ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
មិនចាញ់បរទេសនោះឡើយ ពេលនេះយុវជនមួយក្រុមដែលជាសិស្សកំពុងសិក្សាជំនាញបច្ចេកទេស នៅវិទ្យាស្ថានពហុបច្ចេកទេសព្រះកុសមៈ កំពុងតែតម្លើង និងអភិវឌ្ឍមនុស្សយន្ត ដែលអាចនិយាយឆ្លងឆ្លើយជាមួយមនុស្សបានរហូតដល់ទៅ ៦ភាសា ដោយប្រើប្រាស់បច្ចេកវិទ្យា AI ។ មនុស្សយន្តដ៏ឆ្លាតវៃនេះ គ្រោងនឹងបង្ហាញខ្លួន ក៏ដូចជាសមត្ថភាព នៅក្នុង វាជាតិអប់រំបណ្តុះបណ្តាលបច្ចេកទេស និងវិជ្ជាជីវៈ លើកទី៧ ដែលនឹងប្រព្រឹត្តទៅនៅថ្ងៃទី១៥ និងថ្ងៃទី១៦ ខែមិថុនា ខាងមុខ។
លោក ជ្រិន ជីវ៉ា គ្រូបច្ចេកទេស ដែលដឹកនាំការអភិវឌ្ឍមនុស្សយន្តនេះ លើកឡើងថា តាមពិតទៅកាលពីឆ្នាំ២០១៩ វិទ្យាស្ថានពហុបច្ចេកទេសព្រះកុសមៈ ធ្លាប់បានដឹកនាំសិស្សក្នុងការបង្កើតមនុស្សយន្តជំនាន់ទី១ រួចហើយ តែនៅក្នុងឆ្នាំ២០២៤នេះ យើងក៏ចាប់ផ្តើមបង្កើតមនុស្សយន្តជំនាន់ទី២ ដោយផ្តើមតាំងពីដើមឆ្នាំមកម្ល៉េះ ហើយបច្ចុប្បន្នកំពុងធ្វើតេស្តសាកល្បង។ លោក ជីវ៉ា បញ្ជាក់ថា មនុស្សយន្តជំនាន់ថ្មីនេះ ត្រូវបានដាក់ឈ្មោះឱ្យថា “វិជ្ជា”។
ចំពោះបច្ចេកវិទ្យា នៃការផលិត និងអភិវឌ្ឍ បើតាមលោក ជ្រិន ជីវ៉ា មនុស្សយន្តជំនាន់ថ្មីនេះ មានរូបរាងខាងក្រៅប្រែប្រួលទៅលើផ្នែកស្រោមមុខ ពោលគឺត្រូវអភិវឌ្ឍជាមនុស្សយន្តទាំងស្រុង, មនុស្សយន្តនេះអាចបំផ្លាស់ទីដោយប្រើប្រាស់កង់ ហើយការផ្លាស់ទី អាចប្រែប្រួល និងអាចគេចឧបស័គ្គដែលជួបដោយចៃដន្យថែមទៀត។ លោក ជីវ៉ា បន្ថែមថា បច្ចេកវិទ្យាខាងក្នុងដែលប្រើប្រាស់នៅក្នុងមនុស្សយន្តនេះ គឺ AI (បញ្ញាសិប្បនិម្មិត) ដោយវាអាចស្គាល់នូវមុខមនុស្ស ហើយអាចចងចាំនូវទិន្នន័យដែលមនុស្សយន្តនេះបានជួបថែមទៀត។
អ្វីដែលពិសេសថែមទៀតនោះ មនុស្សយន្តជំនាន់ថ្មីដែលអភិវឌ្ឍដោយសិស្សនិស្សិតនៃវិទ្យាស្ថានពហុបច្ចេកទេសព្រះកុសមៈនេះ គឺអាចឆ្លើយឆ្លងជាមួយមនុស្សបាន ក្នុងភាសារហូតដល់ទៅ៦ មានដូចជា ភាសាខ្មែរ, អង់គ្លេស, ជប៉ុន, ចិន, វៀតណាម ហើយនិងភាសាថៃ។ បើតាមការរៀបរាប់របស់លោក ជីវ៉ា ពាក់ព័ន្ធនឹងប្រព័ន្ធនៃការឆ្លើយឆ្លង មនុស្សយន្តនេះ ធ្វើការស្រូបសំឡេង និងស្តាប់មានភាពសុក្រឹត្យ ពិសេសគឺអាចឆ្លើយនូវគ្រប់សំណួរ និងបញ្ហាដែលយើងឆ្ងល់ទាក់ទងទៅនឹងវិទ្យាសាស្រ្ត ប្រវត្តិសាស្រ្ត ឬការគណនាគណិតវិទ្យាកម្រិតល្មមៗបាន។
រ៉ូបូតនេះ វានឹងរៀនពីយើងពីមួយថ្ងៃទៅមួយថ្ងៃ បើយើងព្យាយាមផ្តល់ជាសំណួរ ឬក៏ផ្តល់ជាចម្លើយឱ្យវាកាន់តែច្រើន រ៉ូបូតនេះ អាចឆ្លើយជាមួយយើងកាន់តែល្អ ហើយលឿនជាងមុនទៅទៀត…
លោក ជ្រិន ជីវ៉ា
ពាក់ព័ន្ធជាមួយនឹងគំនិត ដែលនាំឱ្យមានការអភិវឌ្ឍមនុស្សយន្តជំនាន់ថ្មី ដោយប្រើប្រាស់បច្ចេកវិទ្យា AI នេះឡើង លោក ជ្រិន ជីវ៉ា មានប្រសាសន៍ថា នៅវិទ្យាស្ថានពហុបច្ចេកទេសព្រះកុសមៈ មានបន្ទប់ស្រាវជ្រាវ ដែលបង្កើតឡើងដើម្បីជួយសិស្សឱ្យមានបទពិសោធន៍ជាមួយគ្រឿងអេឡិចត្រូនិក ជាមួយវិស័យអគ្គិសនី និងផ្នែកប្រព័ន្ធអេឡិចត្រូនិក ត្រៀមខ្លួនដើម្បីចូលប្រឡូកក្នុងការងារបន្ទាប់ពីរៀនចប់ ។ ក្នុងនោះ ការផលិតមនុស្សយន្ត ឬរ៉ូបូត វាជាផ្នែកមួយនៃការស្រាវជ្រាវ ហើយក៏ចង់បង្ហាញពីផលិតផល និងទិន្នផលដែលសិស្សនិស្សិតយើងមានលទ្ធភាពក្នុងការធ្វើ។
លោក ជ្រិន ជីវ៉ា បន្តថា បច្ចុប្បន្ន សូម្បីតែកាមេរ៉ា ម៉ាស៊ីនទឹកក្តៅ ឬម៉ាស៊ីនបោកខោអាវ ក៏យើងតែងលឺពាក្យ AI ដែរ, ដូច្នេះ បើសិនជាសម័យកាលដែលគេកំពុងតែប្រែប្រួលទៅកាន់ AI តែយើងមិនព្យាយាមតាម និងអនុវត្តស្វែងយល់សិក្សាពីប្រព័ន្ធ AI ទេ នោះយើងក៏មិនអាចតាមទាន់សម័យកាលដែរ ។ ក្នុងនោះ ដើម្បីបង្ហាញពីសមត្ថភាពរបស់វិទ្យាស្ថាន និងការស្រាវជ្រាវរបស់និស្សិត ទើបយើងបានដាក់រាល់បច្ចេកវិទ្យា និងការស្វែងយល់សិក្សាពីផ្នែកអេឡិចត្រូនិក និងមេកានិកជាច្រើន យកមកបង្កើតបានជាមនុស្សយន្តនេះ ។ « អញ្ចឹងរ៉ូបូតមួយនេះអាចបង្ហាញឱ្យឃើញថា ទាំងការគិត ទាំងការសម្រេចចិត្ត និងការធ្វើការរបស់វា គឺសុទ្ធតែស្វ័យប្រវត្តិ គ្រប់គ្រងដោយប្រព័ន្ធ AI ទាំងអស់ »។
យុវជន សេង សុខហៀង និស្សិតឆ្នាំទី៥ ផ្នែកអគ្គិសនី នៃវិទ្យាស្ថានពហុបច្ចេកទេសព្រះកុសមៈ ដែលបានចូលរួមក្នុងការអភិវឌ្ឍមនុស្សយន្ត “វិជ្ជា” លើកឡើងថា ក្នុងការចូលរួមអភិវឌ្ឍមនុស្សយន្តនេះ បានជួយខ្លួនក្នុងការអភិវឌ្ឍសមត្ថភាពទៅលើជំនាញដែលខ្លួនបានរៀន ព្រមជាមួយចំណេះដឹងពីបច្ចេកវិទ្យា AI ហើយ សុខហៀង សង្ឃឹមថា អ្វីដែលជាចំណេះដឹងថ្មីនេះ គឺជាមូលដ្ឋានសម្រាប់ខ្លួនក្នុងវិស័យឧស្សាហកម្ម ឬក៏សង្វាក់ផលិតកម្មស្វ័យប្រវត្តិផ្សេងៗ ដូចជាប្រព័ន្ធវេចខ្ចប់ ប្រព័ន្ធតម្លើង ឬក៏ប្រព័ន្ធផ្សេងៗទៀតដែលកំពុងប្រើប្រាស់ប្រព័ន្ធបច្ចេកវិទ្យាទំនើប៕
