ដើម្បីលើកកម្ពស់វិស័យអប់រំបណ្តុះធនធានបន្តវេនជំនាន់ក្រោយ ក្រុមហ៊ុន ខ្មែរ ប៊ែវើរីជីស បានចុះហត្ថលេខាលើអនុស្សរណៈយោគយល់គ្នាជាមួយ អាហារូបករណ៍អភិសន្តិបណ្ឌិត ស សុខា តាមរយៈការផ្តល់អាហារូបករណ៍ ជាពិសេស ឱកាសហាត់ការ និងឱកាសការងារលើជំនាញជាច្រើននៅក្នុងរោងចក្រលំដាប់ពិភពលោក ខ្មែរ ប៊ែវើរីជីស ដល់និស្សិតអាហារូបករណ៍ផ្ទាល់។

អនុស្សរណៈនៃការយោគយល់គ្នានេះ បានធ្វើឡើងនៅសណ្ឋាគារ ហ្វ៊ែរហ្វៀរ បាយ ម៉ារៀ កាលពីថ្ងៃទី ២០ ខែកុម្ភៈ ឆ្នាំ ២០២៦ ក្នុងគោលបំណងអភិវឌ្ឍន៍ធនធានវ័យក្មេង ផ្តល់ឱកាសបណ្តុះបណ្តាល អនុវត្តការងារ និងឱកាសការងារពេញសិទ្ធិផ្សេងៗសម្រាប់និសិ្សត ដែលកំពុងបន្ត និងបញ្ចប់ការសិក្សា។ លើសពីនេះ ជំរុញការផ្សារភ្ជាប់រវាងការសិក្សាទ្រឹស្តី និងការអនុវត្តជាក់ស្តែងនៅក្នុងវិស័យឧស្សាហកម្ម និងសេវាកម្ម ព្រមទាំងលើកកម្ពស់សមត្ថភាពនិសិ្សតគ្រប់រូបឱ្យសមស្របតាមទីផ្សារការងារជាតិ និងអន្តរជាតិ។

លោកអគ្គនាយកបន្តវេន អ៊ឹង វីរៈ នៃក្រុមហ៊ុន ខ្មែរ ប៊ែវើរីជីស មានប្រសាសន៍ថា ការចុះអនុស្សារណៈយោគយល់ជាមួយ អាហារូបករណ៍អភិសន្តិបណ្ឌិត ស សុខា គឺដើម្បីអភិវឌ្ឍសង្គមតាមរយៈធនធានជំនាន់ក្រោយ ជាពិសេស គឺបន្តសម្រេចបំណងប្រាថ្នារបស់សិស្ស-និស្សិតគ្រប់រូប ក្នុងការបណ្តុះបណ្តាលខ្លួនឱ្យក្លាយជាបញ្ញាវ័ន ឬអ្នកឯកទេសក្នុងវិស័យផ្សេងៗ នាពេលខាងមុខ។

អគ្គនាយកបន្តវេន អ៊ឹង វីរៈ បញ្ជាក់ថា ក្រុមហ៊ុន ជីប ម៉ុង ព្រមទាំងពហុពាណិជ្ជកម្មជាង ១៤ បានផ្តល់ឱកាសហាត់ការ Young Talent ដល់សិស្ស-និស្សិតរាប់រយនាក់ក្នុងមួយឆ្នាំៗលើគ្រប់វិស័យ ដើម្បីផ្សារភ្ជាប់ជំនាញ និងបទពិសោធន៍ជាក់ស្តែងដល់កូនខ្មែរជំនាន់ក្រោយ។

ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាស្ថាបនិកអាហាររូបករណ៍អភិសន្តិបណ្ឌិត ស សុខា មានប្រសាសន៍ថា ការចុះអនុស្សរណៈយោគយល់គ្នានេះ គឺបង្ហាញយ៉ាងច្បាស់ពីការចូលរួមចំណែកយ៉ាងសំខាន់ក្នុងការអភិវឌ្ឍធនធានមនុស្ស ដើម្បីឆ្លើយតបទៅនឹងចក្ខុវិស័យអប់រំ ដែលជាជាវិស័យអាទិភាពទី១ របស់យុទ្ធសាស្រ្តបច្ចកោណ ដំណាក់កាលទី១ របស់រាជរដ្ឋាភិបាលនីតិកាលទី៧ នៃរដ្ឋសភា ដោយកំណត់យកបញ្ចកោណទី១ គឺការអភិវឌ្ឍធនធានមនុស្ស ដែលជាកត្តាចាំបាច់ក្នុងការចូលរួមចំណែកដើម្បីពង្រឹងសេដ្ឋកិច្ចជាកម្ពុជា ។

គួរជំរាបជូនថា ក្រុមហ៊ុន ខ្មែរ ប៊ែវើរីជីស ជាក្រុមហ៊ុនកូនខ្មែរ ដែលមានសហគ្រិនខ្មែរ ១០០% នឹងនៅតែបន្តការគាំទ្រក្នុងការលើកកម្ពស់វិស័យការអប់រំ និងចំណេះដឹង និងបណ្តុះបណ្តាលធនធានកូនខ្មែរជំនាន់ក្រោយ រួមបញ្ចូលទាំងជំនាញទន់ និងរឹង៕