ក្រសួងប្រៃសណីយ៍ និងទូរគមនាគមន៍ ប្រកាសពីការរៀបចំការប្រកួតប្រជែងសរសេរសំបុត្រថ្នាក់ជាតិលើកទី៣ ឆ្នាំ២០២៤ ដើម្បីផ្តល់ឱកាសឱ្យសិស្សានុសិស្សបង្ហាញស្នាដៃនៃការសរសេររបស់ខ្លួន និងដើម្បីចូលរួមចំណែកក្នុងការលើកកម្ពស់គំនិតច្នៃប្រឌិត ទេព្យកោសល្យនៃការសរសេរ ព្រមទាំងជំរុញការយល់ដឹង និងការប្រើប្រាស់សេវាប្រៃសណីយ៍នៅកម្ពុជា។

ការប្រកួតប្រជែងសរសេរសំបុត្រថ្នាក់ជាតិលើកទី៣ ឆ្នាំ២០២៤នេះ ធ្វើឡើងក្រោមប្រធានបទ “រយៈពេល ១៥០ឆ្នាំ សហភាពប្រៃសណីយ៍សកលបានបម្រើមនុស្សជុំវិញពិភពលោកជាង ៨ជំនាន់។ ចាប់តាំងពីពេលនោះមកពិភពលោកបានផ្លាស់ប្តូរយ៉ាងខ្លាំង។ ចូរសរសេរសំបុត្រទៅមនុស្សជំនាន់ក្រោយអំពីពិភពលោកដែលអ្នកសង្ឃឹមថា ពួកគេទទួលមរតក”។

សម្រាប់លក្ខណ្ឌនៃការចូលរួម គឺសិស្សានុសិស្សត្រូវមានសញ្ជាតិខ្មែរ និងអាយុពី៩ ដល់១៥ឆ្នាំ (គិតត្រឹមថ្ងៃទី១ ខែឧសភា ឆ្នាំ២០២៤)។ សរសេរសំបុត្រដោយដៃ ជាភាសាខ្មែរ (មិនលើសពី៤ទំព័រ) ឬភាសាអង់គ្លេស(មិនលើសពី២ទំព័រ)។

នីតិវិធីនៃការវាយតម្លៃ រួមមាន អ្នកចូលរួមត្រូវសរសេរសំបុត្រដោយខ្លួនឯងផ្ទាល់។ សំបុត្រដែលផ្ញើក្រោយថ្ងៃកំណត់ ឬមានខ្លឹមសារលិខិតដែលលួចចម្លងទាំងស្រុង ឬដោយផ្អែកពីអត្ថបទផ្សេងៗ ពុំត្រូវបានវាយតម្លៃ។ ទន្ទឹមគ្នានេះ ការជ្រើសរើសនឹងត្រូវធ្វើជា ២ដំណាក់កាល គឺទី១. អត្ថបទដែលចូលរួមទាំងអស់នឹងត្រូវគណៈកម្មការវាយតម្លៃ និងដាក់ពិន្ទុផ្អែកលើ​ ឆ្លើយត្រូវប្រធានបទ ទេពកោសល្យនៃការសរសេរ គំនិតច្នៃប្រឌិត, ទី២. ជ័យលាភីដែលទទួលបានពិន្ទុខ្ពស់ជាងគេចំនួន១០រូប នឹងត្រូវបានសម្ភាសន៍ ដើម្បីជ្រើសរើសជ័យលាភីលេខ១ ដល់លេខ៣។

បេក្ខជនជ័យលាភីនឹងទទួលបានរង្វាន់លើកទឹកចិត្ត រួមមាន ជ័យលាភីលេខ១ ទទួលថវិកា ៣លានរៀល  មេដាយ ១គ្រឿង  កាបូប១  និងសៀវភៅតែមប្រិ៍១ ឈុត, ជ័យលាភីលេខ២ ទទួលថវិកា ២លានរៀល មេដាយ ១គ្រឿង កាបូប១  និងសៀវភៅតែមប្រិ៍១ ឈុត, ជ័យលាភីលេខ៣ ទទួលថវិកា ១លានរៀល   មេដាយ ១គ្រឿង កាបូប១  និងសៀវភៅតែមប្រិ៍១ ឈុត។ ក្នុងនោះ ជ័យលាភីលេខ១ នឹងត្រូវជ្រើសរើសឱ្យចូលរួមជាតំណាងរបស់កម្ពុជា នៅក្នុងកម្មវិធីប្រកួតប្រជែងសរសេរសំបុត្រអន្តរជាតិលើកទី៥៣ ដែលរៀបចំដោយសហភាពប្រៃសណីយ៍សកល (Universal Postal Union-UPU)។

សិស្ស និស្សិត និងសាធារណៈជនដែលចាប់អារម្មណ៍ អាចផ្ញើពាក្យចុះឈ្មោះចូលរួមប្រកួត និងអត្ថបទសំណេរ តាមរយៈប្រៃសណីយ៍កម្ពុជាដោយឥតគិតថ្លៃ ឬសេវាបញ្ញើឆាប់រហ័សឯកជនណាមួយ ត្រឹមថ្ងៃទី២៥ ខែមីនា ឆ្នាំ២០២៤ មកអាសយដ្ឋាន ក្រសួងប្រៃសណីយ៍និងទូរគមនាគមន៍ អគ្គនាយកដ្ឋានប្រៃសណីយ៍ អគារលេខ១៣ មហាវិថីព្រះមុនីវង្ស សង្កាត់ស្រះចក រាជធានីភ្នំពេញ ១២០២១០។ អ្នកចូលរួមប្រកួតអាចរកមើលគំរូសរសេរសំបុត្រតាមរយៈ  កម្រងសំបុត្រជ័យលាភីរបស់សហភាពប្រៃសណីយ៍សកល ពីឆ្នាំ១៩៧១ ដល់ឆ្នាំ ២០២២ ៕