ក្នុង​ឱកាស​ពិធីបុណ្យ​ចូលឆ្នាំថ្មីប្រពៃណីជាតិ ដែល​នឹង​ប្រព្រឹត្ត​ទៅ​ពីថ្ងៃទី១៣ ដល់ថ្ងៃទី១៦ ខែមេសា ឆ្នាំ​២០២៤ គណៈកម្មាធិការជាតិសុវត្ថិភាព​ចរាចរណ៍ផ្លូវគោក បានធ្វើការ​អំពាវនាវ​ដល់សាធារណៈជនជាអ្នក​ប្រើប្រាស់ផ្លូវ​ទាំងអស់ សូម​ខិតខំយកចិត្តទុកដាក់បង្ការ និង​ទប់ស្កាត់​គ្រោះថ្នាក់ចរាចរណ៍។

ការអំពាវនាវនេះ ធ្វើឡើងក្រោយមានការ​កត់សម្គាល់ថា គ្រោះថ្នាក់ចរាចរណ៍ផ្លូវគោកតែងតែមានកំណើនខ្ពស់​នៅ​រាល់​ឱកាស​ពិធីបុណ្យផ្សេងៗ ដែលបាន​បណ្តាល​ឱ្យ​មានកំណើនជនរងគ្រោះជាអតិបរមា និង​មានការ​ខូចខាតទ្រព្យសម្បត្តិជាច្រើន ហើយភាគច្រើន​នៃគ្រោះថ្នាក់ចរាចរណ៍នោះ បណ្តាល​មក​ពី​ការ​បើកបរយានយន្ត​មិន​គោរព​ច្បាប់ ឬធ្វេសប្រហែសដូចជា បើកបរ​លើសល្បឿន​កំណត់ ជែងក្នុងស្ថានភាពគ្រោះថ្នាក់ បើកបរ​ក្នុង​ស្ថានភាពស្រវឹង និង​មិន​គោរព​សិទ្ធិអាទិភាពជាដើម។

យ៉ាងណាក៏ដោយ ក្នុង​ឱកាស​នៃពិធីបុណ្យចូលឆ្នាំនេះ គណៈកម្មាធិការជាតិសុវត្ថិភាពចរាចរណ៍ផ្លូវគោក ស្នើ​ដល់អ្នក​ប្រើប្រាស់ផ្លូវ សូមអនុវត្តនូវវិធានការដូចជា ៖ ត្រូវពាក់មួកសុវត្ថិភាពជានិច្ច ក្នុងពេលធ្វើដំណើរតាមទោចក្រ​យានយន្តទោះជិត ឬឆ្ងាយ គ្រប់ពេលវលា, មិនត្រូវបើកបរលើសល្បឿនកំណត់ជាដាច់ខាត និងបន្ថយល្បឿន ឬឈប់នៅផ្លូវប្រសព្វ, មិនត្រូវបើកបរក្រោយពេលពិសារគ្រឿងស្រវឹង និងជាដាច់ខាតមិនប្រើប្រាស់គ្រឿងញៀន។

ត្រូវគោរពសិទ្ធិអាទិភាព គោរពសញ្ញាចរាចរណ៍ និងប្រកាន់ស្ដាំជានិច្ច, ត្រូវពាក់ខ្សែក្រវាត់សុវត្ថិភាពជានិច្ច ក្នុងពេលធ្វើដំណើរតាមរថយន្ត, មិនត្រូវបត់ ឬវ៉ាជែងក្នុងភាពប្រថុយ់ប្រថាន ឬប្រើទូរស័ព្ទដោយគ្មានឧបករណ៍សំឡេងភ្ជាប់ទំនាក់ទំនង, ត្រូវត្រួតពិនិត្យលក្ខណបច្ចេកទេសយានយន្តជាប្រចាំ ពិសេសត្រួតពិនិត្យកង់ ចង្កូត ហ្វាំងភ្លើងបំភ្លឺ។ល។

ចំពោះរថយន្តដឹកអ្នកដំណើរ ឬដឹកកម្មករ មិនត្រូវ ផ្ទុកអ្នកដំណើរ ឬកម្មករលើដំបូល និងដាក់ឥវ៉ាន់សំពីងសំពោង និងសូមមេត្តាកុំដំឡើងថ្លៃ ធ្វើដំណើរក្នុងឱកាសនេះ, មិនត្រូវបើកបរក្នុងស្ថានភាពងងុយដេកជាដាច់ខាត, ត្រូវបើកបរក្នុងស្មារតីប្រុងប្រយ័ត្នជានិច្ច ប្រកបដោយសីលធម៌យោគយល់អធ្យាស្រ័យ, មិនត្រូវលេងគប់ទឹក ឬប៉ាតម្សៅដល់អ្នកប្រើប្រាស់ផ្លូវ។

គួរ​បញ្ជាក់ដែរថា បើយោង​តាម​របាយការណ៍របស់អគ្គស្នងការនគរបាលជាតិ កាលពីកំឡុង​ពិធីបុណ្យ​ចូលឆ្នាំប្រពៃណីជាតិខ្មែរ​កាលពីឆ្នាំ​២០២៣ ក្នុងរយៈពេល​៣ថ្ងៃ មានករណីគ្រោះថ្នាក់ចរាចរណ៍​កើត​ឡើង​ចំនួន ៤៣ករណី ដែល​បណ្តាល​ឱ្យ​មាន​មនុស្ស​ស្លាប់១៨នាក់ និង​រងរបួស​ចំនួន៧៧នាក់៕