លោកបណ្ឌិត គី សេរីវឌ្ឍន៍ អ្នកជំនាញ​សេដ្ឋកិច្ច នៃរាជបណ្ឌិតសភា​កម្ពុជា លើកឡើងថា ការ​ណែនាំរបស់សម្តេចនាយករដ្ឋមន្រ្តី ឱ្យ​បន្ត​ពង្រឹងកម្មវិធី​បង្កើន​ជំនាញ (UpSkilling) និងការផ្លាស់ប្តូរជំនាញ (ReSkilling) ដល់​កម្មករ​និយោជិត គឺមានសារៈសំខាន់​ណាស់​ក្នុង​ការ​បង្កើន​ផលិតភាព​ការងារ​នៅក្នុងវិស័យ​ឧស្សាហកម្មកម្ពុជា។

អ្នកជំនាញសេដ្ឋកិច្ច នៃរាជបណ្ឌិតសភាកម្ពុជា មានប្រសាសន៍ថា គោលដៅ​របស់រាជរដ្ឋាភិបាល​អាណត្តិទី៧នេះ គឺ​បាន​ដាក់​គោលនយោបាយ​រុញ​ច្រាន​វិស័យ​ឧស្សាហកម្ម​នៅក្នុងស្រុក ក្នុងគោលបំណង​បង្កើន​តម្លៃ​បន្ថែម ដូច្នេះ​ហើយ​មាន​តែ​ការ​ពង្រឹងកម្មវិធី​ការ​បង្កើនជំនាញ (UpSkilling) និងការផ្លាស់ប្តូរ​ជំនាញ (ReSkilling) ដល់​កម្មករ​និយោជិត​ទេ ដែលអាច​ឱ្យ​គោលនយោបាយ​នេះ​ដើរ​ទៅមុខ​បាន។

លោកបណ្ឌិត គី សេរីវឌ្ឍន៍ បន្ថែមថា ក្នុងយន្តការ​បណ្តុះបណ្តាល​វិជ្ជាជីវៈ ការ​ពង្រឹងកម្មវិធី​ការ​បង្កើន​ជំនាញ (UpSkilling) និង​ការផ្លាស់ប្តូរជំនាញ (ReSkilling) ដល់​កម្មករនិយោជិត គឺជា​កិច្ច​ការ​មួយ​សំខាន់​ណាស់​សម្រាប់​លើក​កម្ពស់​សមត្ថភាព​ជំនាញ​ទៅ​ដល់​កម្មករនិយោជិត​ដែល​កំពុង​បម្រើ​ការងារ​នៅ​តាម​រោងចក្រ​សហគ្រាស បើទោះ​បីពួកគាត់​មាន​ជំនាញ និងគ្មាន​ជំនាញ​ក៏ដោយ។

លោកបណ្ឌិតបានសង្កត់ធ្ងន់ថា ប្រសិនបើកម្ពុជាជោគជ័យលើការពង្រឹងកម្មវិធីការបង្កើនជំនាញ (Upskilling) និងការផ្លាស់ប្តូរជំនាញ (Reskilling) ដល់កម្មករនិយោជិតគោលដៅហើយ នោះកម្លាំងជំនាញនៅកម្ពុជានឹងមានសញ្ញាណល្អរុញច្រានវិស័យការងារនៅកម្ពុជាដើរទៅមុខ ជាពិសេសនោះទាក់ទាញភ្នែកអ្នកវិនិយោគទាំងក្រៅស្រុក និងនៅក្នុងស្រុក លើវិស័យឧស្សាហកម្មធំៗមកកាន់ប្រទេសកម្ពុជា ពីព្រោះពួកគេយល់ថា កម្ពុជាមានធនធានមនុស្សរួចជាស្រេចដែលអាចឆ្លើយតបទៅនឹងតម្រូវការការងាររបស់ក្រុមហ៊ុនពួកគេបាន។ 

គួរ​បញ្ជាក់ថា ក្នុងពិធីបិទសន្និបាតក្រសួងការងារ និង​បណ្តុះបណ្តាលវិជ្ជាជីវៈ កាលពីពេលថ្មីៗនេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីបានណែនាំឱ្យក្រសួងការងារ និងបណ្តុះបណ្តាលវិជ្ជាជីវៈត្រូវបន្តពង្រឹងកម្មវិធីការបង្កើនជំនាញ (Upskilling) និងការផ្លាស់ប្តូរជំនាញ (Reskilling) ដល់កម្មករនិយោជិតដែលកំពុងបំពេញការងារគ្មានជំនាញ, មិនមានជំនាញគ្រប់គ្រាន់ ឬខុសជំនាញ, អ្នកបាត់បង់ការងារ, និងអ្នករងផលប៉ះពាល់ពីការប្រែប្រួលនៃបច្ចេកវិទ្យា និងពិភពការងារ ដើម្បីលើកកម្ពស់ផលិតភាពការងារ, ការជំរុញការអនុវត្តកាតព្វកិច្ចហ្វឹកហ្វឺនកូនជាង និងការផ្តល់ឱកាសចុះកម្មសិក្សា, ទទួលការបណ្តុះបណ្តាល និងបង្កើនសមត្ថភាពកម្មករនិយោជិត នៅនឹងកន្លែងការងារ, ព្រមទាំងការអនុវត្តកម្មវិធីបណ្តុះបណ្តាល តាមថ្នាលឌីជីថលនៅកន្លែងការងារ, កម្មវិធីបែបចម្រុះ ឬឆ្លាស់ ជាពិសេសការផ្តល់ឱកាសទទួលបានការសិក្សាពេញមួយជីវិត, ការធ្វើតេស្តវាយតម្លៃសមត្ថភាពពីមុន និងសមត្ថភាពបច្ចុប្បន្ន, និងការអនុវត្តការទទួលស្គាល់ជំនាញគ្នាទៅវិញទៅមក ក្នុងតំបន់អាស៊ានជាដើម៕