ខណៈយុវសិស្សដែលទើបប្រឡងសញ្ញាបត្របាក់ឌុបកំពុងរង់ចាំលទ្ធផល និង​កំពុងពិចារណាថា តើ​នឹងត្រូវបន្តរៀនជំនាញអ្វីបន្តទៀតក្រោយបញ្ចប់ថ្នាក់វិទ្យាល័យនោះ ឯកឧត្តម លាង មុនីរិទ្ធ រដ្ឋលេខាធិការក្រសួងរៀបចំដែនដី នគរូបនីយកម្ម និង​សំណង់ បានផ្តល់ដំបូន្មានដល់ប្អូនៗ ក្មួយៗ គួរតែកំណត់គោលដៅ និងគោលបំណងដែលខ្លួនចង់ក្លាយជាអ្វីទៅថ្ងៃអនាគត រួចជ្រើសរើសជំនាញនោះ។

ឯកឧត្តមរដ្ឋលេខាធិការមានប្រសាសន៍ថា យុវសិស្ស​ត្រូវជ្រើសរើសជំនាញស្របតាមចំណង់ចំណូលចិត្ត ហើយក៏​ស្របតាមតម្រូវការទីផ្សារការងារផងដែរ នោះទើបអាចទទួលបានឱកាសការងារល្អ។

“យុវជនត្រូវកំណត់ថាអ្វីដែលយើងចង់ក្លាយទៅជានៅថ្ងៃមុខ ជាវិស្វករ ស្ថាបត្យករ ជាអ្នកច្បាប់ ជាអ្នក IT ត្រូវសម្រេចចិត្តឱ្យច្បាស់មុនឈានជើងចូលមហាវិទ្យាល័យ”។

ឯកឧត្តម លាង មុនីរិទ្ធ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់

ជាមួយគ្នានេះ បើតាមឯកឧត្តម លាង មុនីរិទ្ធ បច្ចុប្បន្នក្រសួងរៀបចំដែនដី នគរូបនីយកម្ម និងសំណង់ កំពុងត្រូវការអ្នកជំនាញជាច្រើន​ដើម្បីជួយគាំទ្រ​ដល់កិច្ចការងាររបស់ក្រសួង ដូចជា វិស្វករសំណង់ វិស្វករទឹក វិស្វករភ្លើង ស្ថាបត្យកម្ម ការរៀបចំទីក្រុង រៀបចំផ្សារជនបទ ។ ឯកឧត្តមរដ្ឋលេខាធិការបញ្ជាក់ថា ជំនាញទាំងអស់នេះ សុទ្ធតែជាតម្រូវការទីផ្សារការងារ ហើយក៏នៅមានលក្ខណៈចង្អៀតនៅឡើយ។ ដូច្នេះឯកឧត្តមលើកទឹកចិត្តយុវជន ប្រសិនបើមានបំណងចង់ចូលរួមកិច្ចការងារជាមួយក្រសួងរៀបចំដែនដី នគរូបនីយកម្ម និងសំណង់ គួរខិតខំរៀនសូត្រនូវជំនាញទាំងអស់នេះ ឬអាចដកពិសោធន៍ ហើយប្ដូរផ្នត់គំនិតពីការសិក្សាស្ថាបត្យកម្មបែបបុរាណមកបញ្ជូលការច្នៃប្រឌិដ្ឋឱ្យទាន់សម័យ ។

តាមការបញ្ជាក់របស់ឯកឧត្តមរដ្ឋលេខាធិការ ជារៀងរាល់ឆ្នាំក្រសួងរៀបចំដែនដី តែងតែមានការប្រឡងជ្រើសរើសក្របកខណ្ឌទៅតាមជំនាញ រួមមាន វិស្វករ ស្ថាបត្យករ ច្បាប់ ភាសាអង់គ្លេស គណនេយ្យ សេដ្ឋកិច្ច និងជំនាញមួយចំនួនទៀត ដោយកំណត់យកត្រឹម ២០នាក់ ហើយតែងតែមាននិស្សិតដែលបានបញ្ចប់ការសិក្សាដាក់ពាក្យប្រឡងជិតមួយពាន់នាក់។  

ទោះជាយ៉ាងណា ឯកឧត្តម លាង មុនីរិទ្ធ លើកទឹកចិត្តដល់សិស្សនិស្សិតចូលរួមប្រឡង តែប្រសិនជាសិស្សនិស្សិតប្រឡងចូលក្នុងក្របខណ្ឌក្រសួងរៀបចំដែនដីមិនជាប់​ សូមកុំគិតថាយើងបាត់បង់ឱកាស គឺយើងអាចមានឱកាសទៅវិស័យឯកជន ព្រោះវិស័យឯកជនក៏ធ្វើការលើជំនាញដូចក្រសួងរៀបចំដែនដីដែរ គ្រាន់តែវិស័យឯកជនដើរតួអង្គជាអ្នកម្រើសេវាផ្ទាល់ជាមួយអតិថិជន ប៉ុន្តែក្រសួងជាតួអង្គមួយសម្រាប់គ្រប់គ្រង និងតម្រង់ទិស៕