​ក្នុង​ទិវាអន្តរជាតិសម្រាប់យុវជន ១២ សីហា និងវគ្គផ្តាច់ព្រ័ត្រ នៃកម្មវិធីជជែកដេញដោលយុវជនថ្នាក់ជាតិ ២០២៥ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា មានប្រសាសន៍ថា ការជជែកដេញដោល គឺជាវិធីសាស្ត្រមួយក្នុងការបណ្ដុះបំណិនសតវត្សទី២១ ដល់យុវជន ដែលជាបំណិនចាំបាច់សម្រាប់ឈោងទៅរកភាពជោគជ័យក្នុងជីវិតសិក្សា និងការងារ, ទន្ទឹមនឹងកត្តាផ្សេងៗទៀតដូចជា ទេពកោសល្យ ការធ្វើអ្វីមួយដោយការស្រលាញ់ បរិស្ថានអំណោយផល ការជម្នះ និងឧស្សាហ៍ព្យាយាម។

ឯកឧត្តមបណ្ឌិតសភាចារ្យ ហង់ជួន ណារ៉ុន មានប្រសាសន៍ថា កម្មវិធីជជែកដោលយុវជនថ្នាក់ជាតិ មិនត្រឹមតែជាវេទិកាបង្ហាញចំណេះដឹងប៉ុណ្ណោះទេ ថែមទាំងជាការអនុវត្តជាក់ស្ដែងក្នុងការបណ្ដុះបំណិនសតវត្សទី២១។ ឯកឧត្តមរដ្ឋមន្រ្តី​ ក៏បានលើកទឹកចិត្តដល់ក្មួយៗឱ្យបន្តការខិតខំរៀនសូត្រ និងស្វែងយល់បន្ថែមអំពីបច្ចេកវិទ្យាថ្មីៗ ជាពិសេសបញ្ញាសិប្បនិម្មិត (AI) ដែលជាកត្តាចាំបាច់សម្រាប់ការអភិវឌ្ឍខ្លួនឯង និងចូលរួមចំណែកក្នុងការអភិវឌ្ឍសេដ្ឋកិច្ចជាតិ។

រដ្ឋមន្រ្តីក្រសួងអប់រំបន្ថែមថា យុវជនត្រូវបន្តខិតខំពង្រឹងសមត្ថភាពចំណេះដឹង បច្ចេកវិទ្យាឌីជីថល និងបញ្ញាសិប្បនិមិ្មត ដើម្បីដើរឱ្យទាន់សម័យកាលបដិវត្តន៍ឧស្សាហកម្មជំនាន់ទី៤ និងបរិវត្តកម្មបច្ចេកវិទ្យាឌីជីថល។ ចំណេះដឹងបញ្ញាសិប្បនិម្មិត (AI) នឹងក្លាយជាឧបករណ៍ជំនួយដ៏មានតម្លៃបន្ថែមសម្រាប់ជួយសមត្ថភាពគិត វិភាគ និងដោះស្រាយបញ្ហាជាក់លាក់ ដោយបច្ចេកវិទ្យា គឺវិវត្តន៍ចេញពីការយកលំនាំតាមសមត្ថភាពខួរក្បាលរបស់មនុស្ស។

បើតាម​ប្រសាសន៍របស់ឯកឧត្តមបណ្ឌិតសភាចារ្យ បច្ចុប្បន្នក្រសួងអប់រំ បានបញ្ចូលបំណិនសតវត្សទី២១ ទៅក្នុងវិធីសាស្ត្របង្រៀននៅតាមសាលា ដូចជានៅសាលាជំនាន់ថ្មី តាមរយៈការរៀបចំថ្នាក់រៀនតាមបែបសិក្សាស្រាវជ្រាវ ឱ្យសិស្សចេះវិភាគត្រិះរិះពិចារណា ជំរុញនូវនវានុវត្តន៍ និងសហគ្រិនភាព។ ក្នុងនោះ ក្រសួងក៏បានបញ្ចូលវិធីសាស្ត្រសាលារៀនជំនាន់ថ្មីទៅក្នុងស្តង់ដាសាលារៀនគំរូ ដើម្បីបន្តជំរុញលើកកម្ពស់គុណភាពអប់រំនៅកម្ពុជា និងលើកទឹកចិត្តសាលារៀនគ្រប់រាជធានី-ខេត្ត ឱ្យបន្តអភិវឌ្ឍសមត្ថភាពក្លាយជាសាលារៀនជំនាន់ថ្មី ដោយចក្ខុវិស័យរបស់ក្រសួងអប់រំ គឺ ខេត្តមួយ ត្រូវមានសាលារៀនជំនាន់ថ្មីមួយយ៉ាងតិច។

ជាមួយគ្នានេះ រដ្ឋមន្រ្តីក្រសួងអប់រំ ក៏​បានថ្លែងអំណរគុណចំពោះថ្នាក់ដឹកនាំ និងមន្ត្រីអប់រំគ្រប់លំដាប់ថ្នាក់ នៃអគ្គនាយកដ្ឋានយុវជន និងរបស់នាយកដ្ឋានអប់រំយុវជន និងកុមារ ដែលបានខិតខំប្រឹងប្រែងរៀបចំកម្មវិធីជជែកដេញដោល ដើម្បីឆ្លើយតបទៅនឹងតម្រូវការយុវជន ជួយជំរុញសកម្មភាពរបស់យុវជននៅមូលដ្ឋាន និងសហគមន៍ ឱ្យមានភាពជឿនលឿនតាមការវិវត្តរបស់បច្ចេកវិទ្យានាពេលបច្ចុប្បន្ន៕