ក្រសួងមុខងារសាធារណៈ​ បានប្រកាស​ថា គណៈកម្មាធិការ​រៀបចំការ​ប្រឡង​ប្រជែង​ជ្រើសរើស​មន្រ្តីរាជការ បានសម្រេច​ជ្រើសរើស​គ្រូបង្រៀន​នៅ​អនុវិទ្យាល័យ ឱ្យ​ចូល​បម្រើ​ការងារ​ក្នុងក្របខណ្ឌ​គ្រូបង្រៀន នៃក្រសួងអប់រំ យុវជន និងកីឡា ចំនួន ៤៤១នាក់។

បើតាមសេចក្តីជូនដំណឹង គ្រូបង្រៀនដែលត្រូវជ្រើសរើស គឺតាម​ប្រព័ន្ធបណ្តុះបណ្តាល បរិញ្ញាបត្រ+១ ជំនាន់ទី១ ចំនួន ១០៩នាក់, តាមប្រព័ន្ធបណ្តុះបណ្តាល ១២+៤ ជំនាន់ទី៤ ចំនួន ៨៩នាក់ និង តាមប្រព័ន្ធបណ្តុះបណ្តាល ១២+២ ជំនាន់ទី៣២ ចំនួន ២៤៣នាក់ ។ ការបណ្តុះបណ្តាល​មានរយៈពេល១ឆ្នាំ ៤ឆ្នាំ និង២ឆ្នាំ ដោយចាប់ផ្តើម​នៅ​ដើម​ឆ្នាំ​២០២៤ នៅតាមវិទ្យាស្ថាន​គរុកោសល្យ និង​មជ្ឈមណ្ឌល​គរុកោសល្យ​ភូមិភាគ។

លក្ខខណ្ឌ នៃការជ្រើសរើស ៖ បេក្ខជន​ត្រូវមានសញ្ជាតិខ្មែរ, បេក្ខជន​ត្រូវ​មានកម្រិតវប្បធម៌​ចាប់ពីសញ្ញាបត្រ​មធ្យម​សិក្សា​ទុតិយភូមិ ឬសញ្ញាបត្រ​សមមូល ឬសញ្ញាបត្រ​បច្ចេកទេស​វិជ្ជាជីវៈ កម្រិត៣ សម្រាប់ប្រព័ន្ធបណ្តុះបណ្តាល ១២+២ និង ១២+៤ និងសញ្ញាបត្រ​បរិញ្ញាបត្រ​ឡើង​ទៅ​សម្រាប់ប្រព័ន្ធបណ្តុះបណ្តាល​បរិញ្ញាបត្រ+១ ។

បេក្ខជន​ត្រូវ​មានអាយុយ៉ាងតិច១៦ឆ្នាំ និងអាយុយ៉ាងច្រើន​បំផុត​ គិត​ត្រឹម​ថ្ងៃទី១៥ ខែមីនា ឆ្នាំ​២០២៤ តាមលក្ខខណ្ឌ​ដូចជា ៖ បេក្ខជន​មានសញ្ញាបត្រ​បណ្ឌិត ត្រូវបានលើក​លែង​លក្ខខណ្ឌអាយុ, បេក្ខជនមានសញ្ញាបត្រ​បរិញ្ញាបត្រ​ជាន់ខ្ពស់ ឬសញ្ញាបត្រ​សមមូល​ត្រូវ​មានអាយុ​ច្រើន​បំផុត ៤០ឆ្នាំ, បេក្ខជន​មានសញ្ញាបត្រ​បរិញ្ញាបត្រ ឬសញ្ញាបត្រ​សមមូល ត្រូវមានអាយុច្រើន​បំផុត ៣៥ឆ្នាំ, បេក្ខជន​មានសញ្ញាបត្រ​បរិញ្ញាបត្ររង ឬសញ្ញាបត្រ​សមមូល ត្រូវ​មាន​អាយុច្រើន​បំផុត ២៨ឆ្នាំ, បេក្ខជន​មានសញ្ញាបត្រមធ្យមសិក្សា​ទុតិយភូមិ ឬ​សញ្ញាបត្រសមមូល ត្រូវ​មានអាយុ​ច្រើន​បំផុត ២៥ឆ្នាំ, បេក្ខជន​ជាគ្រូបង្រៀន​ជាប់កិច្ចសន្យា​កំពុង​បង្រៀន​នៅបឋមសិក្សា មានអតីតភាព​យ៉ាង​តិច​៣ឆ្នាំជាប់ៗគ្នា ត្រូវ​មានអាយុ​ច្រើន​បំផុត ៤០ឆ្នាំ, បេក្ខជន​ជាមន្រ្តីរាជការ ត្រូវ​បានលើក​លែង​លក្ខខណ្ឌអាយុ។

បេក្ខជន​មិន​ត្រូវ​ប្រាស​ចាក​សិទ្ធិ​ខាងផ្លូវរដ្ឋប្បវេណី សិទ្ធិពលរដ្ឋ និង​សិទ្ធិខាងនយោបាយ, បេក្ខជន​ត្រូវ​ជ្រើសរើស​ប៉ុស្តិ៍​នៅ​តាមអនុវិទ្យាល័យ​ក្នុងរាជធានី ខេត្ត ដែលមាន​តម្រូវ​ការ​តាមមុខវិជ្ជា​ឯកទេស និងត្រូវ​ពិនិត្យ​អំពីស្ថានភាព​ទីតាំងសាលារៀន ដែលចង់ទៅបំពេញ​ការងារ​ឱ្យ​បានច្បាស់លាស់មុន​នឹង​សម្រេចចិត្ត​ជ្រើសរើស។ ចំពោះព័ត៌មានបន្ថែម បេក្ខជនអាចទាក់ទងជាមួយមន្ទីរអប់រំ យុវជន និងកីឡា រាជធានី ខេត្ត តាមគោលដៅ ដែលបានជ្រើសរើស។

ការលើកទឹកចិត្ត និងការផ្តល់អាទិភាពបេក្ខជន ៖ មានសញ្ញាបត្រមធ្យមសិក្សា​ទុតិយភូមិ​ទទួលបាននិទ្ទេស A និង B, មានសញ្ញាបត្របរិញ្ញាបត្រ បរិញ្ញាបត្រជាន់ខ្ពស់ ឬបណ្ឌិត​ពាក់ព័ន្ធជំនាញអប់រំ, បេក្ខជន​មានពិការភាព, ស្រ្តីភេទ, គ្រូបង្រៀន​ជាប់កិច្ចសន្យា​កំពុង​បង្រៀន​នៅ​បឋមសិក្សា មានអតីតភាពការងារយ៉ាងតិច ៣ឆ្នាំជាប់ៗគ្នា, មានទីលំនៅអចិន្រ្តៃយ៍​ក្នុងឃុំ ស្រុក ខេត្ត ដែលត្រូវ​ជ្រើសរើស។

កាលបរិច្ឆេទចុះឈ្មោះប្រឡងប្រជែង និងការដាក់ពាក្យ ៖ ចាប់ពីថ្ងៃទី១៥ ខែកុម្ភៈ រហូត​ដល់​ថ្ងៃទី១៥ ខែមីនា ឆ្នាំ​២០២៤ វេលាម៉ោង ១៧:០០ ជាកំហិត។

ការដាក់ពាក្យ​ប្រឡង​ប្រជែង​តាមរយៈ​ប្រព័ន្ធអនឡាញ ៖ បេក្ខជន​អាចចូលទៅ​កាន់គេហទំព័រ https://lms.era.gov.kh/qrlink/3c ដើម្បីបំពេញព័ត៌មាន​សុំសិទ្ធិ​ប្រឡងប្រជែង និង​ស្កេន​បញ្ចូលឯកសារ, ក្នុង​ករណីចាំបាច់​បេក្ខជន​អាច​ទាក់ទង​ជាមួយ​មន្ទីរ​មុខងារសាធារណៈ ឬមន្ទីរអប់រំ យុវជន និងកីឡា ដើម្បី​សាកសួរ​ព័ត៌មាន ឬជួយ​សម្រួល​ការ​បំពេញ​បែបបទ​សុំ​សិទ្ធិប្រឡងប្រជែង៕