ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
យោងទៅតាមផែនការដែលបានគ្រោងទុក ក្រសួងកសិកម្ម រុក្ខាប្រមាញ់ និងនេសាទ នឹងបន្តសហការជាមួយភាគីពាក់ព័ន្ធ ធ្វើការជ្រើសរើសមន្រ្តីកសិកម្មឃុំនៅដំណាក់កាលទី២ ចំនួន៨០០នាក់ទៀត។
ក្នុងពិធីបិទសន្និបាតក្រសួងកសិកម្ម រុក្ខាប្រមាញ់ និងនេសាទ កាលពីរសៀលថ្ងៃទី៣០ ខែមករា ឯកឧត្តម ឌិត ទីណា រដ្ឋមន្រ្តីក្រសួងកសិកម្មរុក្ខាប្រមាញ់ និងនេសាទ លើកឡើងថា ក្រោមការសហការជាមួយភាគីពាក់ព័ន្ធដែលមានដូចជាក្រសួងមុខងារសាធារណៈ អង្គភាពប្រឆាំងអំពើពុករលួយជាដើម កាលពីខែធ្នូ ឆ្នាំ២០២៣ ក្រសួងបានរៀបចំការប្រឡងជ្រើសរើសមន្រ្តីកសិកម្មឃុំចំនួន២៥០នាក់ ប្រកបដោយតម្លាភាព សមត្ថភាព និងគុណភាព។ បច្ចុប្បន្នមន្រ្តីកសិកម្មឃុំទាំង២៥០នាក់ នឹងត្រូវបណ្តុះបណ្តាលពីរបៀបរបបការងារនៅក្នុងខែកុម្ភៈនេះ មុននឹងបញ្ជូនទៅធ្វើការងារនៅតាមឃុំ ក្នុងខេត្តចំនួន១៧ទូទាំងប្រទេស ដែលជាខេត្តមានដំណាំស្រូវជាដំណាំគោល។
ជាមួយគ្នានេះ តាមផែនការគ្រោងទុក ក្រសួងកសិកម្មនឹងបន្តសហការជ្រើសរើសមន្រ្តីកសិកម្មឃុំនៅដំណាក់កាលទី២ ចំនួន៨០០នាក់ទៀត នៅក្នុងខែមេសា ឆ្នាំ២០២៤ខាងមុខ។
ស្របគ្នានេះ សម្តេចធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានមានប្រសាសន៍អគុណ និងកោតសរសើរ ដល់ឯកឧត្តមរដ្ឋមន្រ្តីក្រសួងកសិកម្មរុក្ខាប្រមាញ់ និងនេសាទ ឯកឧត្តមរដ្ឋមន្រ្តីក្រសួងមុខងារសាធារណៈ ក៏ដូចជាស្ថាប័នពាក់ព័ន្ធដែលបានចូលរួមនៅក្នុងការដឹកនាំជ្រើសរើសមន្រ្តីកសិកម្មឃុំជំហានទី១ ចំនួន២៥០នាក់នោះ។ សម្តេចបញ្ជាក់ថា ការជ្រើសរើសនេះ មិនមែនជាកិច្ចការចុងក្រោយនោះទេ តែជាកិច្ចការដំបូង ហើយកិច្ចការបន្ទាប់គឺត្រូវធានានូវការបណ្តុះបណ្តាល ការបំប៉នជំនាញជាប្រចាំ ហើយជាពិសេសនៅពេលមន្រ្តីកសិកម្មឃុំទាំងនោះចុះទៅមូលដ្ឋាន សូមអាជ្ញាធរយកចិត្តទុកដាក់ទៅដល់ធនធានរបស់យើង។
សូមអាជ្ញាធរយកចិត្តទុកដាក់ឱ្យតម្លៃ ព្រោះនេះជាធនធាន នៅក្នុងការជួយទៅដល់កសិកររបស់យើង…
សម្តេចធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា
ជាមួយគ្នានេះដែរ សម្តេចធិបតីនាយករដ្ឋមន្រ្តី ក៏បានអំពាវនាវទៅដល់ប្អូនៗដែលបានជាប់ជាមន្រ្តីកសិកម្មឃុំ សូមប្រតិបត្តិជំនាញរបស់ខ្លួនដោយយកបេះដូងទៅជាមួយ ហើយក្នុងរយៈពេលដែលបំពេញភារកិច្ចនោះ ត្រូវជួយកសិករ ដោយបានន័យថា យើងធ្វើបុណ្យពិតប្រាកដជួយដល់កសិករ។
គួរជំរាបជូនថា ការប្រឡងជ្រើសរើសមន្រ្តីកសិកម្មឃុំ ធ្វើឡើងស្របតាមកម្មវិធីនយោបាយរបស់រាជរដ្ឋាភិបាលអាណត្តិទី៧ ក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ដើម្បីជួយទៅដល់ប្រជាកសិករតាមតំបន់មូលដ្ឋាន ។ យោងតាមគោលនយោបាយ ក្រសួងកសិកម្ម រុក្ខាប្រមាញ់ និងនេសាទ គ្រោងនឹងធ្វើការពង្រាយមន្រ្តីកសិកម្មឃុំចំនួន ១៦០០នាក់ ក្នុងបេសកកម្មធ្វើការបម្រើកសិករ ១.៦លាននាក់ ឬស្មើនឹងចំនួនប្រជាជន ៧.៥លាននាក់ នៅគ្រប់ភូមិ ឃុំទូទាំងប្រទេស ចាប់ពីឆ្នាំ២០២៣ ដល់ឆ្នាំ២០២៨៕
