ថ្លែងក្នុងពិព័រណ៍សៀវភៅកម្ពុជាលើកទី១១ ក្រោម​ប្រធានបទ “អ្នកអាន ជាអ្នករៀនពេញមួយជីវិត” នាព្រឹកថ្ងៃទី១៩ ខែធ្នូ ឆ្នាំ២០២៤ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ​ យុវជន និងកីឡា មានប្រសាសន៍ថា ពិព័រណ៍សៀវភៅកម្ពុជា បានលើកទឹកចិត្តឱ្យអ្នកនិពន្ធបន្តសរសេរ ហើយ​អ្នកអានបន្តអាន ដើម្បីលើកស្ទួយខឿនវប្បធម៌ អរិយធម៌របស់ប្រទេសកម្ពុជា។

រដ្ឋមន្រ្តីក្រសួងអប់រំ​បន្ថែមថា ការតែងនិពន្ធ និងការបោះពុម្ពផ្សាយ បានឆ្លុះបញ្ចាំងអំពីការអភិវឌ្ឍនៃសេដ្ឋកិច្ចសង្គម។ ប្រសិន​បើគ្មានសៀវភៅទេ គឺមិនអាចផ្ទេរចំណេះដឹងដល់មនុស្សពីមួយជំនាន់ទៅមួយជំនាន់ទៀតបានឡើយ។ ដូច្នេះ សៀវភៅមានការចាំបាច់ទាំងផ្សាយចំណេះដឹងទូទៅ ផ្សព្វផ្សាយចំណេះដឹងផ្នែកវិទ្យាសាស្រ្ត បច្ចេកវិទ្យា ជាពិសេសផ្សព្វផ្សាយវប្បធម៌ ជាអក្សរសាស្រ្តជាតិ។

ឯកឧត្តមបណ្ឌិតសភាចារ្យ ហង់ជួន ណារ៉ុន សង្ឃឹមថា វិស័យតែងនិពន្ធនៅកម្ពុជានិងរីកចម្រើន តាមរយៈការកើនឡើងនៃអ្នកនិពន្ធកាន់តែច្រើន ដើម្បីនាំមកនូវចំណេះដឹងទូលំទូលាយដល់ប្រជាជនកម្ពុជា។ ឯកឧត្តមបណ្ឌិតសភាចារ្យ ក៏បានលើកទឹកចិត្តយុវជន ចាប់កាន់សៀវភៅ ហើយប្តេជ្ញាចិត្តអានសៀវភៅ ក្រេបយកចំណេះដឹងកម្រិតខ្ពស់ ដើម្បីកសាងធនធានមនុស្សនៅកម្ពុជា ដោយកុំតាមដានរឿងរ៉ាវលើបណ្ដាញសង្គម ការឈ្លោះប្រកែកគ្នា ដែលជាចំណេះដឹងកម្រិតទាប។

សម្រាប់លោកជំទាវបណ្ឌិតសភាចារ្យ ភឿន សកុណា រដ្ឋមន្រ្តីក្រសួងវប្បធម៌ និងវិចិត្រសិល្បៈ ពិព័រណ៍សៀវភៅកម្ពុជា ជាព្រឹត្តិការណ៍មានសារៈសំខាន់ ព្រោះជាទិវាជួបជុំរវាងអ្នកនិពន្ធ អ្នកអាន អ្នកបោះពុម្ពផ្សាយ អង្គការ សមាគមន៍ ធ្វើការពាក់ព័ន្ធជាមួយសៀវភៅ បណ្ណារក្ស អ្នកស្រាវជ្រាវ សិស្ស និស្សិត បញ្ញវន្ត និងសាធារណៈជនទូទៅ។ លោកជំទាវបន្តថា តាមរយៈជំនួបនេះ ជួយឱ្យពួកគេបានជជែកពិភាក្សា ដកស្រង់យកបទពិសោធន៍ ស្វែងយល់ពីគ្នាទៅវិញទៅមកពីចំណុចកែលម្អ ចំណុចខ្វះខាត តម្រូវការ និងផលលំបាកទាំងភាគីអ្នកអាន និងអ្នកនិពន្ធ ព្រមទាំងជាកម្លាំងថាមពលដ៏សំខាន់ដើម្បីជួយជំរុញទឹកចិត្តកូនខ្មែរឱ្យមានទម្លាប់ស្រឡាញ់ចូលចិត្តការអានតាំងពីក្មេង។

រដ្ឋមន្រ្តីក្រសួងវប្បធម៌ បន្ថែមថា ការអានជាទម្លាប់ត្រូវមានតាំងពីក្មេង ហើយការអានរបស់ក្មេងអាស្រ័យទៅលើឪពុកម្ដាយ ។ ជាមួយគ្នា​លោកជំទាវបណ្ឌិតសភាចារ្យ ក៏បានលើកទឹកចិត្តឱ្យឪពុកម្ដាយនាំកូនមកទិញសៀវភៅក្នុងពិព័រណ៍សៀវភៅកម្ពុជានេះ ហើយបង្រៀនកូនឱ្យអាននៅផ្ទះបន្ថែម។ ជាពិសេសសម្រាប់និស្សិតរៀនដល់ថ្នាក់បរិញ្ញាបត្រ បរិញ្ញាបត្រជាន់ខ្ពស់ គឺកាន់តែត្រូវអានសៀវភៅកាន់តែច្រើន។

បើតាម លោក ហុក សុទ្ធិ នាយកអង្គការស៊ីប៉ា (SIPA) និងជាតំណាង​គណៈកម្មការ​ពិព័រណ៍​សៀវភៅ​កម្ពុជា មានប្រសាសន៍ថា ពិព័រណ៍សៀវភៅកម្ពុជាលើកទី១១ ធ្វើឡើងក្រោមប្រធានបទ “អ្នកអាន ជាអ្នករៀនពេញមួយជីវិត” មានស្តង់តាំងពិព័រណ៍សៀវភៅសរុបចំនួន ២៩៤ស្ដង់។

ជាការកត់សម្គាល់ ពិព័រណ៍សៀវភៅកម្ពុជា កាន់តែមានប្រជាប្រិយភាពពីមួយឆ្នាំទៅមួយឆ្នាំ ដោយបានទាក់ទាញអ្នកចូលរួមកាន់តែច្រើនពីសំណាក់យុវជន ក្រុមគ្រួសារ រហូតក្លាយជាពិព័រណ៍ដែលមានអ្នកចូលរួមទស្សនាច្រើនជាងគេ។ ពិព័រណ៍សៀវភៅកម្ពុជា ចាប់ផ្ដើមដំបូងនៅឆ្នាំ២០១១ ដោយ​ពេលនោះមានស្តង់ចំនួន១០ និង​អ្នកចូលរួមទស្សនា​ប្រហែល​១ពាន់នាក់ រហូត​ដល់​ពិព័រណ៍សៀវភៅកម្ពុជាលើកទី១០ កាលពីឆ្នាំ២០២៣ ស្តង់ដែលបានចូលរួមមានរហូតដល់ ២៤៥ស្តង់ ដោយមានអ្នកចូលរួមទស្សនាប្រហែល ២០ម៉ឺននាក់ ក្នុងរយៈពេល ៤ថ្ងៃ។ ​សម្រាប់ឆ្នាំនេះ ពិព័រណ៌សៀវភៅកម្ពុជា​លើកទី១១ នឹងធ្វើ​ឡើងរយៈពេល៤ថ្ងៃ ចាប់ពីថ្ងៃទី១៩ដល់ថ្ងៃទី២២ ខែធ្នូ ឆ្នាំ២០២៤ ដោយរំពឹងថា នឹងមានអ្នកចូលរួមទស្សនាច្រើនជាង២០ម៉ឺននាក់៕