ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
រដ្ឋលេខាធិការក្រសួងកិច្ចការនារី លោកជំទាវ ហ៊ូ សាមិត្ត មានប្រសាសន៍ថា ការរៀបអាពាហ៍ពិពាហ៍នៅវ័យក្មេង ការរៀបអាពាហ៍ពិពាហ៍ដោយបង្ខំ និងការរស់ នៅជាមួយគ្នាជាប្តីប្រពន្ធវ័យក្មេង ជាការអនុវត្តបង្ករគ្រោះថ្នាក់ និងរំលោភបំពានសិទ្ធិកុមារ ក្មេងស្រី និងស្រ្តី ជាពិសេសសិទ្ធិសុខភាពផ្លូវភេទ សិទ្ធិសុខភាពបន្តពូជ និងរារាំងដល់ក្មេងស្រី និងស្រ្តី ក្នុងការទទួលបាន ឱកាសអប់រំ ការចូលរួមក្នុងសង្គម សិទ្ធិអំណាចផ្នែកសេដ្ឋកិច្ច ដែលកត្តាទាំងអស់នេះហើយ បណ្តាលឱ្យក្មេងស្រី ជួបប្រទះ អំពើហិង្សា ហើយជះឥទ្ធិពលដល់ការអភិវឌ្ឍធនធានមនុស្ស និងសង្គមជាតិ។
ដើម្បីបង្កើនល្បឿន ការអនុវត្តការងារបង្ការទប់ស្កាត់អាពាហ៍ពិពាហ៍នៅវ័យក្មេង និងការមានផ្ទៃពោះនៅវ័យជំទង់ បើតាមប្រសាសន៍លោកជំទាវរដ្ឋលេខាធិការ គឺទាមទារឱ្យក្រសួង ស្ថាប័ន និងអង្គការ ដៃគូពាក់ព័ន្ធមួយចំនួន ត្រូវរួមគ្នាគិត អនុវត្ត ការពារ និងដោះស្រាយជាមួយគ្នា ដើម្បីឱ្យអាត្រានៃការរៀបចំអាពាហ៍ពិពាហ៍នៅវ័យក្មេង និងការមានផ្ទៃពោះវ័យនៅជំទង់មានការថយចុះនៅកម្រិតទាបបំផុត។
អាពាហ៍ពិពាហ៍នៅវ័យក្មេង គឺជាទម្រង់មួយនៃការកេងប្រវ័ញ្ច និងអំពើហិង្សាលើកុមារ ទោះបីអាត្រា នៃការរៀបអាពាហ៍ពិពាហ៍ក្នុងវ័យក្មេងនៅប្រទេសកម្ពុជា មិនខ្ពស់បំផុតនៅក្នុងតំបន់ក៏ដោយ ប៉ុន្តែវាជាប្រធានបទដ៏មានសារៈសំខាន់ ដែលគួរឱ្យចាប់អារម្មណ៍ និងយកចិត្តទុកដាក់។
លោក លោកជំទាវ ហ៊ូ សាមិត្ត រដ្ឋលេខាធិការក្រសួងកិច្ចការនារី
លោកស្រី គ្វី នេតវ៉ង់ នាយិកាអង្គការភ្លែនអន្តរជាតិកម្ពុជា បានឱ្យដឹងថា កម្ពុជាជាប្រទេសក្នុងចំណាត់ថ្នាក់ទីពីរ ដែលមានអត្រាប្រេវ៉ាឡង់អាពាហ៍ពិពាហ៍កុមារខ្ពស់ជាងគេក្នុងតំបន់អាស៊ានគឺ ១៩% ហើយការគ្រោះថ្នាក់ដោយសារតែការរៀបអាពាហ៍ពិពាហ៍នៅវ័យក្មេង បានជះឥទ្ធិពលទៅកាន់ ការរំលោភលើសិទ្ធិកុមារ រួមទាំងស្ត្រីនិងក្មេងស្រី ព្រមទាំងជាឧបសគ្គរារាំងដល់ការអភិវឌ្ឍនៃធនធានមនុស្សជាទូទៅ។ ដែលជាហេតុ អង្គការភ្លែនអន្តរជាតិកម្ពុជា ក្លាយជាចំណែកមួយនៃការចូលរួម ដោះស្រាយបបញ្ហានេះ ជាពិសេសបន្តគាំទ្ររាជរដ្ឋាភិបាលនៃប្រទេសនីមួយៗក្នុងតំបន់អាស៊ី ដើម្បីពន្លឿនកិច្ចការទាំងនេះ។
ជាមួយគ្នានេះ លោកស្រី លើកទឹកចិត្តដល់ភាគីពាក់ព័ន្ធ ជាពិសេសក្រសួង ស្ថាប័នជាតិ អង្គការជាតិ អន្តរជាតិ និងស្ថាប័នឯកជន ចូលរួមក្នុងជួយអភិវឌ្ឍ និងអនុវត្តនូវផែនការយុទ្ធសាស្រ្តនារីរតនៈរបស់ក្រសួងកិច្ចការនារី។
បើយោងតាមរបាយការណ៍សិក្សាស្រាវជ្រាវស្តីពី “ការរៀបអាពាហ៍ពិពាហ៍នៅវ័យក្មេង ការរៀបអាពាហ៍ពិពាហ៍ដោយបង្ខំ និងការរស់នៅជាប្តីប្រពន្ធនៅវ័យក្មេង” ដែលធ្វើឡើងនៅក្នុងខេត្តគោលដៅចំនួន៩ បានរកឃើញថា ប្រមាណជាពីរភាគរយ នៃស្រ្តីវ័យក្មេងដែលមានអាយុចន្លោះពី ១៥ ទៅ១៩ឆ្នាំ បានរៀបអាពាហ៍ពិពាហ៍មុនពេលដែលពួកគេមានអាយុ១៥ឆ្នាំ។ លើសពីនេះ ក៏សង្កេតឃើញថា មានតិចជាងមួយភាគរយ នៃស្រ្តីវ័យក្មេងទាំងនេះ ដែលបានផ្តល់កំណើត និងមានបទពិសោធន៍ក្នុងការពរពោះនៅក្នុងអាយុនេះ។ ប្រេវ៉ាឡង់ នៃស្រ្តីមានផ្ទៃពោះនៅវ័យជំទង់ក្នុងចំណោមស្រ្តីវ័យក្មេងដែលមានអាយុ១៥-១៩ឆ្នាំ គឺមាននិន្នាការកើនឡើងទៅតាមកំណើននៃអាយុជាមួយអត្រា ១% ក្នុងចំណោមស្រ្តីដែលមានអាយុ ១៥ឆ្នាំ ទៅ៣០% ក្នុងចំណោមស្រ្តីដែលមានអាយុ១៩ឆ្នាំ។
ចំពោះបុរសវិញ មានតែ ០.២២% បានរាយការណ៍ថា បានរៀបអាពាហ៍ពិពាហ៍នៅមុនពេលមានអាយុ១៥ឆ្នាំ ប្រមាណ ២.៩៦% បានរៀបអាពាហ៍ពិពាហ៍នៅពេលមានអាយុចន្លោះពី ១៥ឆ្នាំ ដល់១៨ឆ្នាំ និងចំនួន ៦១.៤១% រៀបអាពាហ៍ពិពាហ៍ក្រោយអាយុ១៨ឆ្នាំ៕
