ភ្នំពេញ – ខណៈ​ថ្ងៃនៃក្តីស្រឡាញ់ ១៤ កុម្ភៈ កាន់តែខិតជិតមក​ដល់ ក្រសួងអប់រំ យុវជន និង​កីឡា បានចេញសេចក្តីណែនាំ​មួយ​ទៅ​ដល់​គ្រប់គ្រឹះស្ថាន​សិក្សា​សាធារណៈ និង​ឯកជន ចូលរួមផ្សព្វផ្សាយ​អប់រំ​ដល់​សិស្សានុសិស្សកុំ​ឱ្យ​យល់ច្រឡំ អំពីអត្ថន័យទិវា​ នៃក្តីស្រឡាញ់ថា ជាថ្ងៃបុណ្យសង្សារ ឬជាថ្ងៃណាត់ជួបគ្នា​រវាង​គូស្នេហ៍។

ក្រសួងអប់រំបានបញ្ជាក់ថា ទិវានេះ ពុំ​មែនជា​ប្រពៃណីរបស់ជនជាតិខ្មែរយើងទេ ហើយកន្លងមកមានយុវជន​មួយ​ចំនួន​តូចបាន​ភ្លើតភ្លើនភ្លេចការសិក្សា បាត់បង់​សេចក្តីថ្លៃថ្នូរបុគ្គល និង​ក្រុមគ្រួសារ ប្រាសចាក​វប្បធម៌ និង​ប្រពៃណីជាតិរបស់ខ្មែរ។

ដើម្បីពង្រឹង​ការ​អនុវត្ត​បទបញ្ជា​ផ្ទៃក្នុង​សម្រាប់​គ្រប់គ្រឹះស្ថានសិក្សា ក្រសួងអប់រំ​បានណែនាំ​ដល់គ្រឹះស្ថានសិក្សា​ទាំងអស់ ត្រូវផ្សព្វផ្សាយ​ដល់សិស្សានុសិស្ស​តាមគ្រប់មធ្យោបាយ ដូចជា​តាមរយៈ​ការ​ប្រជុំ​នៅពេល​គោរពទង់ជាតិ កុំ​ឱ្យ​មាន​កា​រយល់ខុសពី​អត្ថន័យ ទិវា​នៃក្តីស្រឡាញ់, ត្រូវ​ពង្រឹង​ការ​អនុវត្ត​វិន័យ​​ឱ្យ​បាន​ម៉ឺងម៉ាត់ ជាពិសេស​លើ​ការ​អប់រំ​សីលធម៌ ដោយ​តាមដាន​អវត្តមាន​របស់សិស្សានុសិស្ស​ជា​ប្រចាំ។

ជាមួយ​គ្នា​ក៏​ត្រូវ​ជំរុញ​ដំណើរការ​របស់ក្រុមប្រឹក្សា​យុវជន ក្រុមប្រឹក្សា​កុមារ​ប្រចាំសាលា ដោយ​អនុវត្ត​សកម្មភាព «មិត្តអប់រំមិត្ត» , ត្រូវ​ទំនាក់ទំនងជិតស្និទ្ធជាមួយ​មាតាបិតា ឬអ្នកអាណាព្យាបាលសិស្ស និង​សហគមន៍ ដើម្បីផ្តល់ និង​ទទួល​ព័ត៌មាននានាដែលពាក់ព័ន្ធ​នឹង​សកម្មភាពមិនប្រក្រតី ដែលប្រព្រឹត្ត​ដោយ​សិស្សានុសិស្ស សំដៅ​រួមសហការ​គ្នា​ទប់ស្កាត់ អប់រំណែនាំ និង​កែលម្អ​ឱ្យ​បានទាន់ពេលវេលា។

ក្រសួងក៏​បានប្រាប់​ឱ្យ​គ្រឹះស្ថាន​សិក្សា​ទាំងអស់ បន្ត​ពង្រឹង​ការ​អនុវត្ត​ប្រកាស​លេខ១២៥៨ អយក.ប្រក ចុះថ្ងៃទី២៧ ខែមីនា ឆ្នាំ​២០០៩ ស្តីពីបទបញ្ជា​ផ្ទៃក្នុង​សម្រាប់គ្រឹះស្ថាន​បឋមសិក្សា និង​ប្រកាស​លេខ​២៧៨៦ អយក.ប្រក ចុះថ្ងៃទី២២ ខែតុលា ឆ្នាំ​២០០៩ ស្តីពីបទបញ្ជា​ផ្ទៃ​ក្នុង​សម្រាប់​គ្រឹះស្ថាន​មធ្យមសិក្សា​ចំណេះទូទៅសាធារណៈផងដែរ។

គួរ​បញ្ជាក់ថា ទិវានៃក្តីស្រឡាញ់ ឬ Valentine’s Day គឺជា​ទិវា​មួយ​របស់​ជនជាតិ​នៅ​ប៉ែកអឺរ៉ុប ដែល​គេ​តែងប្រារព្ធធ្វើ​នៅ​ថ្ងៃទី១៤ ខែកុម្ភៈ ។ ជារៀងរាល់ឆ្នាំមនុស្សជាច្រើន​បានយកថ្ងៃនេះ បង្ហាញ​ពីទឹកចិត្តរបស់ខ្លួនចំពោះ​អ្នក​ដែលគេស្រឡាញ់ តាមរយៈ​ការ​ទិញកាដូ, បាច់ផ្កា ឬចំណាយពេល​ទៅ​ខាងក្រៅដើម្បីញ៉ាំអាហារជាមួយ​គ្នា។ យ៉ាងណាមិញនៅ​កម្ពុជា មានយុវវ័យមួយ​ចំនួន​​បាន​យល់​ច្រឡំនឹងវប្បធម៌បែប​បច្ចឹម​ប្រទេស​មួយ​នេះ ដោយ​អ្នក​ខ្លះ​ថែមទាំង​បានប្រព្រឹត្ត​ទង្វើ​ខុស​ឆ្គង​ទៅនឹងប្រពៃណីខ្មែរ ដោយសំអាងទៅ​លើថ្ងៃនៃក្តីស្រឡាញ់ ឬ Valentine’s Day នេះ។

យ៉ាងណាក៏ដោយ អ្វីដែល​គួរតែត្រូវធ្វើសម្រាប់យុវវ័យ ក៏​ដូចជា​មនុស្ស​ទូទៅ​នៅ​ក្នុងថ្ងៃនៃក្តីស្រឡាញ់នោះ គឺគួរ​តែ​បង្ហាញក្តីស្រឡាញ់​ដល់គ្នា​ទៅវិញទៅមក រវាង​កូននិង​ឪពុកម្តាយ រវាងបងប្អូន រវាងមិត្តភក្តិ រវាងមិត្តរួមការងារ ឬរវាងមនុស្សជាតិ ក្នុងអត្ថន័យ នៃក្តីស្រឡាញ់​ដ៏​បរិសុទ្ធចំពោះគ្នា និង​គ្នា ខណៈក្តីស្រឡាញ់ ពុំ​មានតែមួយថ្ងៃនេះទេ៕