកញ្ញា ផន ម៉ាន់ស៊ី លើកឡើងដូចគ្នាថា​ ក្រោយចប់កម្មវិធីជជែកដេញដោលយុវជនថ្នាក់ជាតិ ឆ្នាំ២០២៤នេះ រូបគេក៏នៅតែចូលរួមជួយកម្មវិធីនៅឆ្នាំក្រោយៗទៀត ប៉ុន្តែអាស្រ័យលើពេលវេលាជាក់ស្ដែង ប្រសិនបើមានកិច្ចការរវល់ ក៏អាចនៅតែឆ្លៀតពេលចូលរួមជួយ ដើម្បីអភិវឌ្ឍសមត្ថភាពបន្ថែមទៀត៕