ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – សម្រាប់ព្រឹត្តិការណ៍ នៃការប្រកួតកីឡាអាស៊ានប៉ារ៉ាហ្គេមលើកទី១២ ដែលគ្រោងនឹងប្រព្រឹត្តទៅនៅពេលខាងមុខនេះ ក្រសួងសុខាភិបាលបានត្រៀមក្រុមគ្រូពេទ្យ និងរថយន្តសង្រ្គោះ នៅ៨គោលដៅសំខាន់ៗ ដើម្បីផ្តល់សេវាសុខាភិបាល និងសង្រ្គោះបន្ទាន់ ប្រសិនបើទស្សនិកជន ក៏ដូចជាកីឡាករជួបបញ្ហាសុខភាព។
ឯកឧត្តមសាស្រ្តាចារ្យ ម៉ម ប៊ុនហេង រដ្ឋមន្រ្តីក្រសួងសុខាភិបាលបានមានប្រសាសន៍ថា ក្រសួងបានចាត់ចែងក្រុមគ្រូពេទ្យត្រៀមសម្រាប់ការប្រកួតកីឡាអាស៊ានប៉ារ៉ាហ្គេម លើកទី១២ មិនខុសពីការចាត់ចែកក្រុមគ្រូពេទ្យក្នុងព្រឹត្តិការណ៍ប្រកួតកីឡាស៊ីហ្គេមលើកទី៣២នោះទេ។ បើតាមឯកឧត្តមរដ្ឋមន្រ្តី ក្រសួងសុខាភិបាលក៏បានរៀបចំកន្លែងសង្គ្រោះបន្ទាន់ ទីតាំងក្រុមគ្រូពេទ្យ ជាពិសេសគ្រូពេទ្យដែលនៅតាមអង្គភាព និងគ្រូពេទ្យមជ្ឈិមភូមិភាគត្រូវតែនៅប្រចាំការនៅទីតាំងប្រកួត។ ចំណែក ក្រុមគ្រូពេទ្យនៅរាជធានីភ្នំពេញធ្វើការចល័តក្នុងការព្រឹត្តិការណ៍ប្រកួតកីឡាអាស៊ានប៉ារ៉ាហ្គេម លើកទី១២ ខាងមុខនេះ ។
ជាមួយគ្នានេះ ដើម្បីត្រៀមផ្តល់សេវាការពារសុខភាព និងសង្គ្រោះបន្ទាន់ក្នុងព្រឹត្តិការណ៍នៃការប្រកួតកីឡានេះ ក្រសួងសុខាភិបាល សហការជាមួយស្ថាប័នពាក់ព័ន្ធ បានរៀបចំផែនការការពារសុខភាព និងសង្គ្រោះបន្ទាន់ដោយឥតគិតថ្លៃ ក្នុងនោះបានត្រៀម គ្លីនិកចល័ត/មន្ទីរពេទ្យរាជធានីភ្នំពេញ ចំនួន៤០ រួមមាន មន្ទីរពេទ្យកាល់ម៉ែត, មន្ទីរពេទ្យមិត្តភាពកម្ពុជា-ចិន ព្រះកុសុមៈ, មន្ទីរពេទ្យមិត្តភាពខ្មែរ-សូវៀត, មន្ទីរពេទ្យកុមារជាតិ, មន្ទីរពេទ្យព្រះអង្គឌួង, មជ្ឈមណ្ឌលជាតិ គាំពារមាតា និងទារក, មន្ទីរពេទ្យជោវៃភ្នំពេញ, មន្ទីរពេទ្យរ៉ូយ៉ាល់, ដាយ ហ្សុង យីន (ខេមបូឌា) មេឌីខល ឯ.ក និងមន្ទីរពហុព្យាបាលខេមាជាដើម។ ក្នុងនោះ មន្ទីរពេទ្យបង្អែកខេត្តចំនួន ៤ គឺខេត្តកណ្ដាល ខេត្តត្បូងឃ្មុំ ខេត្តកំពង់ស្ពឺ និងខេត្តកំពង់ឆ្នាំង។
ដោយឡែកសម្រាប់ទីកន្លែងប្រចាំការតាមគោលដៅចំនួន០៨ ទីតាំង ក្នុងព្រឹត្តិការណ៍ប្រកួតកីឡាអាស៊ានប៉ារ៉ាហ្គេម លើកទី១២ រួមមាន ១. ភូមិកីឡា (Polyclinic) នៅពហុកីឡាដ្ឋានជាតិមរតកតេជោ ២. ពហុកីឡាដ្ឋានជាតិមរតកតេជោ ៣. ពហុកីឡាដ្ឋានជាតិអូឡាំពិក ៤. សាកលវិទ្យាល័យភូមិន្ទភ្នំពេញ ៥. មជ្ឈមណ្ឌលជនពិការតេជោបឹងបៃតង ៦. អគារ សហភាពសហព័ន្ធយុវជនកម្ពុជា (ស.ស.យ.ក) ជ្រោយចង្វារ ៧. អគារណាហ្គាវើល២ ៨. សណ្ឋាគារហ្កាដិន ស៊ីធី។ សាធារណៈជនអាចស្វែងរកទីតាំង និងលេខទំនាក់ទំនងក្រុមគ្រូពេទ្យតាមរយៈតំណភ្ជាប់ https://paragame2023-moh.asurraa.app/ ។
គួរជម្រាបជូនថា ព្រឹត្តិការណ៍អាស៊ានប៉ារ៉ាហ្គេមលើកទី១២ នឹងត្រូវធ្វើឡើងចាប់ពីថ្ងៃទី០៣ ដល់ថ្ងៃទី០៩ ខែមិថុនា ឆ្នាំ២០២៣។ ក្នុងនោះ កម្ពុជាមានប្រតិភូកីឡាចូលរួមប្រកួតសរុប ៣៤៣នាក់ ក្នុងនោះអត្តពលិក ២៥២នាក់ និងមន្ដ្រីបច្ចេកទេស ៩១នាក់៕
