វិទ្យាល័យ​ទេពប្រណម្យ ក្នុង​ខេត្តកណ្តាល ត្រូវ​បានក្រសួងអប់រំជ្រើសរើស​សម្រាប់​ការ​អនុវត្ត​គន្លងសិក្សា​ថ្មី ដោយរំពឹងថា នឹងជួយ​សិស្ស​ឱ្យ​ទទួលបាន​ការ​អប់រំ​ដែលមាន​ជំនាញ​ច្បាស់លាស់ និងកាត់បន្ថយ​អត្រាបោះបង់ការសិក្សា​របស់សិស្ស។

គន្លងអប់រំថ្មី ដែល​ក្រសួងអប់រំ កំពុងធ្វើការ​សាកល្បង គឺ​នៅ​តាម​វិទ្យាល័យ​ដែលមានទីតាំង​ស្ថិត​នៅ​ក្បែរ​តំបន់សេដ្ឋកិច្ច​ពិសេស ក៏​ដូចជា​តំបន់ដែលមាន​ដំណើរការ​សេដ្ឋកិច្ច វិទ្យាល័យដែលមានអគារធនធាន, វិទ្យាល័យមានមជ្ឈមណ្ឌលបច្ចេកវិទ្យាឌីជីថលសហគមន៍ និងគ្រឹះស្ថានសិក្សាអប់រំបច្ចេកទេសជាដើម។ វិទ្យាល័យ​ដែល​នឹង​ត្រូវ​អនុវត្ត​គន្លងអប់រំថ្មី នឹងត្រូវផ្តោត​ទៅលើការ​បង្រៀន​ផ្នែក​វិទ្យាសាស្រ្ត វិទ្យាសាស្រ្តសង្គម និងគន្លងវិជ្ជាជីវៈ ចាប់ពីថ្នាក់ទី១០ ដល់ថ្នាក់ទី១២។

ថ្លែងក្នុងកិច្ចប្រជុំស្តីពី ការអនុវត្តសាកល្បងគន្លងអប់រំថ្មី នៅវិទ្យាល័យទេពប្រណម្យ ខេត្តកណ្តាល ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា មានប្រសាសន៍ថា ការរៀបចំឱ្យមានគន្លងអប់រំថ្មីនេះ គឺតបតាមអនុសាសន៍ដ៏ខ្ពង់ខ្ពស់របស់សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ដែលចង់បង្កលក្ខណៈកាន់តែច្រើនដើម្បីឱ្យសិស្សចូលរៀនបន្ថែមទៀតនៅកម្រិតមមធ្យមសិក្សា ទាំងបឋមភូមិ និងទុតិយភូមិ និងមានគោលដៅបង្កើនប្រសិទ្ធភាព នៃប្រព័ន្ធអប់រំបច្ចុប្បន្នឱ្យឆ្លើយតបនឹងស្ថានភាពជាក់ស្តែងរបស់កម្ពុជា សំដៅកាត់បន្ថយអត្រាបោះបង់ការសិក្សា។

ឯកឧត្តមបណ្ឌិតសភាចារ្យ ហង់ជួន ណារ៉ុន បន្ថែមថា គន្លងអប់រំថ្មីនេះ ក៏នឹងជួយសម្រាលស្ថានភាពយុវជន ឬកុមារនៃគ្រួសារពលករកម្ពុជាដែលវិលត្រឡប់ពីប្រទេសថៃ ដែលមានការលំបាកក្នុងការចាប់យកការសិក្សាចំណេះទូទៅ អាចចាប់ផ្តើមចូលរៀនកម្មវិធីស្ពានចម្លងស្របតាមវ័យរបស់ពួកគេ ដើម្បីទទួលចំណេះជំនាញច្បាស់លាស់សម្រាប់កសាងអនាគត។

សម្រាប់ការ​អនុវត្ត​កម្មវិធីគន្លងថ្មី​នៅ​វិទ្យាល័យ​ទេពប្រណម្យ នេះដែរ ឯកឧត្តមរដ្ឋមន្រ្តី ក៏បានស្នើឱ្យបញ្ចូលកម្មវិធីរៀនថ្មីៗ ទំនើបៗ ដូចជាជំនាញឌីជីថល Coding AI ឌីហ្សាញ ជាដើម ដើម្បីឆ្លើយតបនឹងទីផ្សារការងារ ក៏ដូចជានាយកដ្ឋានពាក់ព័ន្ធចូលរួមគាំទ្រ ជាពិសេសការចូលរួមសហការពីសំណាក់ ក្រសួងការងារ និងបណ្ដុះបណ្ដាលវិជ្ជាជីវៈ។ លើសពីនេះ ផ្សារភ្ជាប់កម្មវិធីរៀននេះ ទៅនឹងឧត្តមសិក្សា ដោយអញ្ជើញគ្រូ ឬ សាស្ត្រាចារ្យនៅឧត្តមសិក្សាមកជួយបង្រៀន និងអាចផ្តល់ឱកាសដល់សិស្សដែលរៀនពូកែមានឱកាសបន្តទៅរៀននៅសាកលវិទ្យាល័យ។

ជាមួយគ្នានេះ បញ្ចូលយុទ្ធសាស្ត្របង្រៀននៅសាលាជំនាន់ថ្មី សហការជាមួយគម្រោងកែលម្អកម្មវិធីអប់រំនានា ដោយត្រូវប្រើប្រាស់ធនធានឱ្យអស់ពីលទ្ធភាព និងមានប្រសិទ្ធភាព ក៏ដូចជាស្វែងរកការគាំទ្របន្ថែម និងបង្កើតភាពជាដៃគូជាមួយដៃគូអភិវឌ្ឍនានា ព្រមទាំងស្នើឱ្យក្រុមការងារគោលនយោបាយ ក្នុងកិច្ចសហការជាមួយក្រសួងការងារ និងបណ្ដុះបណ្ដាលជំនាញវិជ្ជាជីវៈ បន្តសិក្សាបន្ថែមពីទីផ្សារការងារ និងជំនាញដែលមានតម្រូវការនាពេលបច្ចុប្បន្ន និងអនាគត៕