ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងកិច្ចពិភាក្សាជាមួយសមាគមភស្តុភារកម្មកម្ពុជាកាលពីពេលថ្មីៗនេះ ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ បានលើកទឹកចិត្ត និងផ្តល់ការបណ្តុះបណ្តាលជំនាញបច្ចេកទេសវិជ្ជាជីវៈរយៈពេលខ្លី និងភាពសហគ្រិនដល់បុគ្គលិកក្រុមហ៊ុនឯកជនដោយឥតគិតថ្លៃ ដើម្បីពង្រឹងសមត្ថភាព និងលើកកម្ពស់ផលិតភាពការងារ។
បន្ថែមពីនេះ ក្នុងករណីដែលក្រុមហ៊ុនត្រូវការជំនាញបណ្តុះបណ្តាលផ្សេង សមាគម អាចលើកជាសំណើមកកាន់ក្រសួងដើម្បីរៀបចំការបណ្តុះបណ្តាល។ មួយវិញទៀត ក្រសួងការងារ ក៏នឹងផ្តល់ទីតាំងសម្រាប់បណ្តុះបណ្តាលជូនសមាគមភស្តុភារកម្មដោយឥតគិតថ្លៃដើម្បីលើកទឹកចិត្តឱ្យបង្កើនការបណ្តុះបណ្តាល។
ជាការឆ្លើយតបលោកឧកញ៉ា ស៊ិន ចន្ធី ប្រធានសមាគមភស្តុភារកម្មកម្ពុជា បានថ្លែងអំណរគុណចំពោះការផ្តល់វគ្គបណ្តុះបណ្តាលដោយឥតគិតថ្លៃចំពោះបុគ្គលិកគ្រប់កម្រិត។ សម្រាប់ប្រធានសមាគម ការបណ្តុះបណ្តាលនេះ មានសារសំខាន់ក្នុងការពង្រឹងផលិតភាពការងារ និងស្ថាប័នដើម្បីអាចត្រៀមខ្លួនក្នុងការប្រកួតប្រជែង។
គួរបញ្ជាក់ថា ដោយសារតែការរីកចម្រើននៃបច្ចេកវិទ្យា ក៏ដូចជាការវិវឌ្ឍន៍ នៃទីផ្សារការងារ គឺចាំបាច់តម្រូវឱ្យបុគ្គលិក កម្មករនិយោជិត ត្រូវពង្រឹងសមត្ថភាព ក៏ដូចជាជំនាញ ដើម្បីបង្កើនផលិតភាពការងារ សមត្ថភាពផ្ទាល់ខ្លួន ឆ្លើយតបទៅនឹងការវិវឌ្ឍថ្មីៗនៅក្នុងទីផ្សារការងារ ការប្រកួតប្រជែង ក៏ដូចជាការផ្លាស់ប្តូរ នៃបច្ចេកវិទ្យា។
ស្របគ្នានេះ បើយោងតាមយុទ្ធសាស្រ្តបញ្ចកោណដំណាក់កាលទី១ ការបង្កើនជំនាញ គឺជាអ្វីដែលរាជរដ្ឋាភិបាលបានគិតគូរ ដើម្បីឆ្ពោះទៅសម្រេចចក្ខុវិស័យកម្ពុជាឆ្នាំ២០៥០ ពោលគឺប្រជាជនកម្ពុជា «មានចំណេះដឹងខ្ពស់ និងជំនាញមួយយ៉ាងតិចប្រចាំជីវិត» ប្រកបដោយអំណត់ធន់, សហគ្រិនភាព, បំពាក់ជំនាញ និងបច្ចេកវិទ្យា ដែលជាតម្រូវការទីផ្សារការងារ និងធុរកិច្ច៕
