ក្រសួងអប់រំ យុវជន និងកីឡា និងសាកលវិទ្យាល័យបច្ចេកវិទ្យាសារព័ត៌មានចិន Dalian University of Technology Press នឹងធ្វើ​កិច្ច​សហការបណ្ដុះបណ្ដាលរួមគ្នាលើស្តង់ដាជំនាញ​បច្ចេកទេស​ និងវិជ្ជាជីវៈ ដើម្បី​អភិវឌ្ឍ​ធនធាន​មនុស្ស​នៅកម្ពុជា។

ក្នុងជំនួប​ពិភាក្សាលើកិច្ចសហ​ប្រតិបត្តិ​ការកាលពីពេលថ្មីៗនេះ​ លោកជំទាវ​បណ្ឌិត​ គឹម​ សេដ្ឋានី​ រដ្ឋលេខាធិការ​ប្រចាំ​ការ​ ក្រសួងអប់រំ​ យុវជន​ និង​កីឡា​ បាន​វាយ​តម្លៃ​ខ្ពស់​ចំពោះ​សាកល​វិទ្យាល័យ​ ដែល​មាន​បំណង​សហការគាំទ្រលើការបណ្ដុះបណ្ដាល​បច្ចេកទេស​ និងវិជ្ជា​ជីវៈ​រួម​គ្នា​ជាមួយភាគីកម្ពុជា។

លោកជំទាវមានប្រសាសន៍ថា ព្រះរាជាណាចក្រកម្ពុជា និងសាធារណៈរដ្ឋប្រជាមានិតចិន មានទំនាក់ទំនងមិត្តភាពគ្រប់ពេលវេលា និងភាពជាដៃគូយុទ្ធសាស្ត្រគ្រប់ជ្រុងជ្រោយ។ លោកជំទាវ​បណ្ឌិត​បន្តថា ការអប់រំ​ជាសសរស្តម្ភដ៏សំខាន់នៃទំនាក់ទំនង​ ដែលមិនត្រឹមតែរួមចំណែកដល់ការអភិវឌ្ឍធនធានមនុស្សប៉ុណ្ណោះទេ ប៉ុន្តែថែមទាំងពង្រឹងមូលដ្ឋានគ្រឹះនៃការយល់ដឹងគ្នាទៅវិញទៅមក និងកិច្ចសហប្រតិបត្តិការយូរអង្វែងរវាងប្រទេសទាំងពីរ។

រដ្ឋលេខាធិការ​ប្រចាំ​ការក្រសួងអប់រំ បញ្ជាក់ថា ក្រសួងអប់រំ​ បាន​ទទួល​ស្គាល់​សមាគមផ្លាស់ប្តូរការអប់រំវិជ្ជាជីវៈកម្ពុជា-ចិន ជាទីភ្នាក់ងារអនុវត្តនៅកម្ពុជា ដោយធ្វើការក្នុងភាពជាដៃគូយ៉ាងជិតស្និទ្ធជាមួយសាកលវិទ្យាល័យ Dalian University of Technology Press ជាទីភ្នាក់ងារប្រតិបត្តិពីភាគីចិន​ ដោយ​​នឹងអនុវត្តការងារសំខាន់ៗ រួមទាំងការអភិវឌ្ឍរួមគ្នានៃស្តង់ដារជំនាញ​បច្ចេកទេស​ និងវិជ្ជាជីវៈ កែលម្អកម្មវិធីសិក្សា និងសៀវភៅសិក្សាឱ្យ​មានគុណភាពខ្ពស់ ស្របតាមបរិបទកម្ពុជា។

គួរជំរាបជូនថា កិច្ច​សហប្រតិបត្តិការ​នេះ ផ្ដោត​សំខាន់​ទៅលើចំណុចសំខាន់ៗរួមមាន ការ​បង្កើតប្រព័ន្ធស្តង់ដារ​ប​ច្ចេកទេស​វិជ្ជាជីវៈ និងវិញ្ញាបនបត្រដែលស្របតាមស្តង់ដារអន្តរជាតិឆ្លើយតបទៅនឹងការអភិវឌ្ឍឧស្សាហកម្មរបស់កម្ពុជា, កែ​លម្អ​កម្មវិធីសិក្សា និងសៀវភៅសិក្សា ដែលធានាបាន​នូវគុណភាព និងមានទំនាក់ទំនងវប្បធម៍រវាងប្រទេស និងប្រទេស, ការពង្រឹងការបណ្តុះបណ្តាលគ្រូ និងការកសាងសមត្ថភាព តាមរយៈការផ្លាស់ប្តូរជំនាញ និងបច្ចេកវិទ្យា, សហប្រតិបត្តិការ​លើ​ការ​ស្រាវជ្រាវ​ និង​បោះពុម្ព​ផ្សាយ, ការលើកកម្ពស់ការផ្លាស់​ប្ដូរ​និស្សិត និងអាហារូបករណ៍ និងស្វែងយល់ពីការអប់រំឌីជីថល និងការអប់រំបៃតង សម្រាប់​យុវជននាសតវត្សទី២១៕