ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
របាយការណ៍របស់ក្រសួងការងារ និងបណ្តុះបណ្តាលវិជ្ជាជីវៈ ដែលបានចេញផ្សាយកាលពីចុងសប្តាហ៍នេះបង្ហាញថា គិតត្រឹមខែកញ្ញា ឆ្នាំ២០២៥ មានយុវជនចំនួន ១៤២ ៩៧៥នាក់ បានចុះឈ្មោះចូលរៀនកម្មវិធីបណ្តុះបណ្តាលជំនាញ និងវិជ្ជាជីវៈរបស់រាជរដ្ឋាភិបាល ១,៥លាននាក់ (TVET 1.5M) ខណៈសិស្សកំពុងតែស្ថិតក្នុងវគ្គសិក្សាសម្រាប់កម្មវិធីនេះ មានចំនួន ២៤ ០៦២នាក់។
លោក ស៊ុន មេសា អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ មានប្រសាសន៍ថា ក្នុងការចុះឈ្មោះចូលរៀនកម្មវិធី TVET ១,៥លាននាក់ របស់រាជរដ្ឋាភិបាល យុវជនបានចាប់អារម្មណ៍ចុះឈ្មោះចូលរៀនទៅលើវិស័យចំនួន៥ច្រើនជាងគេ គឺ ទី១ វិស័យធុរកិច្ច និងព័ត៌មានវិទ្យា មានអ្នកស្នើចុះឈ្មោះចូលរៀន ២៨ ៣២០នាក់ ទី២ វិស័យទេសចរណ៍មានអ្នកស្នើចុះឈ្មោះចូលរៀន ២២ ២០៨នាក់ ទី៣ វិស័យសំណង់មានអ្នកស្នើចុះឈ្មោះចូលរៀន ២១ ៣៣៣នាក់ ទី៤ វិស័យកសិកម្ម និងកសិ-ឧស្សាហកម្មមានអ្នកស្នើចុះឈ្មោះចូលរៀន ១៧ ៥៣៦នាក់ និងទី៥ វិស័យសេវាកម្មមានអ្នកស្នើចុះឈ្មោះចូលរៀន ១៧ ២៥៧នាក់។
ដើម្បីបំពេញតម្រូវការទីផ្សារការងារបច្ចុប្បន្ន និងអនាគត និងផ្តល់ឱកាសដល់យុវជនមកពីគ្រួសារក្រីក្រ និងគ្រួសារងាយរងហានិភ័យ ព្រមទាំងកម្មករនិយោជិក និងប្រជាពលរដ្ឋទូទៅ ក្លាយជាកម្លាំងពលកម្មជំនាញប្រកបដោយសមត្ថភាព និងផលិតភាពខ្ពស់ ដែលជាចំណុចស្នូលសម្រាប់ការអភិវឌ្ឍសង្គម និងសេដ្ឋកិច្ច សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី កាលពីថ្ងៃទី១៤ ខែវិច្ឆិកា ឆ្នាំ២០២៣ បានដាក់ឱ្យអនុវត្តជាផ្លូវការ «កម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេសសម្រាប់យុវជនមកពីគ្រួសារក្រីក្រ និងគ្រួសារងាយរងហានិភ័យ» ដោយមិនបង់ថ្លៃ និងទទួលបានប្រាក់ឧបត្ថម្ភប្រចាំខែ លើវិស័យចំនួន១០ និងជំនាញអាទិភាពចំនួន ៤៥មុខជំនាញ ដើម្បីឱ្យប្រជាពលរដ្ឋម្នាក់មានជំនាញមួយយ៉ាងតិចប្រចាំជីវិត និងអាចប្រកបមុខរបរការងារ សម្រាប់ចិញ្ចឹមជីវិត ព្រមទាំងអាចរកចំណូលប្រចាំថ្ងៃបានបន្ថែមទៀត។
បើតាមលោក ស៊ុន មេសា មកទល់ពេលនេះ មានសិស្សចំនួន ៦៣ ៦២៧នាក់ បានបញ្ចប់ការសិក្សាពីកម្មវិធី TVET ១,៥លាននាក់ ហើយសិស្សដែលទទួលបានការងារធ្វើមានចំនួន ៣២ ៣០១នាក់។ លោកបញ្ជាក់ថា ក្នុងចំណោមសិស្សកំពុងរៀន សិស្សបញ្ចប់ការសិក្សា និងសិស្សដែលទទួលបានការងារធ្វើនេះ អ្នកមានបណ្ណសមធម៌សរុបមានជំនួន ៥៩ ៣៦៧នាក់៕
