ភ្នំពេញ – បន្ទាប់ពីដំណើរការប្រឡងយ៉ាងស្វិតស្វាញរបស់សិស្សានុសិស្សចំនួន ៤៨០នាក់ រយៈពេល ១សប្តាហ៍កន្លងមក ក្រសួងអប់រំ យុវជន និងកីឡា បានរកឃើញជ័យលាភីសិស្សពូកែទូទាំងប្រទេសប្រចាំឆ្នាំ​២០២៣ចំនួន ៦០រូប ផ្នែកអក្សរសិល្ប៍ខ្មែរ គណិតវិទ្យា និងរូបវិទ្យា ថ្នាក់ទី៩ និងថ្នាក់ទី១២។

ឯកឧត្ដមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានអបអរសាទរជាមួយជ័យលាភីទាំង ៦០រូបជាសិស្សពូកែទូទាំងប្រទេស ព្រមទាំងបេក្ខជនទាំងអស់ដែលបានខិតខំយកអស់កម្លាំងកាយ កម្លាំងចិត្ត និងបញ្ញាញាណ និងបានឆ្លងកាត់នូវបទពិសោធន៍មួយទៀត ក្នុងវ័យជាសិស្សនៅកម្រិតចំណេះទូទៅ និងជាសិស្សពូកែ។

ឯកឧត្ដមបណ្ឌិតសភាចារ្យ បានគូសបញ្ជាក់ថា ការត្រឹមតែមានចំណេះដឹងតែម្យ៉ាង មិនគ្រប់គ្រាន់នោះទេ ព្រោះធនធានមនុស្សចាំបាច់ត្រូវមានវិជ្ជាសម្បទា បំណិនសម្បទា និងចរិយាសម្បទា ដើម្បីក្លាយជាពលរដ្ឋល្អ។ ឯកឧត្ដមបណ្ឌិតសភាចារ្យបន្តថា ក្មួយៗជាសិស្សពូកែ និងជាជ័យលាភីនៅថ្ងៃនេះ នឹងក្លាយជាធនធានបញ្ញាវន្តសម្រាប់ពេលអនាគតរបស់កម្ពុជា ស្របពេលដែលប្រទេសយើងកំពុងត្រូវការនូវមូលធនមនុស្សជាចាំបាច់ ដើម្បីធ្វើការអភិវឌ្ឍប្រទេសឱ្យកាន់តែរីកចម្រើន។ ជាពិសេសស្របតាមការរីកចម្រើននៃបច្ចេកវិទ្យា បដិវត្តឧស្សាហកម្មជំនាន់ទី៤ និងសេដ្ឋកិច្ចឌីជីថល ដែលកំពុងផ្តោតលើបញ្ញាសិប្បនិមិត្ត និងការប្រើប្រាស់មនុស្សយន្ត។

សូម​បញ្ជាក់ថា សិស្សពូកែថ្នាក់ទី៩ និងថ្នាក់ទី១២ ដែលជាជ័យលាភីសិស្សពូកែទូទាំងប្រទេស ត្រូវទទួលរង្វាន់ និងការលើកទឹកចិត្តពីរាជរដ្ឋាភិបាល រួមមាន ទី១. ប្រកាសស្ដីពីការទទួលស្គាល់សិស្សពូកែទូទាំងប្រទេស ដោយរដ្ឋមន្រ្តីក្រសួងអប់រំ យុវជន និងកីឡា ១ច្បាប់ ទី២. មេដាយមួយគ្រឿងសម្រាប់បេក្ខជនជ័យលាភី ចំណាត់ថ្នាក់លេខ១ ដល់លេខ៣ ទី៣. វិញ្ញាបនបត្របញ្ជាក់សិស្សពូកែទូទាំងប្រទេស ១ច្បាប់ ទី៤. ប្រាក់រង្វាន់ចំណាត់ថ្នាក់លេខ១ ចំនួន ៣លាន៥សែនរៀល, ចំណាត់ថ្នាក់លេខ២ ចំនួន ៣លាន២សែនរៀល, ចំណាត់ថ្នាក់លេខ៣ ចំនួន ២លាន៩សែនរៀល, ចំណាត់ថ្នាក់លេខ៤ ចំនួន ២លាន៦សែនរៀល, ចំណាត់ថ្នាក់លេខ៥ ចំនួន ២លាន៣សែនរៀល, ចំណាត់ថ្នាក់លេខ៦ ចំនួន ២លានរៀល, ចំណាត់ថ្នាក់លេខ៧ ចំនួន ១លាន៧សែនរៀល, ចំណាត់ថ្នាក់លេខ៨ ចំនួន ១លាន៤សែនរៀល, ចំណាត់ថ្នាក់លេខ៩ ចំនួន ១លាន១សែនរៀល, ចំណាត់ថ្នាក់លេខ១០ ចំនួន ៨សែនរៀល។

គួរជម្រាបជូនដែរថា ក្រសួងអប់រំ យុវជន និងកីឡា រៀបចំការប្រឡងសិស្សពូកែទាំងប្រទេស ផ្នែកអក្សរសិល្ប៍ខ្មែរ គណិតវិទ្យា និងរូបវិទ្យា ថ្នាក់ទី៩ និងថ្នាក់ទី១២ ក្នុងគោលបំណងលើកកម្ពស់គុណភាពអប់រំ តាមរយៈការអភិវឌ្ឍធនធានមនុស្សដែលមានចំណេះដឹង និងជំនាញ ប្រកបដោយសមត្ថភាពខ្ពស់ សំដៅអភិវឌ្ឍសេដ្ឋកិច្ច ក៏ដូចជាកសាងសង្គមជាតិឱ្យបានរឹងមាំ៕