ថ្លែងក្នុង​ពិធីបើក​សន្និសីទ​វិទ្យាសាស្ត្រ​លើកទី១៤ ស្តីពី “ការប្រើប្រាស់​សក្តានុពល​នៃការស្រាវជ្រាវ និង​ការអភិវឌ្ឍន៍​ដើម្បី​នវានុវត្តន៍ និង​កំណើន” នៅ​វិទ្យាស្ថាន​បច្ចេកវិទ្យាកម្ពុជា ឯកឧត្ដម​បណ្ឌិត​សភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រី​ក្រសួងអប់រំ យុវជន និងកីឡា មានប្រសាសន៍​ថា ការស្រាវជ្រាវ និង​ការអភិវឌ្ឍន៍​ដើរ​តួសំខាន់​ក្នុងការ​ជំរុញ​នវានុវត្តន៍​លើគ្រប់វិស័យ។

ឯកឧត្ដ​មបណ្ឌិត​សភាចារ្យ ហង់ជួន ណារ៉ុន បានគូសបញ្ជាក់ពីសារៈសំខាន់នៃការស្រាវជ្រាវ និងការអភិវឌ្ឍក្នុងការជំរុញនវានុវត្តន៍លើគ្រប់វិស័យ ដើម្បីលើកកម្ពស់ប្រសិទ្ធភាព និងប្រសិទ្ធផលនៃ ផលិតកម្ម សេវាកម្ម និងដំណើរការសហគ្រាស ឧស្សាហកម្ម កិច្ចសហការរវាងស្ថាប័នសិក្សា ឧស្សាហកម្ម ទន្ទឹមនឹងការបង្កើតបរិយាកាសអំណោយផលសម្រាប់នវានុវត្តន៍ពីសំណាក់រាជរដ្ឋាភិបាល និងបានគូសរំលេចពីការសិក្សាស្រាវជ្រាវថ្មីៗជាច្រើន កំពុងផ្តោតស្រាវជ្រាវពាក់ព័ន្ធនឹងការវិវឌ្ឍដ៏ឆាប់រហ័សនៃ បញ្ញាសិប្បនិម្មិត (AI) ដោយខ្លះបានលើកឡើងពីក្តីបារម្ភថា AI នឹងដណ្ដើមការងាររបស់មនុស្ស ខណៈខ្លះទៀតបានអះអាងថា AI បាននិងកំពុងជួយសម្រួលការងាររបស់មនុស្ស ឱ្យកាន់តែមានប្រសិទ្ធភាពខ្ពស់ លើកកម្ពស់ការរៀន និងបង្រៀនជំនាញសតវត្សទី២១ ដោយមនុស្សត្រូវតែបន្តអភិវឌ្ឍសមត្ថភាព និងជំនាញ ដើម្បីអាចទាញយកអត្ថប្រយោជន៍ជាអតិបរមាពីការវិវឌ្ឍនៃ AI។

រដ្ឋមន្ត្រី​ក្រសួង​អប់រំ បន្ថែម​ថា រាជរដ្ឋាភិបាល​កម្ពុជា​បាន​និងកំពុង​អនុវត្ត​យុទ្ធសាស្ត្រ​លើក​កម្ពស់​ការស្រាវជ្រាវ និង​នវានុវត្តន៍ ដោយ​ផ្តោតលើ​ភាពជា​ដៃគូ​រវាង​ស្ថាប័នសិក្សា ឧស្សាហកម្ម និង​រដ្ឋាភិបាល ដើម្បី​ជំរុញ​ពិពិធ​កម្ម​សេដ្ឋកិច្ច ការអភិវឌ្ឍន៍​វិស័យ​ឯកជន និង​សង្គម​ឌីជីថល។ ជាការ​ឆ្លើយតបទៅ​នឹង​យុទ្ធសាស្ត្រ​បញ្ចកោណ​ដំណាក់កាលទី១ ក្រសួង​បាន​ដាក់ចេញ​នូវផែន​ការ​យុទ្ធសាស្ត្រ​អប់រំ ២០២៤-២០២៨ សំដៅធានាថា ប្រជាពលរដ្ឋ​កម្ពុជា​ទាំងអស់​ទទួលបាន​ការអប់រំ​ប្រកប​ដោយ​គុណភាព សមធម៌ និង​បរិយាប័ន្ន ដោយ​ផ្តោត​លើការ​ពង្រឹង​ និងពង្រីក​ចំណេះដឹង ជំនាញ​សតវត្សទី២១ វិន័យ សីលធម៌ សុជីវធម៌ សុខភាព កាយសម្បទា និងការរៀនសូត្រ​ពេញ​មួយ​ជីវិត។

ឯកឧត្ដម​បណ្ឌិត​សភាចារ្យ ហង់ជួន ណារ៉ុន បន្តថា ចក្ខុវិស័យ​នៃ​ការ​ស្រាវជ្រាវ​ដើម្បី​អភិវឌ្ឍន៍ និង​នវានុវត្តន៍ មិន​អាច​សម្រេច​បាន​ឡើយ បើមិនមាន​កិច្ច​សហការ​គាំទ្រពី​សំណាក់​ដៃគូ​អភិវឌ្ឍ​អន្តរជាតិ​ទាំងអស់។ ឯកឧត្ដម​បណ្ឌិត​សភាចារ្យ ក៏លើកទឹកចិត្ត​ឱ្យនិស្សិត​កម្ពុជា​បន្ត​អភិវឌ្ឍ​ចំណេះជំនាញ​ តាមរយៈ​ការបន្តចូលរួម​ក្នុង​វេទិកា​ចែករំលែក​បទពិសោធន៍ ចំណេះដឹង ការ​សិក្សា​ស្រាវជ្រាវ នវានុវត្តន៍​កម្រិតជាតិ និង​អន្តរជាតិ ដើម្បីក្លាយ​ជា​កម្លាំង​ចលករ​ចូលរួម​ចំណែក​ក្នុងការ​អភិវឌ្ឍ​សេដ្ឋកិច្ចសង្គម​ជាតិ​ប្រកប​ដោយ​ចីរភាព។

រដ្ឋមន្ត្រី​ក្រសួងអប់រំ ក៏​បាន​លើក​ឡើង​ដែរ​ថា សន្និសីទ​វិទ្យាសាស្ត្រ​លើក​ទី១៤ បាន​ផ្ដល់​ឱកាស​ដល់​អ្នកស្រាវជ្រាវ និង​និស្សិត​ក្នុងការ​ដាក់​បង្ហាញ​ស្នាដៃ​ដែល​ជាលទ្ធផល​ស្រាវជ្រាវ​របស់​ពួកគេ បង្កើត​បណ្ដាញ​ជាមួយ​អ្នក​ជំនាញ​ឧស្សាហកម្ម​ពាក់ព័ន្ធ ចូលរួម​លើកកម្ពស់​ការទទួល​ស្គាល់​ចំពោះ​សហគមន៍​ស្រាវជ្រាវ ព្រមទាំង​ជាឱកាស​សម្រាប់​សិស្សវិទ្យាល័យ​ទទួលបាន​ការយល់ដឹង​ស៊ីជម្រៅ​អំពី​មុខ​វិជ្ជា STEM នៅ ITC ដែល​ជួយពួកគេ​ឱ្យត្រៀមខ្លួន​បានល្អ​ប្រសើរ​សម្រាប់​អនាគត​សិក្សា និង​អាជីព​នាពេល​ខាងមុខ។

គួរ​ជំរាប​ជូនថា សន្និសីទ​វិទ្យាសាស្ត្រ​លើកទី១៤នេះ រៀបចំឡើង​ក្នុងគោលបំណង​ដើម្បី​អបអរសាទរ កម្លាំង​ថាមពល នៃ​ការស្រាវជ្រាវ និង​អភិវឌ្ឍន៍ ដើម្បី​ជំរុញ​កម្ពុជា​ឱ្យរីកចម្រើន ហើយនេះ​ក៏ជាវេទិកា​ដ៏មានសារៈសំខាន់​សម្រាប់​ចែករំលែក​ចំណេះដឹង បទពិសោធន៍ លទ្ធផល​ស្រាវជ្រាវ រវាង​គ្រឹះស្ថាន​បណ្ដុះបណ្ដាល​ក្នុងប្រទេស និង​ក្រៅ​ប្រទេស និង​វិស័យ​ឯកជន​នានា និង​ដើម្បី​បង្កើន​ភាពជា​ដៃគូ​ក្នុងការ​បណ្ដុះបណ្ដាល និង​ស្រាវជ្រាវ​រួមគ្នា៕