ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ដើម្បីចូលរួមលើកកម្ពស់ការថែទាំសុខភាព និងសុវត្ថិភាពសម្រាប់គណៈមេប្រយោគ គណៈកម្មការនានា និងបេក្ខជន អំឡុងពេល នៃដំណើរការប្រឡងសញ្ញាបត្រមធ្យមសិក្សាទុតិយភូមិ ដែលគ្រោងនឹងប្រព្រឹត្តទៅនៅថ្ងៃទី២៨ និងថ្ងៃទី២៩ ខែសីហា ខាងមុខ, ក្រសួងអប់រំ យុវជន និងកីឡា បានចេញសេចក្តីណែនាំប្រតិបត្តិមួយទៅដល់ភាគីពាក់ព័ន្ធក្នុងការអនុវត្តវិធានការសុខភាព និងសុវត្ថិភាព សម្រាប់ការប្រឡង។
បើតាមសេចក្តីណែនាំ គណៈមេប្រយោគទូទាំងប្រទេសប្រចាំរាជធានី ខេត្ត ត្រូវចាត់តាំងក្រុមការងារទទួលបន្ទុកសុខភាពសម្រាប់ដំណើរការប្រឡងនៅតាមរាជធានីខេត្ត ដោយមានសមាសភាពចូលរួមពីតំណាង ១រូប នៃគណៈមេប្រយោគទូទាំងប្រទេសប្រចាំរាជធានីខេត្ត គណៈអភិបាលរាជធានីខេត្តក្រុង ស្រុក ខណ្ឌ ឬតំណាងមន្រ្តីសុខាភិបាល និងអង្គភាពពាក់ព័ន្ធ។
ក្រុមការងារទទួលបន្ទុកសុខភាពប្រចាំរាជធានីខេត្តមានតួនាទី និងភារកិច្ចដូចជា ៖ ដឹកនាំអនុវត្តវិធានការសុខភាព នៅតាមមណ្ឌលប្រឡងនានា ក្នុងទីតាំងភូមិសាស្រ្តរបស់ខ្លួន, ចាត់តាំងភ្នាក់ងារសុខាភិបាល ដើម្បីសហការជាមួយគណៈមេប្រយោគ នៅតាមមណ្ឌលប្រឡង ដើម្បីតាមដាន ពិនិត្យសុខភាព និងចាត់វិធានការធានាសុខភាព សុវត្ថិភាពដល់គណៈមេប្រយោគ គណៈកម្មការនានា និងបេក្ខជនក្នុងដំណើរការប្រឡង, រៀបចំរថយន្តសង្រ្គោះ និងភ្នាក់ងារសុខាភិបាលប្រចាំការ ដោយមានបំពាក់សម្ភារៈចាំបាច់ សម្រាប់សង្រ្គោះបឋមនៅតាមមណ្ឌលប្រឡងក្នុងរាជធានី ខេត្ត ក្រុង ស្រុក ខណ្ឌមួយចំនួន ដើម្បីជួយសង្រ្គោះដល់បេក្ខជន គណៈមេប្រយោគ និងគណៈកម្មការនានា ដែលមានបញ្ហាសុខភាពក្នុងដំណើរការប្រឡង។
ដោយឡែុកនៅមុនដំណើរការប្រឡង ចំពោះគ្រឹះស្ថានសិក្សាដែលយកធ្វើជាមណ្ឌលប្រឡង ត្រូវធ្វើអនាម័យ បោសសម្អាតបន្ទប់ អគារ បរិវេណ និងរៀបចំកន្លែងទុកដាក់សំរាមឱ្យបានត្រឹមត្រូវ, រម្ងាប់មេរោគលើតុ កៅអី ដៃទ្វារ បង្កាន់ដៃ ផ្ទៃរាបបន្ទប់ប្រឡង និងកន្លែងចាប់កាន់ញឹកញាប់, ពិនិត្យលទ្ធភាពរៀបចំគំនូសគម្លាតសុវត្ថិភាពនៅ ក្នុងបរិវេណគ្រឹះស្ថានសិក្សា ព្រមទាំងរៀបចំតុកៅអី សម្រាប់បេក្ខជនក្នុងបន្ទប់ប្រឡងនីមួយៗ ដោយរក្សាគម្លាតសុវត្ថិភាពយ៉ាងតិច ១ម៉ែត្រកន្លះ, រៀបចំកន្លែងបិទបញ្ជីឈ្មោះបេក្ខជនឱ្យបានច្រើនទីតាំង ដើម្បីរក្សានូវគម្លាតសុវត្ថិភាពសម្រាប់បេក្ខជនមើលឈ្មោះរបស់ខ្លួន, រៀបចំកន្លែងលាងសម្អាតដៃ និងបង្គន់អនាម័យដោយមានទឹក និងសាប៊ូប្រើប្រាស់ជាប្រចាំ, ពិនិត្យលទ្ធភាពរៀបចំឧបករណ៍ការពាររន្ទៈ នៅតាមមណ្ឌលប្រឡងដែលមានហានិភ័យខ្ពស់។
នៅក្នុងថ្ងៃប្រឡង ត្រូវពិនិត្យ និងណែនាំដល់បេក្ខជន គណៈមេប្រយោគ និងគណៈកម្មការនានាអនុវត្តឱ្យបានខ្ជាប់ខ្ជួននូវវិធានការសុខភាព សុវត្ថិភាព ឬវាស់កម្តៅក្នុងករណីមានបញ្ហាមិនស្រួលខ្លួន និងត្រូវជួបពិគ្រោះយោបល់ជាមួយមន្រ្តីសុខាភិបាលប្រចាំការនៅតាមមណ្ឌលសំណេរ, បើកទ្វា បង្អួចបន្ទប់ប្រឡងឱ្យមានខ្យល់ និងពន្លឺគ្រប់គ្រាន់, ណែនាំឱ្យបេក្ខជនគ្រប់គ្រងអារម្មណ៍ឱ្យបាននឹងន និងមានភាពក្លាហាន ករណីមានបញ្ហាមិនស្រួលខ្លួន ត្រូវជួបពិគ្រោះយោបល់ជាមួយមន្រ្តីសុខាភិបាលប្រចាំការនៅតាមមណ្ឌលប្រឡង។
សូមជំរាបជូនដែរថា នៅក្នុងការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប សម័យប្រឡងថ្ងៃទី២៨ សីហា ២០២៥ខាងមុខនេះ បើតាមការប្រកាសរបស់ក្រសួងអប់រំ ការប្រឡងថ្នាក់ជាតិមួយនេះ មានមណ្ឌលប្រឡងសរុបចំនួន ២៤១មណ្ឌល ដោយត្រូវបានបែងចែកជា ៦០២៣បន្ទប់ ក្នុងនោះថ្នាក់វិទ្យាសាស្រ្តមាន ៧២មណ្ឌល ត្រូវជា ១៦៦៥បន្ទប់ និងថ្នាក់វិទ្យាសាស្រ្តសង្គម មាន ១៦៩មណ្ឌល ដែលត្រូវជា ៤ ៣៥៨បន្ទប់៕
