ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
នៅឆ្នាំ២០២៦ខាងមុខនេះ យុវជនដែលកំពុងសិក្សានៅគ្រឹះស្ថានសិក្សាក្នុងរាជធានី និងខេត្តគោលដៅមួយចំនួន ពួកគេនឹងបានចូលរួមក្នុងកម្មវិធី ” មនសិការពលរដ្ឋល្អ” ដែលជាកម្មវិធី ជំរុញឱ្យយុវជនក្លាយជាកូនល្អ សិស្សល្អ មិត្តល្អ និងជាពលរដ្ឋល្អ មានសមត្ថភាពប្រកបដោយមនសិការស្នេហាជាតិ។
ក្នុងពិធីបើកកម្មវិធី “មនសិកាពលរដ្ឋល្អ” ដល់យុវជនតាមគ្រឹះស្ថានសិក្សាឆ្នាំ២០២៦ កាលពីរសៀលថ្ងៃទី១០ ខែធ្នូ ឆ្នាំ២០២៥ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា បានវាយតម្លៃខ្ពស់ចំពោះ សហភាពសហព័ន្ធយុវជនកម្ពុជា (ស.ស.យ.ក.) ដែលបានផ្តួចផ្តើមឡើងនូវកម្មវិធីមនសិការពលរដ្ឋល្អ ប្រកបដោយអត្ថន័យ និងខ្លឹមសារសម្រាប់ជាប្រយោជន៍ដល់សិស្សានុសិស្សបានក្រេបជញ្ជក់ចំណេះដឹង ពង្រឹងសមត្ថភាព។ ឯកឧត្តមថា កម្មវិធីនេះ បានរៀបចំសៀវភៅប្រកបដោយខ្លឹមសារផ្តោតលើការអភិវឌ្ឍយុវជន, យកវិធីសាស្រ្តបង្រៀនថ្មីមកអនុវត្តប្រកបដោយប្រសិទ្ធភាព, ទទួលយក និងចូលរួមអនុវត្តគម្រោងពីសំណាក់លោកគ្រូ អ្នកគ្រូ ដោយគូសបញ្ជាក់ថា គ្រូបង្គោល គឺជាធនធានដ៏សំខាន់សម្រាប់ការចែករំលែកចំណេះដឹងបន្ត និងលើកកម្ពស់គុណភាពអប់រំ, ការពង្រឹងបំណិនសតវត្សទី២១ និង ការលើកកម្ពស់មនសិការស្នេហាជាតិក្នុងចំណោមយុវជន។
នាឱកាសនោះ ឯកឧត្តម ហ៊ុន ម៉ានី រដ្ឋមន្រ្តីក្រសួងមុខងារសាធារណៈ និងជាប្រធានសហភាពសហព័ន្ធយុវជនកម្ពុជា បានគូសបញ្ជាក់ពីគោលបំណងធំបំផុត នៃកម្មវិធី មនសិការពលរដ្ឋល្អ គឺជំរុញឱ្យយុវជនមានសមត្ថភាព និងភាពជឿជាក់លើខ្លួនឯង រួមសាមគ្គីគ្នាជាធ្លុងមួយ ខិតខំរៀនសូត្រ បន្តពង្រឹងសមត្ថភាព ស្វែងយល់ពីការផ្តល់តម្លៃ និងមោទនភាពចំពោះប្រទេសជាតិ និងបណ្តុះឆន្ទៈមនសិការស្នេហាជាតិ ដែលនេះនឹងក្លាយជាខឿនដ៏រឹងមាំមួយ រួមចំណែកដលើ់ការការពារ និងអភិវឌ្ឍប្រទេសជាតិ។
សូមជំរាបជូនថា ចាប់តាំងពីឆ្នាំ២០២៤មក កម្មវិធីមនសិការពលរដ្ឋល្អ ត្រូវបានដាក់ឱ្យអនុវត្តនៅតាមគ្រឹះស្ថានសិក្សាតាមបណ្តាខេត្តរាជធានីចំនួន១២ រួមមាន រាជធានីភ្នំពេញ ខេត្តកណ្តាល ខេត្តស្វាយរៀង ខេត្តសៀមរាប ខេត្តបាត់ដំបង ខេត្តកំពង់ស្ពឺ ខេត្តព្រះសីហនុ ខេត្តកំពង់ចាម ខេត្តកំពង់ធំ ខេត្តប៉ៃលិន ខេត្តស្ទឹងត្រែង និងខេត្តតាកែវ តាមរយៈការអនុវត្តវិធីសាស្ត្របង្រៀនថ្មី និងបានជំរុញសកម្មភាពក្រៅម៉ោងសិក្សាសម្រាប់យុវជន ជាមួយសមាជិកក្លឹប ជាសិស្សកម្រិតថ្នាក់ទី១០ និងថ្នាក់ទី១១ ប្រកបដោយជោគជ័យ៕
