ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងជំនួបជាមួយនិស្សិតជ័យលាភីអាហារូបករណ៍របស់រាជរដ្ឋាភិបាលជប៉ុន ក្នុងក្របខណ្ឌកម្មវិធី «អ្នកដឹកនាំវ័យក្មេង Young Leaders Program» ឆ្នាំ២០២៣-២០២៤ លោកជំទាវ អ៊ឹង កន្ថាផាវី រដ្ឋមន្រ្តីក្រសួងកិច្ចការនារី បានលើកឡើងពីសារៈសំខាន់ នៃការសិក្សាពេញមួយជីវិត ដែលទាំងអស់គ្នាត្រូវបន្តសិក្សា ស្វែងយល់ពីបរិបទថ្មីៗ នៃការវិវត្តរបស់សង្គម។
លោកជំទាវ អ៊ឹង កន្ថាផាវី ក៏បានផ្តល់អនុសាសន៍និស្សិតជ័យលាភី ត្រូវមានជំនាញទន់ ភាពទន់ភ្លន់ និងការបើកចិត្តទូលាយទទួលយកគំនិតថ្មីៗ នៅក្នុងការប្រាស្រ័យទាក់ទង និងភាពជាអ្នកដឹកនាំរបស់ខ្លួន និងត្រូវមានគោលការណ៍ច្បាស់លាស់ដើម្បីសម្រេចអ្វីដែលខ្លូនចង់បាន។
ជាមួយគ្នានេះ រដ្ឋមន្រ្តីក្រសួងកិច្ចការនារី ក៏បានផ្តាំផ្ញើឱ្យនិស្សិតទាំងអស់ត្រូវខិតខំរៀនសូត្រក្រេបយកចំណេះដឹងពង្រឹងសមត្ថភាព ត្រូវមានឥរិយាបថល្អក្នុងនាមជាអ្នកតំណាងប្រទេស និងមានសាមគ្គីភាពជាមួយគ្នា សាបព្រួសនូវអ្វីដែលជាអរិយធ៌ម វប្បធ៌មល្អរបស់កម្ពុជា ទៅដល់បរទេសឱ្យគេបានដឹងពីកម្ពុជាដើម្បីទាក់ទាញការវិនិយោគ និងកិច្ចសហប្រត្តិបត្តិការរវាងប្រទេសទាំងពីរ។ ជាពិសេសត្រូវត្រឡប់មកចូលរួមនៅក្នុងកិច្ចអភិវឌ្ឍសេដ្ឋកិច្ច-សង្គមទៅតាមជំនាញរបស់ខ្លួនរៀងៗខ្លួនបន្ទាប់ពីត្រូវបានបញ្ចប់ការសិក្សានៅទីនោះ ។
នាឱកាសនោះ លោកជំទាវរដ្ឋមន្ត្រីក៏បានបញ្ជាក់ពីបេសកកម្មចម្បងៗរបស់ក្រសួងកិច្ចការនារី និងសារៈសំខាន់នៃការលើកកម្ពស់ស្ថានភាពស្ត្រី និងសមភាពយេនឌ័រដែលជាកត្តារួមចំណែកដ៏មានសក្តានុពលក្នុងការសម្រេចបានកិច្ចអភិវឌ្ឍប្រកបដោយចីរភាព លើកកម្ពស់ជីវភាពគ្រួសារ កាត់បន្ថយអត្រាមរណៈភាពមាតា និងទារក លើកកម្ពស់អភិបាលកិច្ចល្អ និងបង្កើនផលិតភាពជាដើម។
សូមបញ្ជាក់ថា និស្សិតជ័យលាភីអាហារូបករណ៍រដ្ឋាភិបាលជប៉ុន ក្របខណ្ឌកម្មវិធី «អ្នកដឹកនាំវ័យក្មេង Young Leaders Program» ឆ្នាំសិក្សា២០២៣-២០២៤ មានចំនួន៣រូប មកពីទីស្តីការគណៈរដ្ឋមន្រ្តី ក្រសួងអប់រំ យុវជន និងកីឡា និងក្រសួងពាណិជ្ជកម្ម៕
