ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ប្រធានក្រុមប្រឹក្សាជាតិភាសាខ្មែរនៃរាជបណ្ឌិត្យសភាកម្ពុជា លោកបណ្ឌិត ហ៊ាន សុខុម បានលើកឡើងថា ពាក្យថ្មីៗដែលកើតមានក្នុងសង្គម ដូចជា «សាបៗ» ដែលកំពុងពេញនិយមក្នុងចំណោមយុវជន អាចមានអាយុកាលខ្លី និងបាត់ទៅវិញ ប្រសិនបើមិនមានការប្រើប្រាស់ និងគាំទ្របន្តពីសង្គម។
លោកបណ្ឌិត ហ៊ាន សុខុម បានលើកឡើងបែបនេះ ក្នុងឱកាសចូលរួមវេទិកាស្តីពី «ការប្រើភាសាខ្មែរឱ្យបានត្រឹមត្រូវ៖ នរណាជាអ្នកទទួលខុសត្រូវ?» ដែលរៀបចំដោយក្លិបអ្នកកាសែតកម្ពុជា (ក.អ.ក) សហការជាមួយក្រុមប្រឹក្សាជាតិភាសាខ្មែរ និងវិទ្យាស្ថានភាសាជាតិនៃរាជបណ្ឌិត្យសភាកម្ពុជា កាលពីថ្ងៃទី៣១ ខែសីហា ឆ្នាំ២០២៦។
លោកបណ្ឌិតបានពន្យល់ថា ភាសាតែងតែវិវត្តទៅតាមការផ្លាស់ប្តូររបស់សង្គម ហើយយុវជនក៏ជាផ្នែកមួយដែលមានតួនាទីក្នុងការបង្កើត និងប្រើប្រាស់ពាក្យថ្មីៗ។ ពាក្យមួយចំនួនអាចទទួលបានការពេញនិយមយ៉ាងឆាប់រហ័ស ប៉ុន្តែអាចបាត់ទៅវិញ នៅពេលមនុស្សលែងប្រើប្រាស់។
លោកបណ្ឌិតបានលើកឧទាហរណ៍ថា ពាក្យ «បែកស្លុយ» ធ្លាប់ទទួលបានការពេញនិយមក្នុងរយៈពេលមួយ ប៉ុន្តែក្រោយមកក៏ថយចុះ និងលែងសូវមានការប្រើប្រាស់។ លោកបញ្ជាក់ថា ផ្ទុយទៅវិញ ពាក្យខ្លះអាចបន្តរស់នៅក្នុងភាសា ប្រសិនបើសង្គមនៅតែប្រើប្រាស់ និងគាំទ្រ ជាពិសេសនៅពេលពាក្យនោះត្រូវបានអ្នកសារព័ត៌មានយកមកប្រើ និងផ្សព្វផ្សាយយ៉ាងទូលំទូលាយ។
ពាក់ព័ន្ធនឹងពាក្យ «សាបៗ» លោកបណ្ឌិតបានបញ្ជាក់ថា ក្រុមប្រឹក្សាជាតិភាសាខ្មែរមានការកត់ត្រាពាក្យមួយចំនួនដែលកើតមានក្នុងការប្រើប្រាស់ជាក់ស្តែង ដើម្បីសិក្សាពីប្រភព ដំណើរកើតមាន និងការប្រែប្រួលរបស់ពាក្យទាំងនោះតាមពេលវេលា។
លោកបណ្ឌិតក៏បានសង្កត់ធ្ងន់ពីឥទ្ធិពលរបស់បណ្តាញសង្គមលើការរីករាលដាលនៃពាក្យថ្មីៗ ដោយពាក្យមួយអាចត្រូវបានមនុស្សជាច្រើនយកទៅប្រើប្រាស់ក្នុងរយៈពេលដ៏ខ្លី។ ទន្ទឹមនឹងនេះ ការប្រើប្រាស់ភាសានៅលើបណ្តាញសង្គមក៏អាចមានការលាយបញ្ចូលគ្នារវាងភាសាខ្មែរ ភាសាបរទេស អក្សរឡាតាំង អក្សរកាត់ និងនិមិត្តសញ្ញាផ្សេងៗ។
លោកបានណែនាំឱ្យអ្នកប្រើប្រាស់ភាសាចេះបែងចែកឱ្យបានច្បាស់រវាងភាសាផ្លូវការ និងភាសាដែលប្រើប្រាស់ក្នុងជីវិតប្រចាំថ្ងៃ ដោយសារបរិបទនៃការប្រើប្រាស់ភាសាមានភាពខុសគ្នា។ លោកបញ្ជាក់ថា ការប្រើប្រាស់ពាក្យបរទេស ឬពាក្យថ្មីៗមួយចំនួន អាចកើតឡើងដោយសារបរិបទការងារ បច្ចេកវិទ្យា និងការទំនាក់ទំនងក្នុងសង្គម។
ជាមួយគ្នានេះ លោក ពុយ គា ប្រធានក្លិបអ្នកកាសែតកម្ពុជា ក៏បានសង្កេតឃើញថា បណ្តាញសង្គមពិតជាបានបង្កើតឱ្យមានការប្រើប្រាស់ពាក្យថ្មីៗជាច្រើន រួមទាំងពាក្យ «សាបៗ» ផងដែរ។ លោកបានបញ្ជាក់ថា ការទាមទារឱ្យអ្នកប្រើប្រាស់ភាសាទាំងអស់យកចិត្តទុកដាក់ និងចូលរួមថែរក្សា អភិរក្ស និងលើកកម្ពស់ការប្រើប្រាស់ភាសាខ្មែរឱ្យបានត្រឹមត្រូវ៕
