ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – ដើម្បីលើកកម្ពស់ការអាន ក៏ដូចជាលើកកម្ពស់គុណភាពអប់រំនៅកម្ពុជា ឯកឧត្តម ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា បានលើកទឹកចិត្តទៅដល់មាតាបិតាទាំងអស់ គួរមានបណ្ណាល័យតាមផ្ទះ។
ឯកឧត្តម ហង់ជួន ណារ៉ុន មានប្រសាសន៍ថា ដើម្បីលើកកម្ពស់គុណភាពអប់រំ ឪពុកម្តាយគួរជំរុញឱ្យកូនរៀនសូត្រ ជំរុញឱ្យកូនអានសៀវភៅ ។
ឯកឧត្តមរដ្ឋមន្រ្តីបញ្ជាក់ថា ការសិក្សារៀនសូត្រ មិនមែនជាភារកិច្ចរបស់សាលារៀនតែមួយមុខនោះទេ ដោយសារតែសិស្សរៀននៅសាលាគឺបានត្រឹមតែ៤ម៉ោងប៉ុណ្ណោះ ដូច្នេះនៅសល់ពេល២០ម៉ោងទៀត ដែលឪពុកម្តាយត្រូវមានកាតព្វកិច្ចក្នុងការត្រួតពិនិត្យ ជួយគាំទ្រ និងជំរុញកូនចៅរៀនសូត្រ បង្កើតទម្លាប់រៀនកាន់តែច្រើន ចេះកាន់តែច្រើន ។ បើតាមប្រសាសន៍របស់ឯកឧត្តមរដ្ឋមន្រ្តី ការចេះកាន់តែច្រើន នឹងធ្វើឱ្យគុណភាពអប់រំមានច្រើនដែរ។
ឯកឧត្តម ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា
” …អញ្ចឹងខ្ញុំសូមអំពាវនាវដល់មាតាបិតា បើចង់លើកកម្ពស់ការអាន ត្រូវមានបណ្ណាល័យតាមផ្ទះ, មានពាក្យមួយលើកឡើងថា ជនជាតិខ្មែរយើងនៅផ្ទះអត់ដែលមានបណ្ណាល័យ អញ្ចឹងខ្ញុំសូមឱ្យយើងកែប្រែទម្លាប់ ដើម្បីលើកកម្ពស់គុណភាពអប់រំ “
ស្របគ្នានឹងប្រសាសន៍របស់ ឯកឧត្តម ហង់ជួន ណារ៉ុន នេះដែរ លោក ទឹម សុខហួយ ដែលជាគ្រូបង្រៀននៅវិទ្យាល័យអង្គតាសោម ក៏បានសម្តែងការយល់ឃើញដែរថា ការមានបណ្ណាល័យតាមផ្ទះ គឺជាការបណ្តុះទម្លាប់នៃការអានដែលមានប្រសិទ្ធភាព ហើយក៏ជាការជំរុញឱ្យសិស្សានុសិស្សទទួលបានការអប់រំបន្ទាប់ពីរៀននៅសាលាជាមួយគ្រូ៕
